2016.09.11-ны өдөр таван сартай жирэмсэн Н.Б гэх 35 настай бүсгүй нас барсан. Түүний үхлийн талаар хэн юу ярьсан талаар манай сурвалжлах баг ажиллаа.

 

ЦЕГ-ын Хэвлэл, мэдээллийн төв: 2016 оны 09-р сарын 08-нд БГД ... тоотод суух Н.Б /эм.35н/ нь толгойдоо гэмтэл авч Гэмтэл согог судлалын үндэсний төвийн “Эрчимт эмчилгээний тасаг”-т хүргэгдэн хэвтэн эмчлэгдэж байгаад 09-р сарын 11-ний өдөр нас барсан. Энэ хэрэгт түүний нөхөр Н.Б /эр.35н/-ыг холбогдуулан шалгаж байгаа. Хэргийг Баянгол дүүргийн цагдаагийн 1-р хэлтэс шалгаж байгаа гэв.

 

Баянгол дүүргийн 14-р хороо: Бид дээд албан тушаалтны зөвшөөрөлтэйгөөр мэдээлэл өгнө. Хувь хүний нууцийн асуудал тул хамаагүй мэдээлэл өгөх эрхгүй. Хуулийн хариуцлага хүлээдэг гэв.

Гэхдээ хорооны зүгээс энэ хэрэгт сэжигтнээр шалгагдаж байгаа Н.Б-г архины эмчилгээнд явуулж байсан. Эхнэрээ байнга зоддог, архины хамааралтай гэдгийг мэддэг байсан аж. Тэд энэ талаараа цахим орчинд мөн мэдэгдэж байсан юм.

 

 

Байрны оршин суугч: Талийгаачийн хүүхдүүдийг байнга зоддог байсан

Талийгаач нөхөр, хүүхдүүдийн хамт Баянгол дүүргийн 14-р хороо ..-р байранд амьдардаг байсан. Энэ талаар нэрээ нууцлахыг хүссэн байрны оршин суугчтай ярилцсан юм.

- Та талийгаачийг хэзээнээс мэдэх вэ?

- Талийгаач дөрөв байна уу таван настай байхад энэ байранд нүүж ирсэн. Миний нуруунд үүрүүлээд гүйдэг охин байсан. Ээжийгээ хуулсан юм шиг охин.

- Талийгаачийн нөхөр нь архины хамааралтай, талийгаачийг байнга зоддог байсан гэсэн?

- Байнга зоддог байсныг манай орцныхон бүгд хэлнэ. Нүд нь бүлтэрчихсэн явж байдаг, зодуулснаа нуух гээд хар шил зүүж явдаг байсан. Нөхөртөө зодуулчихлаа гээд надаар толгойгоо бариулах гээд дандаа орж ирдэг байсан. /уйлав/ Сүүлд орж ирэхгүй байсан. Нас барахаасаа өмнө манайд орж ирсэн. Би таниагүй. Таних нүүргүй болтол нь зодчихсон байсан. “Манай нөхөр зодчихлоо. Нөхөр таниар бариулаадах гэж хэлсэн” гэж өөрөө хэлсэн. Би тархийг чинь барьж чадахгүй, аймаар гэмтэлтэй байна гээд орой нь ГССҮТ рүү явуулсан. Эмнэлэгт хоёр хоноод л өнгөрсөн.

- Архи уугаад агсам тавихаар нь цагдаа дуудаж өгдөг байсан уу?

- Цагдаа дуудаад өгөөд нэмэр байхгүй. Цагдаад танилтай тэд нараараа гараад ирдэг. Өнгөрсөн хавар хүчээр архины эмчилгээнд зургаан сар явах байсныг нь тэд нараараа аргалуулаад гурван сар болгуулсан.

- Хүүхдүүдээ зоддог байсан гэсэн?

- Том хүүгийнхээ цусыг ханана гээд гарыг нь огтлоод хаясан. Тухайн үед найзууд нь гэмтэлд хүргэж байсан. Дараа нь отверкаар тархи толгойг нь хагалж байсан.

Талийгаач: Н.Б 35 настай. Эх орондоо гурван хүү, нэг охин төрүүлж, өсгөж байсан Алдарт эх. Айлын ганц охин. Нагац эгчээс нь өөр хамаатан байхгүй.

Сэжигтэн: Н.Б мөн 35 настай. Архины хамааралтай. Өнгөрсөн хавар архины эмчилгээнд явсан. Одоогоор талийгаачийг хөнөөсөн хэргээр саатуулагдаад байгаа.

Одоогоор...

Одоогоор задлан шинжилгээний эцсийн хариу гараагүй байгаа. Задлан шинжилгээний хариугаар талийгаачийн үхлийн шалтгааныг тодруулах болно.

Талийгаачийн хоёр бага хүүхдийг сэжигтний хамаатнууд гэртээ байлгаж байгаа бөгөөд хоёр том нь гэртээ байгаа ажээ. Талийгаачийг өнгөрсөн лхагва гарагт хөдөөлүүлжээ.

Талийгаачийн нөхрийг хүний амь нас санаатайгаар хөнөөсөн хэрэгт сэжигтнээр татан Эрүүгийн хуулийн 91.1-ийг үндэслэн эрүүгийн хэрэг үүсгээд байгаа. Хэрвээ мөрдөн байцаалтын ажиллагаа дуусч түүнийг санаатайгаар эхнэрээ хөнөөсөн гэдгийг шүүхээс тогтоовол 10-15 жилийн хорих ялаар шийтгэх юм.

Хувь хүний нэр төр, алдар хүндтэй холбоотой тул бид талийгаачийн байр, түүний зураг болон хувийн нууцтай нь холбоотой мэдээллийг ил гаргаагүй. Бид энэ хэргийн талаар эргэн мэдээлэх болно.