Өнөө жил Тулгар төрийн 2225, Их Монгол Улсын 810, Ардын хувьсгалын 95 жилийн ойн баяр наадам болно. Ямартай ч үндэсний хорооны ээлжит хурал энэ сарын 17-нд болж, баяр наадмын төсвийн төслийг хэлэлцэн Засгийн газрын хуралдаанд танилцуулахаар болсон билээ.

Энэ үеэр баяр наадмын нээлт, хаалтын тоглолтын найруулагчаар Улсын драмын эрдмийн театрын найруулагч Н.Наранбаатар ажиллаж, төрийн хүндэтгэлийн концертыг Үндэсний дуу, бүжгийн эрдмийн чуулгын дарга, найруулагч Г.Цоггэрэл найруулахаар болсон байгаа.

Харин энэ үеэр шадар сайд хэлэхдээ “Баяр наадмын бэлтгэлийг эртнээс сайтар базааж, хурдан морьдын уралдаан, бөхийн барилдаан, сурын тэмцээн нь маргаангүй, урлаг, соёлын арга хэмжээнүүд нь наадамчдын сэтгэлд хүрсэн сайхан наадам болгохыг хичээж ажиллан эртнээс бэлтгэлээ базаах хэрэгтэй” гэж байв.

Гэтэл одоогийн байдлаар наадамд бэлтгэж, наадмын төсвийг ч баталсан зүйл алга. Ер нь баяр наадам болох юм уу болвол ямар наадам болох вэ гэдэг эргэлзээтэй л байна. Сүүлийн саруудад УИХ-ын ээлжит сонгууль, Асемийн уулзалттай холбоотойгоор улстөрчид сайд дарга нар баяр наадмын тухай бодохыг ч хүсэхгүй байх шиг байна. Тэдний хувьд ирэх сонгуульд гайгүй санал авч ирээдүйн 4 жилээ тансагхан өнгөрүүлэх л чухал бололтой. Уг нь өмнөх жилүүдэд өдийд наадмын бэлтгэл ажил эхэлсэн, бараг жигдэрсэн байдаг байлаа. Энэ байдлаар өнөө жилийн наадам ямаршуухан болох вэ.

Н.Чимэг

Cityinfo.mn