Улаанбаатар хотын Захирагч Э.Бат-Үүл “Хөрөнгө оруулалтын ажлын хяналтыг сайжруулах тухай” А/143 дугаар захирамж гаргажээ. Уг захирамжаар Авто зам, барилга байгууламжийн ажил нь дутуу, гэрээгээр хүлээсэн үүргээ биелүүлээгүй гүйцэтгэгч аж ахуйн нэгж, байгууллагын жагсаалтыг холбогдох байгууллагуудаас нэгтгэн авч, нийтэд зарлуулахыг нийслэлийн Засаг даргын Нийгмийн хөгжлийн асуудал хариуцсан орлогч Ц.Энхцэнгэлд үүрэг болголоо.

Мөн зөрчил гаргасан гүйцэтгэгч аж ахуйн нэгж байгууллагыг шалгаруулсан Үнэлгээний хорооны гишүүд, уг авто зам, барилга байгууламжийн ажлыг хүлээн авсан Улсын комиссын бүрэлдэхүүнийг олон нийтэд зарлаж, хуулийн дагуу хариуцлага тооцуулах санал боловсруулах юм.
 
Нийслэлийн Засаг даргын үүргийн дагуу дээрх аж ахуйн нэгж болон Үнэлгээний хороо, Улсын комиссын бүрэлдэхүүний талаарх мэдээллийг Нийслэлийн Мэргэжлийн хяналтын газар, Авто замын газар, Ерөнхий төлөвлөгөөний газраас авч нэгтгэх ажил үргэлжилж байна. Эдгээр аж ахуйн нэгж байгууллагын нэрс, Үнэлгээний хороо, Улсын комиссын бүрэлдэхүүнийг энэ сарын 15-ны өдөрт багтаан Нийслэлийн удирдлагын зөвлөлийн ээлжит хуралдаанаар хэлэлцүүлж олон нийтэд зарлахаар боллоо.