Сэлэнгэ мөрөн дээр барих Шүрэнгийн усан цахилгаан станц, Орхон гол дээрх усан сангийн цогцолбор, Эгийн голын төслийн талаарх танилцуулгыг ОХУ, БНХАУ, Дэлхийн банкны төлөөлөгчдөд “Эгийн голын УЦС” төслийн нэгжийн захирал Д.Одхүү тэргүүтэй албаныхан хийлээ.

Энэ үеэр ОХУ-ын төлөөлөгчидтэй “Эгийн голын усан цахилгаан станц”-ын төсөл дээр харилцан ойлголцлын санамж бичигт гарын үсэг зурав. Уг цахилгаан станцын асуудлаар хойд хөрштэй үл ойлголцож ирсэн бөгөөд ОХУ-ын тал Байгал нуурын тэнцвэрт байдалд сөрөг нөлөө үзүүлнэ гэж тайлбарладаг. Харин манай талаас байгал экологид ямар нэг сөрөг нөлөөгүй, шаардлагатай нөхцөлд усны төвшинг нэмэх сайн талтай гэдийг баталж ирсэн юм. Тэгвэл хоёр тал энэ асуудал дээр тохиролцож, жилд 315 мВт эрчим хүч үйлдвэрлэх хүчин чадалтай усан цахилгаан станц Эгийн гол дээр байгуулах суурийг тавьж байна. Эгийн голын станц ашиглалгад орсноор оргил ачааллын үед ажиллах чадвартай Монгол Улсын анхны тохируулга болох юм.

 

 

Мөн одоо ажиллаж буй нүүрсний цахилгаан станцуудын үр ашгийг сайжруулна. Нүүрс түлдэг дулааны цахилгаан станцууд үйлдвэрлэсэн эрчим хүчнийхээ 20 хүртэл хувийг дотоод хэрэгцээндээ зарцуулдаг бол Эгийн голын станц ердөө нэг хувийг зарцуулах аж. Нөгөө талаар дэлхий нийтээр санаа зовинож буй хүлэмжийн хийн ялгарлыг үлэмж хэмжээгээр бууруулах эрдэмтдийн тооцоо гарсан байдаг. Жилд 606 сая кВт цаг эрчим хүч үйлдвэрлэхэд зарцуулдаг долоон сая тонн түүхий нүүр шатаах шаардлагагүй бөгөөд 709 мянган тонн хүлэмжийн ялгаруулах аюулаас ангижрах юм. Улмаар 5.7 тэрбум шоо метр усны нөөц үүссэнээр Монгол Улсын цэнгэг усны баталгаат нөөцтэй болно. Энэ нь бүс нутгийнхаа агаарын чийгшлийг нэмэгдүүлж, манай оронд тулгамдаад буй цөлжилтийг бууруулах нөлөөтэй. Танилцуулах уулзалтад ОХУ-ын талаас Байгалын нөөц ашиглалтын хяналтын албаны орлогч дарга А.Амирханов тэргүүтэй Оросын Шинжлэх ухааны академийн Сибирийн салбар Байгал нуурын институт, Буриад болон Эрхүүгийн Шинжпэх ухааны төв, Енисей голын сав газрын усны удирдах газар, Элчин сайдын яамны 12 төлөөлөгч хүрэлцэн иржээ.

 

Д.МЯГМАР

/ҮНДЭСНИЙ ШУУДАН/