Өнөөдөр айл бүрийг машинтай боллоо хэмээн ад үзсэн хотын  дарга дугаарын хязгаарлалт хийж байгаа.   Уг нь бол зөв алхам. Гэхдээ замын хөдөлгөөнд оролцож байгаа явган зорчигч,  жолооч нартаа шударга л хандах хэрэгтэй.  Өнөөдөр бид зөвхөн жолооч нарыг л торгоно, эрхийг нь хасна гэж л дарамталдаг нь нууц биш. Тиймдээ ч дүрэм зөрчсөн  тохиолдол бүрт нь торгож, эрхийг нь хасаад  “чангалж” байгаа.  

Жолооч нараа чангалж байгаа бол явган зорчигч нараа ч гэсэн чангалах л хэрэгтэй.  Өөрөөр хэлбэл  өнөөдөр  нийслэлд   200-500м яваад л явган хүний гарц байгаа.  Тэгвэл явган хүний гарцаараа гарахгүй  түгжирч, шахуулж ядсан ч нүхтэй замаа тойрч  аргацааж ядан  байхад  зам дээр мал шиг бэлчиж байгаа явган зорчигчдын  аяыг харах бас л асуудал шүү.  Хэрвээ час өдрөө нүх тойрох, эсвэл бусдад шахуулаад гарцгүй газраар мал шиг бэлчсэн зорчигчийг дайрах, шүргэх тохиолдол гарвал яах вэ? Тухайн хүмүүсийн буруу болж жолоочийн нэр цагаадах ч бас л сэтгэл санаа, цаг зав гээд олон зүйлээрээ хохирох нь нууц биш.  

Тиймээс  явган зорчигч нарыг ядаж гарцаараа мал шиг бэлч гэж хэлчихмээр байгаа юм. Үгүй бол өөртөө ч, бусдад ч гай болох гэж байгаа юм шиг замаар  явах тохиолдол сүүлийн үед асар их гарах болсон. Үүнээс болж хохирох тохиолдол ч гарч байгаа.  Явган зорчигч гарцаар гарахгүй бол  Захиргааны хариуцлагын тухай хуулийн 25 дугаар зүйл /Хөдөлгөөний аюулгүй байдлын журам зөрчих/-ийн дөрөв дэх хэсэгт “Явган болон унадаг дугуй, ердийн хөсгөөр зорчигч этгээд хөдөлгөөний аюулгүй байдлын журам зөрчсөн бол 100-8000 төгрөгөөр торгох шийтгэл ногдуулна” гэж заасан байдаг. Үүнээс гадна Захиргааны хариуцлагын тухай хуульд өөрчлөлт орохоор дүрэм зөрчсөн явган зорчигчийг цагдаагийн алба хаагчид 30000-50000 төгрөгөөр торгодог болно гэж байгаа.

 Өнөөдөр гарцаараа гардаггүй асуудал их дээд сургуулиудтай газар ихээр ажиглагддаг. Тухайлбал ШУТИС-ийн  КТМС-ийн оюутнууд  зам гарахдаа гарцгүй газраар,  аюулгүй тойрог дөнгөж өнгөрч байгаа машинуудтай за булаацалдан эр зоригоо шалгадаг.

 Шударга л байя л даа явган зорчигчийг ч гэсэн торгооч дээ.  Тэднийг гарцаараа гар гээд ухуулга сурталчилгаагаа хий л дээ...

А.Баярмаа