Орон нутгийн замд хурдыг 80 км/цагаас хэтрүүлж хөдөлгөөнд оролцсон жолоочийг 50,000 төгрөгөөр торгож хоёр оноо хасдаг бол 120 км/цагаас илүү хурд хэтрүүлж оролцвол 50,000 төгрөгөөр торгож газар дээр нь 6 сараар жолоодох эрхийг хасаж байна гэж ТЦА-аас мэдээллээ.

Иргэдийн аялал зугаалга амралтын өдрүүд үргэлжилж байгаатай холбогдуулан орон нутгийн замын хөдөлгөөн ачаалал ихтэй байна. Зөвхөн энэ 7 хоногт гэхэд орон нутгийн замд зам тээврийн ослоос шалтгаалж 11 хүн нас баржээ. Үүнээс хоёр бага насны хүүхэд амь насаараа хохирч, дөрвөн хүүхэд гэмтжээ. Тээврийн цагдаагийн алба хөдөлгөөний аюулгүй байдлыг хангах, зам тээврийн осол хэргээс урьдчилан сэргийлэх зорилгоор улсын хэмжээнд хяналт шалгалтаа 24 цагаар зохион байгуулан ажиллаж байна.

2019 оны наймдугаар сарын 05-08-ны өдөр Тээврийн цагдаагийн албаны Жижүүрийн шуурхай удирдлагын хэлтэст нийт 1,218 дуудлага иржээ.

Энэ долоо хоногт зам тээврийн ослын улмаас 4 хүүхэд бэртэж, 2 хүүхдийн амь нас хохирсон байна. Гэмтсэн хүүхдүүд эцэг эхийн хамт гарцгүй газраар зам хөндлөн гарч байсан бол нас барсан тав болон найман сартай хоёр хүүхэд зорчигч хэлбэрээр хөдөлгөөнд оролцож байжээ.

Ноцтой зам тээврийн ослоос дурьдвал:

  • 2019.08.05-ны өдрийн 13:10 цагийн орчим Завхан аймгийн Их-Уул сумын Үржил 2-р баг “Гүнжийн хясаа” гэх газар /Сумын төвөөс баруун тийш 12км/ асфальтан замд Toyota Camry Л жолоочтой автомашин онхолдож жолооч 39настай, эрэгтэй Л нас барсан.
  • 2019.08.05-ны өдрийн 21:35 цагийн орчим Сүхбаатар аймгийн Түвшинширээ сумын 5-р багийн “Өгөөмөр” гэх газар /Сумын төвд/ шороон замд амины Kia Frontier автомашины жолооч Б нь Даюун маркийн улсын дугааргүй мотоциклтой мөргөлдөж жолооч 61настай, эрэгтэй Ж нас барсан.
  • 2019.08.05-ны өдрийн 14:30 цагийн орчим Булган аймгийн Рашаант сумын 4-р баг “Бөргөцөгийн ар” гэх газар /Аймгийн төвөөс урагшаа 230 км/ асфальтан замд Toyota Prius автомашины жолооч Ц нь Toyota Harrier Б жолоочтой автомашинтай мөргөлдөж жолооч 57 настай, эмэгтэй Ц, зорчигч 69 настай, эрэгтэй Т, 47 настай, эмэгтэй Ө нарын 3 хүн нас барж, жолооч Б, зорчигч Ч нарын 2 хүн гэмтсэн.
  • 2019.08.05-ны өдрийн 23:29 цагийн орчимд СБД-н 15 дугаар хороо “Сод Монгол” ШТС-ын хойд замд Toyota Prius маркийн автомашины жолооч Х нь явган зорчигч 48 настай, эрэгтэй М-г мөргөж амь насыг нь хохироосон.
  • 2019.08.06-ны 14:00 цагийн орчимд Төв аймгийн Баян-Өнжүүл сумын Бараат 1-р баг “Далайн гол” гэх газар /сумын төвөөс зүүн урагш 119км/ асфальтан замд Toyota Prius автомашины жолооч Б нь Toyota Corolla Axio Э жолоочтой автомашинтай мөргөлдөж, зорчигч 41 настай, эрэгтэй Г, 53 настай, эрэгтэй Г, 27 настай, эмэгтэй Э, 0.5 сартай, эмэгтэй У нарын 4 хүн нас барсан.
  • 2019.08.06-ны 21:17 цагийн орчимд СХД-н 11 дүгээр хороо Баянхошууны зам, Хонхорын гудамж амины Hyundai Grace С жолоочтой автомашин өнхөрч, явган зорчигч 52 настай, эрэгтэй М-г мөргөж амь нас хохирсон.
  • 2019.08.06-ны 23:03 цагийн орчимд СХД-н 22 дугаар хороо Найрамдлын зам, Орбитын шинэ эцсийн автобусны буудлын урд замд Hyundai Aero City автобусны жолооч Г нь явган зорчигч 55 настай, эмэгтэй Т-г мөргөж амь насыг нь хохироосон.
  • 2019.08.08-ны өдрийн 18:50 цагийн орчим Хөвсгөл аймгийн Галт сумын Рашаант 3-р багийн “Хуурайн ам” гэх газар /Сумын төвөөс урагшаа 4 км/ шороон замд Toyota Land Cruiser-200 З жолоочтой автомашин нь онхолдож зорчигч 28 настай, эмэгтэй, Ш, 0.8сартай, эрэгтэй/ Х нарын 2 хүн нас барсан хэргийг Хөвсгөл аймгийн Цагдаагийн газар шалгаж байна.
  • 2019.08.08-ны өдрийн 21:30 цагийн орчим БЗД-н 6 дугаар хороо Манлайбаатар Дамдинсүрэнгийн гудамж, “Намнаач” төвийн хойд замд Toyota Prius автомашины жолооч Э нь явган зорчигч 62 настай, эмэгтэй Э-г мөргөж амь насыг нь хохироосон.

Зам тээврийн ослын улмаас гэмтэж бэртсэн хүмүүсийн 8 нь архи согтууруулах ундааны зүйл хэрэглэсэн үедээ замын хөдөлгөөнд оролцсоны 3 нь жолооч, 5 нь явган зорчигч байсан байна.

Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 149 жолоочийг илрүүлэн эрхгүй үедээ согтуугаар тээврийн хэрэгсэл жолоодсон 21 хүнийг шүүхээр баривчилж хуулийн дагуу хариуцлага тооцжээ.

Энэ 7 хоногт бүртгэгдсэн зам тээврийн осол, хэргийг өмнөх 7 хоногийн нөхцөл байдалтай харьцуулахад нийт дуудлага мэдээлэл 26.2 хувиар, зам тээврийн ослын шинжтэй дуудлага 20.7 хувиар, гэмтсэн хүний тоо 13.6 хувиар, зам тээврийн ослын улмаас нас барсан хүний тоо 4 дахин өссөн байна.

Хүүхдүүд эцэг, эхтэйгээ хамт зорчиж байхдаа хамгийн аюулгүй гэж боддог ч тэдний буруу үйлдлээс болж амь нас, эрүүл мэндээрээ хохирох нь ихсэж байна.

Иймд эцэг, эх та бүхэн хүүхдэдээ тавих хараа хяналтаа сайжруулахыг тээврийн цагдаагийн албанаас анхааруулж байна.