“Дархадын цэнхэр хотгор нь хоё

Далай шиг болоод уужим даа” гэж дуулсаар бид өргөн Шишгэдийг хэдэнтээ гатлав. Зургаан ястаны өлгий болсон Хөвсгөл аймгийн хамгийн шооч, дууч зон бол Дархадууд. Эзэн Чингис хаанаасаа соёрхогдон дархлагдсан энэ зоны ил цагаан яриа хөөрөө, дуу хуур замын алжаалыг умартуулж байлаа.

Эх орны дөрвөн зүг найман зовхист довтлон хүрч очсон газар бүртээ ажиллаж амьдарч байгаа ард иргэдийн санал бодлыг сонсож цаг үеийн мэдээ мэдээллийг хүргэж яваа МАН-ын “БИД ХАМТДАА” аян Монголынхоо хоймор хязгаарт үргэлжилж байна. Хөвсгөл аймгийн МАН-ын хорооны баг хамт олон Дархадын цэнхэр хотгорыг зорин ажиллажээ.

Хорьдол сардалын нуруу, алдарт Улаан тайга, Өргөн Шишгэд, Тэнгис гол гээд үзсэн хүн дуу алдан алмайрдаг үзэсгэлэнт нутгийн эзэд болсон Дархад зон намрын их ажлынхаа чөлөөгөөр МАН-аас зохион байгуулж байгаа “БИД ХАМТДАА” аянд нэгдсэн юм.

Хөвсгөл аймгийн Ренчинлхүмбэ, Цагаанннуур, Улаан-Уул, Баянзүрх суманд энэ жил гандуу зун болсон ч намрын ажлаа сайн базааж өвлийг угтахад бэлэн болжээ. Тус сумдын иргэд аяны баг хамт олонтой уулзаж ахуй амьдрал, сум орон нутагт тулгамдаж буй асуудлыг гарган тавьж аймгийн МАН-ын дарга, Монголын Дархад Зон Нийгэмлэгийн тэргүүн Л.Ганболд сүүлийн үед аймаг орон нутагт хийж хэрэгжүүлж буй ажлууд мөн Дархад Зон Нийгэмлэгийн үйл ажиллагааны мэдээлэлийг хүргэж илэн далангүй нээлттэй ярилцаж байлаа.

Цагааннуур Ренчинлхүмбэ сумын хувьд хэдийгээр төвийн эрчим хүчинд холбогдсон ч аймгийн төвөөс 280-300 км алслагдсан зам харилцаа муутайн улмаас эрүүл мэндийн яаралтай тусламж авах зэрэгт хүндрэл гардаг, өвөлдөө -50 градус хүрч хүйтэрдэг тул малчдад отрын бүс нутаг хэрэгтэй байгаа зэрэг нийтлэг бэрхшээлийг дурьдаж шийдвэрлэж өгөхыг хүсэж байлаа.

Орон нутгийн удирдлагын хувьд төсвийн урсгал зардлыг буцаан татсан нь өвөлжилтийн бэлтгэл ажил хангах, отрын бүс нутаг тогтоох, малчид, иргэдэд төрийн үйлчилгээг хүргэхэд зэрэг олон ажлыг зохион байгуулахад маш их хүндрэлтэй болж байна хэмээн яриж байлаа.

Улаан-Уул сумын иргэд ОНХС-ын хөрөнгөөр томоохон зам давааг засаж байгаад талархаж байгаа илэрхийлэж ажлын амжилт хүслээ. Тус сумын иргэн Н.Далайбаяр –“Засаглалын хямрал, төрийн тогтворгүй байдал нь эдийн засаг хүндэрхэд гол хүчин зүйл болсон. Энэ бүхний золиосонд ард иргэд, хохирч байна. Сумын төвд ажилгүйдэлээс үүдсэн архидалт их болж байна. Хэдэн жил чимээгүй байсан малын хулгай хүртэл гаарч байгаа. Ардын нам дээрээ ялагдахад Ард түмэн доороо бас ялагддагыг батлаж байна” хэмээн ярьлаа.

Баянзүрх суманд зохиогдсон аяны хүрээнд тус сумын МАН-ын дарга, аймгийн ИТХ-ын төлөөлөгчид Г.Батцогт хөдөөгийн хоёр багийн даргын унааны асуудлыг УИХ-ын гишүүн Л.Энх-Амгалантай хамтран шийдвэрлээсээ дуулгаж багийн дарга нарт “МУСТАНГ” мотоциклийг хүлээлгэн өглөө.

Мөн “БИД ХАМТДАА” аяны хүрээнд намын гишүүд дэмжигчид иргэд сонгогчдын дунд гарбөмбөг, үндэсний бөхийн барилдаан, шатар, мото уран жолоодлого, таталт буухиа зэрэг спортын уралдаан тэмцээнүүд зохион байгуулж аймгийн Хөгжимт драмын театрын уран бүтээлчид ая дуугаа өргөлөө.

Даамай холоос санагдах дархад нутгийн үзэмжит намраар “БИД ХАМТДАА” аян өрнөж илэн далангуй яриа, санал, дуу хуур тоглоом наадамтай амжилттай өндөрлөлөө.