МЗХ-оос найм дахь жилдээ зохион байгуулж буй "Залуу Хүн-2016” цуврал лекц маргааш Улсын Драмын Эрдмийн театрт эхлэх гэж байна. "Залуу хүн” цуврал лекц нь залууст мэдлэг, мэдээлэл өгсөн, сургамжтай, мөн нийгэмд танигдсан хүмүүсийн амжилтаас хуваалцдаг залуусын дунд нэр хүндтэй лекцүүдийн нэг.

"Залуу Хүн-2016” цуврал лекц анхны зочноор "Глобал Бизнес Нэтворкинг Групп " ХХК-ийн захирал буюу "Lady” төвийн багш гэдгээрээ олноо танигдсан П.Эрдэнэтулга багш уригдсан юм. Тэрээр аз жаргалтай, бат бөх гэр бүлийг хэрхэн цогцлоох тухай буюу " Зөв хандлагын нөлөөлөл” гэсэн сэдвээр лекц уншихаар болжээ.

Энэ жил Монголын Залуучуудын байгууллага үүсч хөгжсөний 95 жилийн ойг тохиолдуулан уг лекцийг онцлог байдлаар эхлүүлж байгаа бөгөөд уг лекцийн нээлтэнд зориулж Уильям Шекспирийн "Ромео Жульета” ганцхан удаа тоглогдох аж. Үүнээс гадна " Залуу хүн” лекцийн нээлтийн тасалбарт Сургалт судалгааны Полиси төвийн хувь хүний манлайллын сургалтанд 70 хувийн хөнгөлөлттэй хамрагдах, Залуучуудын аялал жуулчлалын хөгжлийн төвийн Манжуурын аялалд хосоороо 30 хувийн хөнгөлөлт эдлэх, Тhe Collective манлайллын сургалтанд 30 хувийн хөнгөлөлттэй хамрагдах мөн Хангарьд фитнесс клубээр 25 хөнгөлөлттэй үйлчлүүлэх зэрэг давхар давхар боломжууд байгаа аж.

Харин дараа дараагийн лекцийн зочноор "International Fashion Super Model” тэмцээний "Гранпри” шагналт загвар өмсөгч Э.Энхболд, "Рио”-ийн Олимпийн хүрэл медальт Д.Отгодалай нар уригдсан байна. Уг лекц МЗХ-ны "Залуус” танхимд 7 хоног бүрийн баасан гарагийн 17 цагт үнэ төлбөргүй үргэлжлэх нь.