Дэлхий нийтийн сүлжээ хоолны газар KFC буюу шарсан тахиан хэрэглээ манай оронд ч нилээдгүй дэлгэрч хүн бүр үйлчлүүлэх болсон. Дэлхийн зарим улсад KFC-гийн шарсан тахиаг химийн аргаар таргалуулсан тул хүний эрүүл мэндэд хортой гэдгийг анхааруулаад байгаа юм. Харин манай оронд л KFC-гийн хоолны газар хөл хөдөлгөөн тасрахгүй байх ажээ. 

Тэгвэл саяхан буюу энэ сарын 9, 10, 11-ны өдөр KFC сүлжээний Зайсан салбараар үйлчлүүлж, "Найзууд" багцыг авч идсэн болон захиалж авсан хүмүүс хордлогонд орсон тухай мэдээлэл гараад байна. 

Энэ талаар ЭМЯ-аас мэдээллэхдээ уг мэдээлэл үндэслэлтэй гэдгийг хэлжээ. Харин ХӨСҮТ-өөс ажлын хэсэг гарч асуудлыг судалхаар явсан гэжээ. 

Үүнтэй холбогдуулан, тухайн өдрүүдэд KFC сүлжээний Зайсан салбараар үйлчлүүлсэн тэр дундаа "Найзууд" багцыг авч идсэн хүмүүст хоолны хордлогын шинж тэмдэг илэрвэл яаралтай эмнэлэгт хандахыг мэргэжлийн байгууллагаас анхааруулж байгаа аж. 

Энэ талаар бид ЭМЯ-наас тодруулахад, "Тийм мэдээлэл байгаа. Дэлгэрэнгүй мэдээллийг ХӨСҮТ-өөс тодруул" гэв. 

Харин ХӨСҮТ-өөс тодруулахад, "Одоогоор мэдээлэл өгөх боломжгүй байна. Манайхаас ажлын хэсэг гараад судлахаар явсан. Маргааш холбогдоорой" гэх хариултыг өгсөн юм.

Бид мэдээллийг тэнцвэртэй хүргэх үүднээс KFC-гээс тодруулах гэсэн боловч мэдээлэл өгөх боломжгүй гээд мэдээлэл өгөхөөс татгалзсан юм.