Сонгуулийн тухай хуульд зааснаар Сонгуулийн сурталчилгаа явуулах хэлбэр, субъект, хугацааг нарийн тодорхойлж өгсөн.

Тэгвэл Сонгуулийн тухай хуулиар сурталчилгаатай холбоотой дараахь үйлдлүүдийг хориглосон. Үүнд:

  • Сурталчилгаа 2016 оны 06 дугаар сарын 11-нээс 06 дугаар сарын 28-ныг хүртэл 17 хоног үргэлжилнэ. Дээрхи хугацааг зөрчсөн буюу эдгээрээс өөр цаг хугацаанд сонгуулийн сурталчилгаа явуулж болохгүй.
  • Сонгуулийн штаб, түүний ажилтан, менежер, шадар туслагч, ухуулагчаас бусад этгээд сонгуулийн сурталчилгаа хийхийг хориглоно.
  • Сонгуулийн тухай хуульд зааснаас өөр хэлбэрээр сурталчилгаа явуулахыг хориглоно.
  • Сонгогчдын саналыг татах зорилгоор бүх төрлийн үйлчилгээ зохион байгуулах, ивээн тэтгэх,
  • Сонгуулийн мөрийн хөтөлбөрт тусгагдаагүй аливаа зорилт, арга хэмжээг хэрэгжүүлэх талаар амлалт авах, ийм агуулга бүхий аливаа үйлдийг сонгуулийн сурталчилгаанд ашиглах,
  • Төрийн болон бусад өмчийн хөрөнгөөр хөрөнгө оруулалтын чанартай ажил, үйлчилгээ явуулах,
  • 23.00 цагаас дараа өдрийн 07.00 цаг хүртэлх хугацаанд чанга яригч ашиглах,
  • Сонгуульд оролцохоос татгалзах, сонгуулийн болон бусад хууль тогтоомж зөрчихийг уриалсан агуулга бүхий сурталчилгаа явуулах,
  • Аливаа шашны зан үйл ашиглах, түүнийг зохион байгуулах, оролцох, ивээн тэтгэх, шашны холбогдолтой эд зүйл тараах, сурталчилгааны материалд шашны холбогдолтой аливаа дуу, зураг хэвлэх, нийтлэх, нэвтрүүлэх,
  • Сурталчилгаанд улс төрийн албан хаагчаас бусад төрийн албан хаагч оролцох, төрийн болон нутгийн өөрөө удирдах байгууллага, төрийн өмчийн болон төрийн өмчит хуулийн этгээдийн тээврийн хэрэгсэл, өмч хөрөнгийг ашиглах,
  • Сурталчилгааны явцад бусдыг гүтгэх, доромжлох, гутаах, хуурамч мэдээ мэдээллийг төрөл бүрийн хэлбэрээр тараах,
  • Сонгогчдын санал худалдан авахад чиглэсэн аливаа үйлдэл, үйл ажиллагаа явуулах,
  • Эх сурвалжийг дурдаагүй сонгуулийн сурталчилгааны материалыг хэвлүүлэх, тараах, нийтлэх, нэвтрүүлэхийг хориглодог.

Хууль заасан дээрхи зөрчилтэй үйлдлүүд илэрсэн тохиолдолд аливаа этгээд Цагдаагийн байгууллагад мэдэгдэх үүрэгтэй.