ЭМС-ын сайд асан Г.Шийлэгдамбыг авлигын хэргээр саатуулаад байгаа. Түүнийг АТГ-аас их хэмжээний авилга авсан хэмээн Эрүүгийн хуулийн тусгай ангийн 268-д зааснаас эрүүгийн хэрэг үүсгэн шалгаж байгаа юм. Гэвч түүний биеийн байдал муудсан тул батлан даалтанд гарах хэрэгтэй хэмээн түүний өмгөөлөгч хүсэлт тавьсан ч хүлээн аваагүй. Улмаар үргэлжлүүлэн хорих шийдвэрийг шүүх гаргаж, улмаар яллагдагчаар татсан юм. Түүний өмгөөлөгч зүрхний хүнд өвчтэй учир орй ойрхон эмчлүүлэг байсан гэв. Одоогоор тэрбээр Төв аймгийн урьдчилан хорих төвд хоригдож байгаа. Олон дарга нар хоригдохоороо биеийн байдал нь эрс муудаж, өвдөөд байдаг ямар учир байна.

Ерөнхий сайд асан Н.Алтанхуягийн ахлах зөвлөхөөр ажиллаж байсан Л.Гансүх биеийн байдал тааруу гэж ирээд л батлан даалтад гарч байсан. Хүргэн хүү Г.Дэнзэн ч мөн гарч ирээд эмнэлэгт хэвтэж эмчлүүлж байв. “Эрдэнэс Тавантолгой”-н захирал асан Я.Батсуурийн ч бие тааруун улмаас гарч байсан юм. Ихэнх дарга нар ямарваа нэг хэрэгт орооцолдоод хоригдлоо гэхэд “биеийн байдал нь мууджээ” гэсэн мэдээг л хамгийн түрүүнд сонсдог. Магадгүй энэ нь өөрсдийгөө аврах нэг гарц нь ч байдаг байж болох. Батлан даалтаар гарч, хэрэг шалгагдаж явсаар эцэст нь хохирлоо барагдуулах, батлан даалтаар гарах, тэнсэнгээр суллагдах гэх мэтээр хэрэг замхардаг. Ийм жишээ ч олон бий.

Дарга нар гэхээрээ шоронд орж, хоригдоход бие нь муудчихаад байдаг нь сонин юм шүү. Цаанаа ямар нэг учиртай гэмээр. Гэтэл жирийн аавын хүү ялаа аваад шоронд хоригдоод, өвдсөн ч өвдөөгүй юм шиг явж л байдаг шүү дээ. Ингээд бодохоор дарга нар юу идэж уухаараа ийм туниагүй болчихдог юм бэ гэж бодогдох юм.

Т.Буянаа