Дархан-Уул аймгийн Төмөрлөгийн үйлдвэрийн ажилчин амиа алдсан хэрэг гарчээ. Тодруулбал, тус үйлдвэрийн албан тушаалтнууд өнгөрсөн долоо хоногийн лхагва гарагийн орой хамт архи ууж байгаад нэгнийхээ аминд хүрсэн байна. Энэ талаар цагдаагийн газраас тодруулахад “Энэ хэргийг шалгаж байгаа. Мөрдөн байцаалтын ажил явагдаж байна. Санамсар, болгоомжгүйгээс хүний аминд хүрсэн” гэжээ. Талийгаач залуу Б нь 33 настай бөгөөд тус үйлдвэрт Үйлдвэрийн шугам, сүлжээний хэлтсийн даргын албыг хашдаг байжээ. Хэргийн талаар Дарханы төмөрлөгийн үйлдвэрийн Хуулийн хэлтсийн дарга н.Цогтбаатар “Хоорондоо нөхөрлөдөг найзууд ажил тараад нэг газар сууцгаасан юм билээ. Энэ үеэр маргалдаж байгаад нэгнийхээ аминд санамсаргүй байдлаар хүрсэн золгүй явдал гарсан. Хуулийнхан энэ хэргийг шалгаж байгаа. Энэ хэрэгтэй холбогдуулан манай ажилтныг цагдан хорьсон. Тэд юунаас болж, маргалдсан гэдгийг хуулийнхан тогтоох байх” гэжээ.

Эх сурвалжийн мэдээлж байгаагаар хамт архи ууж байсан ажилчид хоорондоо маргалдан, улмаар талийгаачийг цохих үед хурц ирмэгтэй зүйл мөргөн алма алдсан гэх мэдээлэл байна.

Н.Чимэг