Ирэх 11 дүгээр сарын 1-ний өдрөөс УБТЗ ХНН орон нутгийн болон олон улсын зорчигч тээврийн галт тэргээр зорчих тарифыг 50 хувиар нэмж байна. Мөн тээвэрлэлтийн үнэ нэмэгджээ.

“Улаанбаатар төмөр зам” ХНН-ээс албан бичгээр ирүүлсэн зарим ачаа тээврийн бүлэг болон зорчигч тээврийн үнэ, тарифыг индексжүүлэх талаар “Зөвшөөрөл хүсэх” тухай хүсэлтийг Шударга өрсөлдөөн, хэрэглэгчийн төлөө газар авч хэлэлцлээ. ШӨХТГ-аас судалгааг хийхдээ үнэ тарифын индексжүүлэлт хийх тээврийн бүлгүүдийн хувьд Зам, тээврийн хөгжлийн яам, Сангийн яам, Уул уурхай, хүнд үйлдвэрийн яамнаас холбогдох санал авч хийж гүйцэтгэсэн байна.

Хүнс, барилгын материал, шатахуун зэрэг нийгмийн чанартай ачаа тээврийн үнэд өөрчлөлт оруулахгүй хэвээр үлдээж экспортын ачаа тээврийн бүлгийн болон зорчигч тээвэрлэлтийн үнэ тарифыг тодорхой хувиар индексжүүлэхээр боллоо.

Хуралдаанаар

• экспортын зэс, цайрын баяжмалын тээвэрлэлтийн үнэ тарифыг 20%
• экспортын төмрийн хүдрийн тээвэрлэлтийн үнэ тарифыг 15%
• экспортын жонш тээвэрлэлтийн үнэ тарифыг 15%
• экспортын нүүрсний тээвэрлэлтийн үнэ тарифыг 20%
• мөн зорчигч тээвэрлэлтийн хувьд орон нутгийн болон олон улсын зорчигч тээвэрлэлтийн үнэ тарифыг тус бүр 50%-иар индексжүүлэхийг дэмжив.

Тус шийдвэр 11 дүгээр сарын 1-ний өдрөөс хэрэгжиж эхэлнэ.

Зорчигч тээврийн тарифын хувьд 2017 оноос хойш индексжүүлэлт хийгээгүй бөгөөд одоогийн мөрдөгдөж буй тарифаар орон нутгийн зорчигч тээврийн хувьд нийтийн вагон УБ-Дархан чиглэлд 6000 төгрөг байдаг бол уг чиглэл дэх том оврын автобус 20600, суудлын тэрэг (такси) 31000 төгрөгийн үнэ тарифтай байна.

Хуралдаанаас гаргасан шийдвэрийн дагуу үнэ тарифын индексжүүлэлт хийснээр дээрх чиглэлд иргэдэд үйлчлэх үнэ тариф 9000 төгрөг болох юм.