Ардчилсан намын гишүүд дэмжигчдийн холбооноос Эрүүл мэнд, спортын яамны талаар мэдээлэл хийлээ.

Тус холбооны тэргүүн Т.Хасбаатар "Эрүүл мэнд, спорт яамны сайд Г.Шийлэгдамба болон төрийн нарийн бичгийн дарга хууль хяналтын байгууллагад шалгагдаж байна. Энэ салбар нь өнөөдөр удирдлагагүй байна. Эрүүл мэндийн салбар нь Монголын улсын чухал салбар. Гэтэл энэ салбарыг улстөрийн наймаа төдийгөөр авч үзэж болохгүй гэж үзэж байгаа юм. Ингэж явсаар улс орны асуудал хүндэрч байна. Энэ хүндрэл нь Эрүүл мэндийн салбарт илэрч байна. Цаашдаа зөвхөн албан тушаал наймаалцах хэлбэрээр явбал энэ асуудал улам хүндэрнэ" хэмээн онцоллоо.

Тэрбээр “Монгол хүн 2020” хөтөлбөр дунд Эрүүл чийрэг Монгол хүн хөтөлбөр бий. Энэ хөтөлбөрийн хүрээнд томоохон салбарыг авч яваа хүчинд байх ёстой гэж үзэж байна. Тиймээс энэ том салбарыг АН-ын хүн удирдаж, ажил үүргээ ард түмэндээ тайлагнах ёстой гэж үзэж байна. Энэ талаар сүүлийн үед МАХН-ын хүмүүс удаа дараа мэдэгдэл хийлээ. МАХН-аас энэ салбарыг 2-3 жил авч яваа гэтэл өнөөдөр эрүүл мэндийн салбарын бүх доголдлыг уг нам хүлээж, хариуцлага тооцох ёстой. Гэвч хэн хариуцлага үүрэх вэ гэдэг нь тодорхой бус байгаа юм.

Эрүүл мэндийн салбарын хариуцлагыг ямар шатанд хүргэсэн бэ, ард түмний өмнө хэн хариуцлага үүрэх ёстой вэ гэж МАХН-ын дарга Н.Энхбаярыг халз мэтгэлцээнд урьж байна. Аль телевизээр халз мэтгэлцээн хийхээ сонгох эрхийг өгье. Энэ мэтгэлзээнийг арваннэгдүгээр сарын 25-наас өмнө товыг тогтоохыг санууллаа. Эрүүл мэндийн салбарыг аврах нөөц бололцоо АН-д хангалттай бий гэв.

Мөн Тус холбооны удирдах зөвлөлийн гишүүн А.Цэнгэлсайхан "Монгол Улсын эрүүл мэндийн салбараар МАХН-ын дарга Н.Энхбаяр, МАХН-ын ерөнхий нарийн бичгийн дарга Г.Шийлэгдамба нар тоглож, самарч хаялаа. Н.Энхбаяр авилгал хээл хахуулийн хэргээр ял авсан. Одоо Г.Шийлэгдамба албан тушаалаа урвуулан ашигласан хэргээр шалгагдаж байна. Ийм хүмүүс энэ салбарыг хариуцаж авч явна гэдэг бол ёс зүйгүй асуудал гэж Ардчилсан намын гишүүд дэмжигчдийн холбоо үзэж байна. 2008-2012 онд энэ салбарт хийсэн хөрөнгө оруулалтыг өнгөрсөн гурван жилийн хугацаатай харьцуулахад эрс буурсан" гэлээ.

 

Х.Даваа