УИХ-ын гишүүн Л.Эрдэнэчимэг Монгол Улсын Сайд, МҮАН-ын дарга М.Энхсайханд хариуцлага тооцох тухай шаардлагыг Ерөнхий сайд, УИХ-ын гишүүн Ч.Сайханбилэгт хүргүүлжээ.

Тэрээр уг албан шаардлагадаа : “Монгол Улсын сайд М.Энхсайхан болон түүний ажлын хэсгийн боловсруулсан гэх Тавантолгой ордыг ашиглах Хөрөнгө оруулалтын болон дагалдах бусад гэрээний төсөл нь Монгол Улсын хууль тогтоомж, Үндэсний Аюулгүй байдлын зөвлөмжийг илтэд зөрсөн, үндэсний аюулгүй байдалд сөрөг нөлөө үзүүлэх гэмт хэргийн шинж агуулсан гэж үзэж болохоор байна. Иймд Монгол улсын сайд М.Энхсайханд болон түүний ажлын хэсгийн гишүүдэд хуулийн дагуу хариуцлага тооцож, эргэн мэдэгдэхийг шаардаж байна” гэжээ.

Л.Эрдэнэчимэг нь Монгол Улсын Сайд М.Энхсайханы боловсруулсан Тавантолгойн хөрөнгө оруулалтын гэрээг хянаж, шалгах УИХ-ын ажлын хэсгийг ахалж байсан бөгөөд нэгэнтээ хэвлэлд өгсөн ярилцлагадаа : “Тавантолгойн гэрээг гацаасандаа баяртай байна” хэмээсэн юм.

Харин М.Энхсайхан хариуд нь “ Л.Эрдэнэчимэг эмчид үзүүлэх шаардлагатай юм шиг байна лээ” гэсэн нь Л.Эрдэнэчимэгийн дургүйцлийг ихэд хөдөлгөсөн тухай улс төрийн хүрээнд ярилцдаг. Энэхүү М.Энхсайханд хариуцлага тооцох албан шаардлага гэгч нь Ч.Сайханбилэгийн Засгийн газрыг хөдөлгөх алхамуудын нэг гэх хүн байгаа ч улс төрийн хүрээний олонхи эх сурвалж үүнийг ердөө л сэтгэл мэдрэлийн өвчтэй гэж доромжлуулсан Л.Эрдэнэчимэгийн “хор шар”-тай холбоотой үйлдэл гэж дүгнэж буй аж.

Үнэхээр ч УИХ-ын гишүүдийн дунд сүүлийн үед , С.Баярцогтод “Юу ч биш амьтан, тэрэнд ер нь машин унуулах ч хэрэггүй” хэмээн доромжлуулсан УИХ-ын гишүүн О.Баасанхүү хариуд нь түүнийг огцруулах санал гаргасан зэргээс эхлээд ердөө л хувь хүмүүсийн харилцааны зөрчлөөс үүдэлтэй “хариуцлага тооцох” гэгч сүржин тайлбартай санал гарах болсон нь нууц биш билээ.

П.Мандах

sonin.mn