Өнгөрсөн оны 11 дүгээр сарын 28-ний шөнийн 02 цагийн орчим Улсын их дэлгүүрийн хажууд байрлах “Аригу” гэх бааранд улсын начин Д.Сугаржаргалыг хэсэг нөхдийн хамт сууж байхад нь гаднаас үл таних дөрвөн залуу орж ирсэн байна.

Тэдгээр залуусын нэг нь Улсын начин Д.Сугаржаргалыг архины шилээр толгойн тус газарт нь цохин ухаан алдуулж гэмтээсэн. Үүний дараа хагарсан архины шилээр Д.Сугаржаргалын нүүрийг архины шилээр зэрэмдэглэсэн нь тус баарны хяналтын камерт бичигдэн үлдсэн байдаг.

 Энэ хэргийг өнөөдөр  Чингэлтэй дүүргийн цагдаагийн хэлтэс шалгаж байгаа. Улсын начин Б.Сугаржаргалын биед халдсан хэрэгт иргэн Б-г буруутгаад байгаа. Өмнө нь ял шийтгэл эдэлж байсан иргэн Б-д Эрүүгийн хуулийн 99.1-д зааснаар эрүүгийн хэрэг үүсгэсэн.  Эрүүгийн хуулийн 99.1 Бусдын бие махбодид хөнгөн гэмтэл санаатай учруулах тухай заасан байдаг бөгөөд  гэм буруутайд тооцох юм бол  хөдөлмөрийн хөлсний доод хэмжээг таваас хорь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ гэж заажээ.

Уг нь энэ төрлийн хэрэгт Эрүүгийн хуулийн 181-р зүйл буюу Танхайрах гэсэн үндэслэлээр эрүүгийн хэрэг үүсгэх учиртай. Энэ хэргийг  иргэн Б ганцаараа үйлдээгүй бөгөөд бусадтай бүлэглэн энэ хэргийг үйлдсэн нь хүндрүүлэх нөхцөл юм.  

Б.Сугаржаргалын хувьд тархиндаа гэмтэл авсан, хамран дээрээ хэд хэдэн оёдол тавиулсан байна.

Бид энэ хэрэг хэрхэн шийдвэрлэгдэх талаар эргэн мэдээлэх болно.