УИХ-ын гишүүн Н.Номтойбаяр УИХ-ын 2020 оны сонгуульд нэр дэвшин өрсөлдөхгүй гэдгээ МАН-ын удирдлагуудад албан бус байдлаар илэрхийлсэн тухай бид мэдээлж байсан билээ.

Үнэхээр ч Хөдөлмөр, Нийгмийн Хамгааллын сайдаар ажиллаж байхдаа Хөдөлмөр эрхлэлтийг дэмжих сангийн удирдлагуудтай бүлэглэн 8 иргэн 21 хуулийн этгээдэд давуу байдал олгосон гэх үндэслэлээр АТГ-т шалгагдаж, яллагдагчаар, Г.Батхүү агсны амь насаа алдсан хэрэгт худал мэдүүлэг өгсөн хэргээр шалгагдаж, мөн л яллагдагчаар татагдаад буй түүнд улс төрийн карьер бодох нь бүү хэл давын өмнө эрүүгийн гэмт хэргээр ял хүлээхгүй байх нь л чухал болоод буй нь нууц биш.

Тэгвэл Монгол Улсын Ерөнхий Прокурор Б.Жаргалсайхан өчигдөр /2020 оны 01 сарын 16/  үдээс хойш  УИХ-ын гишүүн Н.Номтойбаярын бүрэн эрхийг түдгэлзүүлэх хүсэлтийг УИХ-ын даргад хүргүүлсэн юм. Энэ дагуу өнөөдрөөс эхлэн УИХ-ын бүтцийн байгууллага уг хүсэлтийг хэлэлцэж эхлэнэ.

Эхлээд УИХ-ын халдашгүй байдлын дэд хороо хуралдсанаар процедур эхлэх ба нийт 48 цагийн дотор уг асуудлыг бүрэн шийдвэрлэх хуулийн заалттай аж.

Эх сурвалжуудын өгүүлж буйгаар МАН-ын удирдлагууд УИХ-ын гишүүн Н.Номтойбаярын бүрэн эрхийг түтгэлзүүлэлгүй хамгаалж, "авч үлдэх" шаардлаггүй гэж үндсэндээ санал нэгдсэн байна.

Өмнө нь УИХ-ын гишүүн Д.Мурат, Т.Солтан, Б.Ундармаа, Л.Энхболд, Д.Дамба-Очир, Б.Батзориг нарын бүрэн эрхийг түтгэлзүүлэх саналыг Монгол Улсын Ерөнхий Прокурор гаргасан ч УИХ-ын чуулганы нэгдсэн хуралдаанаар хэлэлцэх үед МАН-ынхан "авч үлдэж" байсан юм.

 

Б.Батхүү

Сонин.мн