Монгол Улсын Ерөнхий Сайд, Ардчилсан Намын дарга, Монгол Улсын Ерөнхийлөгч Х.Баттулгын улс төрийн бодлогын зөвлөх асан Н.Алтанхуяг мэдээлэл хийлээ. Тэрээр мэдээллийнхээ үеэр нийт гурван асуудлыг хөндөв.

Тодруулбал тэрээр: " 2016 онд АН-ын даргын сунгаанд нэр дэвшмэгц АТГ намайг дуудан, сэжигтнээр татсан. Намын даргын санал хураалтаас гурав хоногийн өмнө яллагдагчаар татчихсан. Энэ бол Ц.Элбэгдорж, М.Энхболд нарын зохион байгуулсан ажил. 

Нөгөө талд нь С.Эрдэнийг намын дарга болгохын тулд Ц.Элбэгдорж, М.Энхболд, С.Эрдэнэ нар нийлж байгаад Баянгол зэрэг ганц хоёр дүүргийн саналыг л луйвардсан.

Мөн Ерөнхийлөгчийн сунгаа яаж болсон вэ? гэдгийг хэлье. Намайг Ерөнхийлөгчийн сунгаанд унагаах ажлыг Ц.Элбэгдорж зохион байгуулж, унагасан.

Санал хураалтын өмнө С.Эрдэнэ Р.Амаржаргалыг дэмжинэ шүү гэдэг командыг намын гишүүддээ өгсөн. Азаар Х.Баттулга ялсан.

2017 онд Ерөнхийлөгчийн зөвлөх болсноосоо хойш намынхаа ажилд оролцохоо больсон.

Өнөөдөр Ардчилсан Нам "60 тэрбум"-ын схемийг хэрэгжүүлж байна. Жишээ хэлье. Ардчилсан Залуучуудын Холбооны Ерөнхийлөгчид нэр дэвшихийн тулд 120 сая төгрөг өгдөг болчихсон. Энэ нам нам биш мөнгөний сүлжээ болсон.

Мөн гишүүдээ хасдаг, хөөдөг болчихсон. Ж.Батзандан, Л.Болд нарын байр суурийг би зөв гэж үзэж байна. Энэ хоёрыг намаасаа хөөгөөд Ардчилсан Нам бүлэггүй болчихсон. Энэ МАНАН-д л ашигтай. Одоо жирийн гишүүдээ хасдаг болчихсон. Тэр бүү хэл зарим суман дээр гурван хүн л саналаа өгч, АН-ын ҮБХ-ын гишүүдээ сонгодог болсон.

Иймээс АН-ыг өөрчлөх нэгдлийг санаачилж байна.

М.Энхболд, Ц.Элбэгдорж нарт хандаж үг хэлье.

Та нарт АН дэндүү томдоно шүү.

 

"Капитал" банкны луйвартай АН-ынхан хамаагүй. Нийгмийн даатгалынхан харин холбоотой, С.Эрдэнэ холбоотой.

 

С.Эрдэнэ сонинтой юм байна лээ. Тэр сониныхондоо : " Н.Алтанхуягийг хус, Ерөнхийлөгчийг хус, Зи Энхболдыг хус" гэдэг юм байна лээ.

С.Эрдэнэ намайг намаас хөөхгүй дээ, тэр С.Бямбацогтын баз хүргэн, МҮАН-аас орж ирсэн Д.Батцогт ч намайг хөөхгүй, цаас юу юм?

Би 1990 онд байгуулсан намаа ийм хулгайч, дээрэмчдийн гарт үлдээмээргүй байна. Би бол гараад явчихдаг хүн биш, үздэг, тэмцдэг хүн.

С.Эрдэнээ би чамайг мэднэ шүү, чамайг ямар гэмт хэргээр чинь барьцаалчихаад байгааг чинь ард түмэн ч мэдэж байна. С.Эрдэнээ, чамайг зайлуулнаа" гэсэн юм.

 

сонин.мн