Дуучин Б.Амархүү 2018 оны 02-р сарын 09-10-нд шилжих шөнө Сүхбаатар дүүрэг дэх цэнгээний газрын үүдэнд өөрийн менежер Б.Г-ийн хамт хөтлөгч Ц.Чойжилсүрэнг зодож танхайрсан хэрэг гарсан талаар бид өмнө нь мэдээлж байсан. Энэ хэргийн урьдчилсан хэлэлцүүлэг өнөөдөр болох юм.

 

Дуучин Б.Амархүү болон түүний менежер Б.Г нар өс хонзон санаж хөтлөгч Ц.Чойжилсүрэнг зодож дух болон мөрний шөрмөс урагдал үүсэх хэмжээнд бэртээжээ. Энэ үйлдэл нь тухайн цэнгээний газрын хяналтын камерт бичигдэн үлдсэн байдаг. Тиймээс Б.Амархүүд  Эрүүгийн хуулийн 11.4.1 Хүний эрүүл мэндэд хүндэвтэр хохирол санаатай учруулах, Б.Амархүүгийн менежер Б.Г-д Эрүүгийн хуулийн 11.6.1 Хүний эрүүл мэндэд хөнгөн хохирол учруулах  гэх зүйл ангиар яллах дүгнэлт үйлджээ. Энэ хэргийн мөрдөн байцаалт дуусч, хэргийн урьдчилсан хэлэлцүүлэг өнөөдөр Сүхбаатар дүүргийн эрүүгийн хэргийн анхан шатны шүүхэд 15:00 цагаас болох юм.

АМАРХҮҮГИЙН МЕНЕЖЕР Б.Г гэж хэн бэ

Хөтлөгч залууг Б.Амархүүтэй хамт зодсон Б.Г нь өмнө нь хоёр ч удаа ял авч байсан этгээд юм байна. Тодруулбал Дүүргийн эрүүгийн хэргийн анхан шатны 2-р шүүхийн 2015 оны 03-р сарын 18-ны  өдрийн  323 дугаар шийтгэх тогтоолоор Эрүүгийн хуулийн 216.2- лахт хэсэгт зааснаар 1  жил 2 сарын  хугацаагаар хорих ял, Баянгол, Хан-Уул, Сонгино хайрхан дүүргийн эрүүгийн хэргийн анхан шатны шүүхийн 2016 оны 05-р сарын  23-ны өдрийн 523 дугаар шийтгэх тогтоолоор Эрүүгийн хууийн 192.1 дэхь хэсэгт үааснаар  2 жилийн ял сонссон этгээд юм байна.  

Бүлэглэж бусдыг зодсон энэ хэргийн тухай дуучин Б.Амархүү эхэлж цагдаагийн байгууллагад зодууллаа хэмээн өргөдөл өгчээ. Гэвч хэрэг болсон газрын хяналтын камерт замын эсрэг талаас Б.Амархүү болон түүний менежер Б.Г нар үгийн зөрүүгүй хүн зодож байгаа нь бичигдсэн тул түүний өргөдлийн дагуу эрүүгийн хэрэг үүсгээгүй. Харин зодуулсан залуугийн өргөдлөөр эрүүгийн хэрэг үүсгэсэн байна.  Хэрэгт дүүргийн прокурор хяналт тавин ажиллаж байх хугацаанд Прокурорын Ерөнхий газраас хэргийг татаж шалгасан байна. Энэ нь хэрэгт нөлөөлөхийг завдсан байж болзошгүй үйлдэл юм.

Дуучин Б.Амархүү болон Б.Г нарын гэм буруутай эсэхийг хэлэлцэх урьдчилсан хэлэлцүүлэг өнөөдөр 15:00 цагт Сүхбаатар дүүргийн эрүүгийн хэргийн анхан шатны шүүхэд болно.  Хэргийг  тус шүүхийн шүүгч  Д.Ренчинхорол шийдвэрлэх юм.

Хэрвээ шүүхээс Б.Г-г гэм буруутай гэж шүүхээ үзвэл дөрвөн зуун тавин нэгжээс нэг мянга гурван зуун тавин нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ.

Харин дуучин Б.Амархүүг  гэм буруутай гэж үзэх юм бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ.

 

Бид энэ хэргийн талаар эргэж мэдээлэх болно.