Өнгөрсөн баасан гаригт НИТХ-ын тэргүүлэгчид хуралдаж гэр хорооллын дахин төлөвлөлтийг үргэлжлүүлэх эсэх талаар хэлэлцлээ. Ингээд үргэлжлүүлэх нь зөв гэдэг саналд нэгдсэн юм.

Мөн уг хуралдаанаар гэр хорооллын дахин төлөвлөлтийн явцад хийсэн шалгалтын дүнг хэлэлцсэн нь 104 тэрбум төгрөгийн дуулианыг нийгэмд босгож ирлээ. Гэр хорооллыг дахин төлөвлөх нь хотын өмнөх дарга Э.Бат-Үүлийн 2012 онд эхлүүлсэн ажил. Нийслэлийн гэр хороолол дахь айлуудыг тохилог, дулаан орон сууцанд амьдруулж оронд нь хөрс, утааны бохирдлоосоо салах нь Э.Бат-Үүл даргын хүсэл байв. Өнгөрсөн хугацаанд цөөнгүй тооны өрх дахин төлөвлөлтийн буянаар газраа байраар сольж, хүслээ биелүүлжээ. Гэхдээ байрандаа орж баярласан хүмүүс байхад гэр, оронгүй хохирч үлдсэн хэсэг ч байгаа талаар өнгөрсөн даваа гаригт шинээр томилогдсон Гэр хорооллын дэд бүтцийн газрын дарга М.Ганбаатар НИТХ-ын хурал дээр хэлсэн. Тодруулбал, 400 иргэн орон, гэргүй үлдэж 104 тэрбум төгрөг үр ашиггүй салхинд хийссэн гэж тэрбээр хэлэв. Гэр хорооллыг дахин төлөвлөх ажлыг 2010 онд эхлүүлэхдээ Улаанбаатар хотын ерөнхий төлөвлөгөөний дагуу эхлээд долдугаар хорооллоос төлөвлөлтийг эхлүүлж, багц багцаар нь барилгажуулахаар шийдвэрлэж, газраа чөлөөлсөн иргэдийг түр суурьшуулах зориулалтай 300 айлын орон сууцыг барьж ашиглалтад оруулсан байдаг. Дээрх шиг байрыг дүүрэг бүрт барихаар төлөвлөж байсан боловч 2012 онд энэ төлөвлөлтийг өөрчилсөн байна. 2012-2016 онд гэр хорооллын дахин төлөвлөлтөөр 7000 барилга барина гэж байсан ч таван мянга нь шугам, сүлжээ болон иргэдтэй зөвшилцөх асуудал саатсанаас үүдэн зогсонги байдалд орсон байна. Ингээд 2012 оноос хойш хашаа байшингаа байраар солихоор газраа чөлөөлсөн иргэдийн 615 нь өдгөө түрээсийн сууцанд амьдарч байгаа бол 400 нь гэр оронгүй болж, ах дүү, танилындаа хоног төөрүүлж байгаагаа мэдэгдээд байгаа аж. Өнгөрсөн дөрвөн жилийн хугацаанд дахин төлөвлөлтийн инженерийн шугам сүлжээнд зориулан нийслэлийн төсвөөс 104 тэрбум төгрөг зарцуулсан байна. Харин бодит байдал дээр энэ хөрөнгө юунд зарцуулагдсан нь бүрхэг байгаа гэнэ. Энэ мөнгөөр 10 мянган айлын орон сууцанд урьдчилгаа төлбөр болгон өгөх боломжтой. Одоо бариад гацчихсан 5000 байрны 20 хувийнх нь шугам сүлжээг нь шийдчих боломжтой байсан гэж Гэр хорооллын дэд бүтцийн газрын дарга М.Ганбаатар хэлсэн.

400 иргэн орон, гэргүй үлдэж 104 тэрбум төгрөг үр ашиггүй салхинд хийссэн.

 

Тэрбээр уг асуудлаар үргэлжлүүлэн “Гэр хорооллыг дахин төлөвлөх ажил 2010 онд эхэлсэн ч 2012 онд шинээр нийслэлийг удирдсан эрхмүүд явц дунд нь өөрчлөлт оруулсан. Ингээд газраа дахин төлөвлөлтөд хамруулсан иргэдийг түр амьдруулахаар төлөвлөсөн орон сууцыг "Ахмадын орон сууц" болгосон. Энэ хугацаанд 24 байршилд дахин төлөвлөлт явуулахаар 34 төсөл хэрэгжүүлэгчийг сонгосон. Харамсалтай нь тэдний 18 нь компанийн ажил зогсч, гурав нь огт барилгаа бариагүй. Дийлэнх нь суурь, арматураа босгосон байдалтай бүрэн гүйцэт ажлаа хийсэнгүй.Төлөвлөлтгүй, хариуцлагагүй энэ байдлаас үүдэж олон өрх буудалд, айлд, түрээсийн байранд амьдарч хохирч байна” гэв.

 

400 иргэний асуудлыг хэрхэн шийдэх вэ

 

Орон, гэргүй болсон 400 иргэний асуудлыг нэн тэргүүнд шийдэх ёстой НИТХ-ын тэргүүлэгчид үзэж байна. Энэ талаар НИТХ-ын дарга Ц.Сандуй “Биднийг ажил эхлүүлэхэд иргэд төр, компани, газрын эзэн хоорондын гурвалсан гэрээ хүсч, төрийг хариуцлагажуулъя гэдэг байсан. Гэтэл хотын өмнөх удирдлагууд дахин төлөвлөлтийг явуулахдаа өөрсдөөсөө хариуцлагыг холдуулаад компанитай л гэрээ байгуул гэсэн. Ингээд ажил эзэнгүйдэж хариуцлагагүй компаниуд иргэдийг хохироож, өнөөдөр төрийн нуруун дээр буугаад байна. Одоо буруу шийдвэр гаргасан хүмүүс хариуцлагаа үүрэх ёстой. НИТХ-ын Тэргүүлэгчдийн хуралдаан дээр ярьсан асуудлыг ажил хэрэг болгож, дахин шалгалт явуулж дүнг нь сонсоё. Түрүүн дурдсан ажлын хэсгүүдийг гаргаж асуудлыг яаралтай шийдье. 400 айлын асуудлыг шийдэх хэрэгтэй” гэлээ.

 

Мөн дахин төлөвлөлтийн ажлын зөвшөөрлийг барилга барих зөвшөөрөлгүй "Назу проперти” гэх компанид өгсөн гэх хэл ам энэ үеэр гарсан юм. Түр орон сууцыг одоо ахмадуудууд түрээсэлж байгаа аж. Энэ хүмүүсийг яах вэ гэдэг нь асуудал болоод байгаа. Өвлийн хүйтэнд тэднийг гаргах боломжгүй. Баянзүрх, Сонгинохайрхан дүүрэгт байгаа хохирогчдын асуудлыг судалж, шийдвэрлэх зүйтэй. Мөн газар дээрээ ногоо тарьж, дэлгүүр ажиллаж байсан хүмүүсийн орлогын асуудлыг тооцоогүй шийдсэнээс олон хүн хохирсон байгаа гэж М.Ганбаатар дарга хэллээ. Тиймээс хохирогчдын хохирлыг судлах асуудлыг шийдэх ажлын хэсгийг дахин гаргахаар болов.

 

Ямартай ч 104 тэрбум төгрөгөөр байшин барина гэж тоглосон гэх хэрэгт Э.Бат-Үүл даргыг буруутган шүүхэд өгөх ёстой гэдэг саналыг энэ үеэр гаргав. Магадгүй орон нутгийн сонгуулиас өмнө МАН-ынхан Э.Бат-Үүлийг багийг дарж авахаар энэ бүхнийг сөхсөн байж болно гэж хардах хүмүүс ч байна. Мөн түүнийг уг хэрэгт холбогдуулан хуулийн байгууллагаар шалгаж байх магадлалтай гэж харах хүмүүс ч байгаа юм. Учир явдал хэрхэн үргэлжилж, НИТХ-ынхан дахин төлөвлөлтөөр ямар ажлыг үргэлжлүүлэн хийж Э.Бат-Үүлийн асуудал хэрхэн шийдэгдэхийг харах үлдлээ.

 

24tsag.mn