Монгол улсад барилгын салбар үүсч хөгжсөний 88 жилийн ойн баярыг тохиолдуулан зохион байгуулагдаж буй томоохон үйл ажиллагааны нэг “БАРИЛГА ОРОН СУУЦ-2014” үзэсгэлэн яармаг  уламжлал ёсоор 9-р сарын 5-7-ны өдрүүдэд “Мишээл экспо” төвд болно.

Улс орны хөгжлийг тодорхойлогч барилгын салбарт шинэ дэвшилтэт технологи нэвтрүүлэх, салбарын өнөөгийн хөгжлийг олон нийтэд сурталчлан таниулах зорилготой “БАРИЛГА ОРОН СУУЦ” үзэсгэлэн яармаг 7 дахь жилдээ болж буй юм.

Үзэсгэлэн яармагт Улаанбаатар хотод орон сууц, барилга барьж байгаа компаниуд, гадаад, дотоодын барилгын материалын үйлдвэрлэгчид, машин механизм, тоног төхөөрөмж нийлүүлэгчид, ландшафт, интерьер дизайны зэрэг 120 гаруй аж ахуйн нэгж компаниуд оролцох төдийгүй ипотекийн зээл олгож байгаа арилжааны банкууд үйл ажиллагаагаа явуулах юм.  Мөн барилгын салбарт шинээр нэвтэрч байгаа орчин үеийн дэвшилтэт техник технологи, барилгын материал, тоног төхөөрөмж болон эрчим хүчний хэмнэлттэй барилга, хаусны шийдлийг дэлгэн үзүүлэх болно.

Зөвхөн үзэсгэлэнгийн өдрүүдэд зориулж "Саруул", "Нарны Хороолол", “X Apartment", "Хүннү 2222", "Хангай”, "Шинэ Налайх", "Комфорт Апартмент" зэрэг 60 гаруй стандарт болон тансаг зэрэглэлийн хотхон,  хороолол,  орон сууцнууд оролцож барилгачдын баярыг тохиолдуулан хямдрал, урамшуулал зарлаж байна.

Үзэсгэлэн яармагийн ерөнхий зохион байгуулагчаар “Барилга.МН”, “Барилгын зөвлөгөө мэдээллийн төв”, хамтран зохион байгуулагчаар БХБЯ, Барилгын хөгжлийн үндэсний нэгдсэн төв ажиллаж байгаа бол ерөнхий ивээн  тэтгэгчээр “Империал Кастел”  ХХК оролцож байна.

“Барилга-Орон сууц” үзэсгэлэнгийн нээлтийн ажиллагаа 9-р сарын 5-ны өдөр буюу ирэх баасан гарагийн 11:00 цагт болох бөгөөд 9-р сарын 5-7-ны өдрүүдэд 10:00-17:30 цагт ажиллана.