Гомдогсодын бүлэглэлийн гал тогооны хүн Г.Шийлэгдамбыг улстөрийн хүчнүүд дарамталсан тухай хэвлэл мэдээллийн хуудаснаа ч харагдав, өөрөө ч энэ тухай мэдээлэл хийв.
 
Гэхдээ дарамтлагчдын толгойлогч нь нэгэн цагт өөрийнх нь толгой хоргодож асан МАН юм байх. МАХН хэмээх энэ бүлэглэл дотооддоо сэм дайнтай байгааг ийнхүү Г.Шийлэгдамба төвөггүйхэн зарлав. Хоргодох нөмөргүй болж, улстөрийн карьер нь дуусчихсан хэдэн нөхдүүдээс бүрдсэн энэ бүлэглэлийн Ерөнхий нарийн бичгийн даргыг хэн дарамтлах билээ дээ. Өөрсдийн дотоодын самуунаа яая гэж байхад. Тэр тусмаа Г.Шийлэгдамбыг бол бүр ч тоож дарамтлахгүй. 
    Хамгийн энгийнээр аваад үз. Албан тушаалгүй, ямар ч эрх мэдэл байхгүй, айсуй улстөрд ямар ч ирээдүйгүй болчихсон нөхрийг яах гэж дарамтлах юм. МАХН хэмээх бүлэглэл нь Н.Энхбаярыг өрөвдсөн ард түмний сэтгэлийн хүчээр энэ УИХ-д цөөн суудал авсан. Энэ нь ерөөсөө санамсаргүй үзэгдэл. Цаашид энэ бүлэглэлд ямар ч зам байхгүй. Гэтэл ийм улстөрийн хүчний Ерөнхий нарийн бичгийн даргыг хэн тоож дарамтлах юм бэ. Өөрөө л хэн нэгэн улстөрчийн эхнэрийг эргүүлж байгаад дарамтанд ороогүй бол улстөрийн зүгээс ямар ч дарамт байх үндэслэлгүй л дээ.  
     Хамгийн бодит үнэн бол МАХН хэмээх бүлэглэл дотоодын самуунтай байгаа. Учир нь МАН-аас нүүр буруулж, МАХН-ыг сонгосон УИХ-ын гишүүн асан Ц.Шаравдорж тус намын Ерөнхий нарийн бичгийн дарга болж, жагсаалтад эрэмбэ эдлэхээр зангараг гаргаад байгаа аж. Тиймээс удахгүй МАХН Их хурлаа зарлаж, энэ бүгдийг эцэслэх гэнэ. Энэ үеэр л Г.Шийлэгдамба суудлаасаа бууж Ц.Шаравдорж хэмээх акул энэ бүлэглэлийн гал тогоог барих юм байна. Гал тогоог барих ч юу байхав. Айсуй 2016 оны сонгуульд тус намыг удирдан орж, түүнийхээ төлөөсөнд УИХ-д суудал авах гэсэн тохироо. Учир нь МАХН-ынхан туршлага бүхий олны танил эрхмээр гал тогоогоо бариулж сонгуульд оролцох нь амжилт үзүүлнэ гэсэн бодлого барьсан бололтой. 
     Харин энэ бүгдийн золиос нь Г.Шийлэгдамба болчихоод яах учраа олохгүй будилж суугаагийн илрэл нь энэ. Тодруулбал, намайг улстөрийн хүчнүүд дарамталсан, Ерөнхий нарийн бичгийн даргын үүрэгт ажлаа өг хэмээсэн гэх зэргээр худлаа ярьж сууна. Ёстой нүхнээсээ төөрч, мухар нүхэнд орсон тарвага шиг л байна, хөөрхий. Үнэн хэрэгтээ арга ядсан хүний л хийж буй ажил шүү дээ. 
А.Гал