Ургах нарах хороолол өвөл ийм байсан юм

 

“UB TOWN”-НЫ БОХИРЫН ШУГАМЫГ “БООРЧИ” КОМПАНИАС УСУГ ХҮЛЭЭЖ АВААГҮЙ ГЭВ

Хан-Уул дүүргийн 15 дугаар хорооны нутаг “UB Town”, “Wizard” хотхоны оршин суугчид бохир дундаа өвөлжсөн билээ. Оршин суугчид “Зайсанд тохилог орчинд амьдрахаар орон сууц сонготол бохир дундаа, өмхий орчинд өдөр хоногийг өнгөрөөж байна” гэж ярьсан. Үнэхээр ч тэр хавиар байнга эвгүй үнэр үнэртдэг болсон. Жилийн өмнө “UB Town” хотхоны бохирын шугам эвдэрч, бохир нь хальснаас хойш өвөлд нь мөсийг нь ачиж, дулааны улиралд оршин суугчид шавар шавхайтай хутгалдсаар байгаа. Өнгөрсөн хавар нийслэлээс 15 сая төгрөг гаргаж бохирын дөрвөн ширхэг өргөх станц сольсон. Дараа нь мөс цэвэрлэх, бохир соруулах зэрэгт Хан-Уул дүүргээс нэмж таван сая төгрөг гаргасан. Гэвч өнөөг хүртэл бохирын шугам бүрэн засагдаагүй. Хэзээ дахин бохир хальж өмнөх шавар шавхай дээр нэмэхийг албаныхан хэлж мэдэхгүй байна. Ингэж оршин суугчид эрүүл, аюулгүй орчинд амьдрах эрхээ зөрчүүлэн хотын төвд бохиртой хутгалдан амьдарч байгаа нь тэр хавьд шугам хоолой тавьсан компанийн хариуцлагагүй үйл ажиллагаанаас үүдэлтэй аж. Тодруулбал, Хан-Уул, Баянгол дүүргүүдийн нутаг дэвсгэрт байрладаг Баруун урд үйлдвэрийн районы бохир ус цуглуулах шугам (бохир усны 24 дүгээр коллектор)-ыг Нийслэлийн барилга, хот байгуулалт, төлөвлөлтийн газрын захиалгаар “Боорчи” компани 2008 оны аравдугаар сарын 28-наас 2009 оны дөрөвдүгээр сарын 2-ны өдрийн хооронд хийж гүйцэтгэжээ. Уг ажлыг 912 сая төгрөгөөр гүйцэтгэхээр гэрээ байгуулжээ. Гэвч “Боорчи” компани “Мон-Кузбасс” компанийн боловсруулсан зураг төслийг дур мэдэн өөрчлөн техникийн горим зөрчин хуванцар хоолой тавьж, шороогоор булсан байжээ. Хуванцар хоолой нь задарч, бохир нь хальсны дараа оршин суугчдын гомдлоор Мэргэжлийн хяналтын ерөнхий газар шалгалт хийж дээрх зөрчлийг илрүүлжээ. Улмаар Нийслэлийн захирагчийн ажлын албанаас бохир усны 24 дүгээр коллекторын ажлыг гүйцэтгэсэн “Боорчи” компани болон хүлээж авсан төрийн байгууллагуудад хариуцлага хүлээлгэхээр болжээ. Гэтэл уг шугамыг Ус суваг угсралтын газар (УСУГ) хүлээж аваагүй гэдэг асуудал үүссэн байна. УСУГ-аас бохир усны 24 дүгээр коллекторын асуудлаар 2009 оны гуравдугаар сарын 30-ны өдрөөс эхлэн Нийслэлийн хөрөнгө оруулалтын газарт тав, холбогдох төрийн байгууллага, албан тушаалтнуудад 16 удаа албан бичгээр ханджээ. Өөрөөр хэлбэл, техникийн горим зөрчин хуванцраар хийсэн шугамаа өөрчилж, албан ёсоор хүлээж авахыг удаа дараа шаардсан байна. Мөн уг шугамыг УСУГ хүлээж аваагүй учраас засвар үйлчилгээг нь хариуцахгүй гэдгээ удаа дараа мэдэгджээ. Уг нь УСУГ бохирын шугамыг хүлээж аваагүй бол Улсын комисс дүгнэлт гаргах учиргүй. Гэтэл “Боорчи” компанийн гүйцэтгэсэн ажлыг Улсын комисс хүлээж авсан асуудал гарсан байна. Энэ талаар УСУГ-ын горимын инженер Х.Чимгээгээс тодрууллаа.

 

 “UB town” хотхоны хүүхдүүд бохирын хөлдсөн мөсөн дээр тоглож өвөлжсөн

 

 -Бохир усны 24 дүгээр коллектор эвдэрч “UB town” хотхон орчмын оршин суугчид агаар, хөрс нь бохирдсон орчинд амьдраад удаж байна. Үүнд танайхаас ямар арга хэмжээ авдаг вэ?

-УСУГ хариуцлага хүлээхгүй. Учир нь Бохир усны 24 дүгээр коллекторыг манай байгууллага анхнаасаа хүлээж аваагүй. Энэ тухайгаа 2009 оноос хойш холбогдох байгууллагуудад удаа дараа албан бичгээр мэдэгдсэн. Гэтэл ашиглалтад хүлээж аваагүй шугамыг хэрэглэгчид дур мэдэн холбож, өнөөх шугам нь ачааллаа даахгүй задарсан асуудал гардаг.

-Ямар учраас танайх ашиглалтад хүлээж аваагүй юм бэ?

-Анхнаасаа ашиглалтын шаардлага хангахгүй материал ашиглан ажлаа гүйцэтгэсэн юм билээ. Хуванцар материалаар шугам татсан учраас хүлээж аваагүй.

-УСУГ ашиглалтад хүлээж авахгүй гэж байхад Улсын комисс дүгнэлт гаргах ёсгүй биз дээ?

-Манай байгууллагаас гарын үсэг зураагүй. Гэтэл Улсын комисс хүлээж авсан баримт дээр УСУГ-ын инженерүүдийн гарын үсэг зурагдсан асуудал гарсан. Манайхны өмнөөс гарын үсэг зурсан гэх асуудал ч яригдаж байгаа.

-Цаашид тэр хавийн бохирын шугамыг яах вэ?

-Хөрөнгө оруулалтын газраас “Боорчи” компанид хийсэн бохирын шугамаа засах үүрэг өгсөн юм билээ. Тус компанийн барьцаа хөрөнгө болох шугамын ажил хийж гүйцэтгэсэн хөрөнгийн таван хувь байгаа гэсэн. Үүгээрээ шугамаа зас гэсэн үүрэг өгсөн ч өнөөдрийг хүртэл засвар хийгдээгүй байгаа бололтой гэв.

Мэргэжлийн хяналтын газрын шалгалтаар Бохирын 24 дүгээр коллекторын 43 дугаар худгаас баруун тийш шугам бөглөрч, бохир усаар худгууд дүүрч хальсан гэдэг дүгнэлт гарчээ. Зураг төсөлд 78 худаг барих ёстой байхад ачаалал ихэдсэн гэдэг шалтгаанаар худгийн тоог нэмж 94 болгосон байна. Гэвч тэдгээр худгуудын 47-д нь лаг сууж, хог их тогтсон, 19 нь таггүйгээс хогонд бөглөрсөн, 26 нь шороонд дарагдаж мэдэгдэхээ больсон байна. Анхнаасаа хуванцар хоолойгоор шугам барьсан дээр нь худгууд үүргээ гүйцэтгэхгүйгээр бөглөрсөн, шороонд дарагдсан байхад Бохирын 24 дүгээр коллекторт 38 хэрэглэгч холбогдсон байдаг аж. Тэдгээрийн 29 нь дур мэдэн, зөвшөөрөлгүйгээр холбогдсон байдалтай байгаа гэнэ.

Бохир усны шугам бөглөрч, бохир нь хальсаар байхад гэмтлийн шалтгааныг тогтоож, шугам хоолойг засаагүй нь Барилгын тухай хуулийн ”Барилга байгууламжийн чанарын баталгаат хугацаа дуусаагүй байхад өөрийнх нь буруутай үйл ажиллагаанаас үүссэн чанарын зөрчлийг өөрийн зардлаар арилгах” гэсэн заалтыг зөрчиж байгааг Мэргэжлийн хяналтын газар дүгнэлтдээ онцолжээ. Боорчи компани хийсэн ажлынхаа баталгаат хугацааг дуусгаж, холбогдох байгууллагуудад хүлээлгэж өгөөгүй аж. Тиймээс засварыг бүрэн хариуцахаас өөр аргагүй юм байна. Зайсан орчмын буюу “UB town”-ы оршин суугчид бохир орчинд амьдарч байгаа нь “Боорчи” компанитай шууд холбоотой нь шалгалтаар ил болсон нь энэ аж.

 

БОХИР НЬ ХАЛЬДАГ “УРГАХ НАРАН” ХОРООЛЛЫН ШУГАМЫГ Ч “БООРЧИ” ГҮЙЦЭТГЭЖЭЭ

Баянзүрх дүүргийн нутаг “Ургах наран” хорооллын оршин суугчид ч бохирын усан дунд амьдарч байгаа талаар гомдоллодог. Уг хорооллын ойр хавь буюу Ногоон зоорь орчмын орон сууцны хорооллын бохир усны гадна шугам сүлжээний ажлыг “Боорчи” компани  2008 онд гүйцэтгэжээ. Нэг тэрбум арван хоёр сая төгрөгийн төсөвтэй уг ажлыг улсын комисс хүлээж аваагүй аж. Улсын комисс хүлээж аваагүй учраас ашиглалтын байдлыг “Боорчи” компани хариуцдаг аж. Гэтэл тус компани худагнуудад таг хийх, шугам хоолойд орсон усыг зайлуулах, лаг цэвэрлэх, угаалга хийх зэрэг ажлуудыг хийгээгүйгээс удаа дараа бохир алдагдсан байна.

 

“БООРЧИ” КОМПАНИ ХАР ЖАГСААЛТАД ОРЖЭЭ

Иргэдийн эрүүл, аюулгүй орчинд амьдрах эрхийг зөрчиж байгаа “Боорчи” компанийг нийслэлийн удирдлагууд хар жагсаалтад оруулж цаашид хамтран ажиллахгүй гэдгээ мэдэгджээ. Нийслэлд ажил гүйцэтгэх эрхгүй болсон тус компани орон нутагт тендер авахаар ажиллаж байгаа талаар холбогдох албаныхан мэдэгдсэн.

“Боорчи” компани анх 1995 онд зургаан ажилчинтайгаар Улаанбаатар хотод барилга, сантехник угсралтын чиглэлээр үйл ажиллагаа явуулахаар үүсгэн байгуулагдаж байжээ. Тус компани нь бохирын шугам сүлжээний ажил гүйцэтгэхээс гадна Сүхбаатар дүүргийн II хорооны нутагт Авто угаалга ажиллуулдаг юм байна. Мөн Төмөр бетон эдлэлийн үйлдвэртэй аж.

Ц.ӨРНӨХ