Монголын загвар өмсөгч Б.Билгүүтэй өдгөө Тайландын загварын ертөнцөд цахиур хагалж байгаа гэнэ.Тэрбээр хамгийн сүүлд Тайландын үүрэн гар утасны хамгийн том оператор компанийн нүүр царай болжээ. Б.Билгүүтэй 60 гаруй моделиос шалгарч “True” корпорацийн удахгүй худалдаанд гаргах гэж байгаа  “Samsung Galaxy S5” гар утасны телевизийн сурталчилгаанд тоглосон аж. Түүнтэй хамт уг рекламанд Хятад болон Тайландын шилдэг загвар өмсөгч бүсгүйчүүд оролцон тогложээ.

 

“True” компани Тайландын хамгийн олон хэрэглэгчтэй гар утасны оператор бөгөөд монгол залууг нүүр царайгаа болгосон энэ сурталчилгаа ирэх тавдугаар сарын сүүлчээр олон нийтийн хүртээл болох аж. Өмнө нь Б.Билгүүтэй Хятадын загвар өмсөгчдийн хамт “Миранда” ундааны сурталчилгаанд тоглоод амжжээ.

 

Мөн Б.Билгүүтэй олон улсын шилдэг эрэгтэй загвар өмсөгч шалгаруулах “Manhunt international 2012” тэмцээнд эх орноо төлөөлөн оролцож, шилдгээр шалгарч байсан билээ.Загвар өмсөгч Б.Билгүүтэй өнгөрсөн хавар Бангкокийн их сургуулийг вэб дизайнераар суралцаж төгссөн бөгөөд сурч байх хугацаандаа тэндхийн загварын мэргэжилтнүүдийн хараанд өртөж, томоохон агентлагуудад гэрээгээр загвар өмсөх болсон гэнэ.

 

 

 Дашрамт дуулгахад: Загвар өмсөгч Б.Билгүүтэйөнгөрсөн оны сүүлчээр Тайландын алдарт дуучин Намчагийн “Би чамайг нүцгэлмаар байна” дууны клипэнд ч тоглоод амжсан.