Snapshot_2014-10-28_091356Н.Энхбаяр Монголд ирээд хэдхэн хонохдоо Засгийн газрыг ч самарлаа. Хамтрагч АН өөрийн МАХН-аараа ч баахан туг тахилаа.

10 жилийн хамтын ажиллагааны гэрээнээс болоод Засгийн газрын хувь заяа ч эвгүй боллоо. АН дотооддоо учраа олохоо болив. Үүнээс гадна хамгийн хэцүү үед түшиг тулгуур болж ирсэн Д.Тэрбишдагва, Ч.Улаан, О.Чулуунбат гуравыгаа ихэд гомдоожээ. Тэр хуучины андын сэтгэлээр биш улс төрд шинэ хөзөр дэлгэх ёстойгоо ойлгоод буцсан байна. Ингээд МАХН доторх үл ойлголцол дээд цэгтээ хүрсэнээс гадна бутран унахад бэлэн болжээ. 

    Д.Тэрбишдагва, Ч.Улаан, О.Чулуунбат нарт "баяртай" гэж хэлэх хэд хэдэн шалтгаан байсан бололтой. Юуны өмнө өөрийг нь эзгүй үед "Намын байрны мөнгийг босгож чадсангүй, намын гишүүдийг ажилд оруулаагүй" гэсэн том шалтаг гаргаж иржээ. Дээр нь Г.Шийлэгдамбын гомдол, эхнэр О.Цолмонгийн нөлөөлөл ч их байсан бололтой. Ингээд хуучны андуудаа жийх шалтгааныг олсон байна.

    Харин нөгөө гуравт нь ч бас гомдож тунирхах шалтгаан олон гарч иржээ. Юуны өмнө Монголд ирж байгаагаа энэ гуравт хэлээгүй бусдад нь дуулгажээ. Ялангуяа Г.Шийлэгдамба бүгдийг мэдэж байж. Н.Энхбаярыг Улаанбаатарт буухын өмнө л зарим нь Г.Шийлэгдамбаас зарим нь сэтгүүлчдээс мэджээ. Үүнд нь тунирхжээ. Бас АН-тай 10 жилийн гэрээ байгуулахдаа эдгээр андуудыгаа огц оролцуулаагүй байна. Тэр ч бүү хэл оролцуулах шаардлагагүй. Цаашид хамт явах хүмүүсээ л оролцуулна гэсэн шалгуураар асуудалд ханджээ. Ингээд Н.Алтанхуягтай 10 жилийн гэрээ байгуулах ажилд Н.Энхбаяр, Г.Шийлэгдамба, З.Баянсэлэнгэ гэсэн гурван хүн оройлон оролцжээ. Тэдэнд Э.Батшугар, Ц.Шаравдорж, Эрдэнэжамьян гэх мэт хүмүүс бичиг цаасыг нь цэгцэлж өгчээ. Дээр нь Д.Тэрбишдагва, Ч.Улаан хоёрыг "одоо болно, сайдын ажлаа өг, бусаддаа боломж гарга" гэсэн даргын лүндэн том цохилт болжээ. Удахгүй дэд сайд нарыг томилохдоо О.Чулуунбатыг мурих тохироо хийгдсэн байна. Ингээд энэ гурав Н.Энхбаярын тоглолтын гадна үлдэцгээлээ. 

    Энэ байдлаа мэдэрсэн Д.Тэрбишдагва МАХН-ын дэд дарга гэсэн Монголд ганц байдаг албаа хүлээлгэн өгөхөөр бэлдэж эхэлсэн сураг гарлаа. Учир нь бусад улс төрийн намуудад намын дэд дарга гэсэн бөглөөс байдаггүй билээ. Тэрээр Шадар сайдын албаа хүлээлгэн өгсөнийхөө дараа МАХН-ын дэд дарга гэсэн албаа хадаг сүүтэй хамт хүлээлгэн өгөх гэнэ. Ингээд Д.Тэрбишдагва МАХН доторх сул гишүүний суудалд шилжих нь ойлгомжтой боллоо. Түүний оронд Шадар сайд болох Г.Шийлэгдамбыг томилохоор "эзэн" лүндэн буулгасан гэнэ. Харин Г.Шийлэгдамбын оронд Ц.Шаравдорж очих бололтой. МАХН дотор ийм шинэчлэл хийгдэхээр бэлтгэгдэж байна. Тун удахгүй МАХН-ын хамгийн нөлөө бүхий хүн Д.Тэрбишдавга "Нэг хүнээр овоглодог, компанийн эзэмшлийн гэж хэлэхээр ч юмуу эсвэл тойрон хүрээлэгчдийн нам хол явахгүй" гэж хэлээд хаалгаа саваад алга болох нөхцөл байдал үүслээ. 

Т.Сар