"Монгол залуу хүн" төрийн бус байгууллагаас Ерөнхий сайд Н.Алтанхуягт "Шантаршгүй монгол хүн " өргөмжлөлийг гардуулах болсон талаараа мэдээлэл хийв.

Тус байгууллагын зүгээс Ерөнхий сайд Н.Алтанхуягийг "Сайн муугаар дуудуулсан ч хамгийн хөдөлмөрч, ажилсаг, бүтээлч байж чаддаг хэмээн сэтгэлийн дэм хайрлах үүднээс "Шантаршгүй хүн" өргөмжлөлийг гардуулж өгөхөөр болсон" хэмээн онцоллоо. Энэхүү шагналыг түүнд дараах шаардлагыг хангасан хэмээн өгөхөөр болжээ. Тодруулбал,

1. Сөрөг хүчнээс явуулсан Засгийн газрыг унагах гэсэн оролдлогод шантраагүй

2. Албан тушаалын төлөөх шантааж, хавчлага, гадуурхалд шантраагүй

3. Олон нийтийг турхирсан гүтгэлэг, доромжлол, бэлтгэгдсэн комментчдын дайралтад шантраагүй

4. Ажил нь ард түмэнд таалагдахгүй, хүрэхгүй, тэдний дэмжлэгийг авахгүй байгаа гэсэн захиалгат мэдээлэлд шантраагүй

5. Хувийн амьдрал руу нь дайрч, гэр бүлийн амгалан тайван байдлыг алдагдуулсан сэтгэл зүйн дайралтад шантраагүй зэрэг таван ай савд багтах нөлөөллийг тэвчин улс орныхоо төлөө хийж буй олон сайн үйлийг нь үнэлэн олгож байгаа аж.

Тус шагналыг өгснөөр Ерөнхий сайдад урам өгөхөөс гадна "цаашид ч битгий шантраарай" гэдгийг сануулж байгаагийн илрэл аж. Түүнчлэн цаашид бие биенээ мэрж хэмлэх биш өргөж дэмжиж ажиллахыг тус байгууллагаас уриаллаа.

Уг шагналыг өнөөдөр 11.00 цагаас Төрийн ордонд гардуулж өгөх юм.

Х.Даваа