Сүүлийн жилүүдэд хүмүүсийн цахим хэрэглээ өсөн нэмэгдэхийн хэрээр цахим сүлжээний аюулгүй байдал, кибер гэмт хэргийн асуудал хүрцаар яригдах болсон билээ. Олон нийтийн сүлжээний Facebook компани энэ оны эхний гурван сарын хугацаанд нийт 2,2 тэрбум хуурамч хаягийг устгасан тухай CNN агентлаг мэдээлжээ. “Facebook” компани ирэх оноос эхлэн тайлангаа хэрэглэгчдэд нээлттэй тавьж байхаар болж байгаа юм байна.

Тус сүлжээ өнгөрсөн оны сүүлийн улиралд 1,2 тэрбум хуурамч хаяг устгаж байсантай харьцуулахад огцом нэмэгдсэн үзүүлэлт болжээ. Устгасан хуурамч хаягуудын дийлэнхийг нээснээс нь хойш хэдхэн минутын дараа устгасан бөгөөд тэдгээрийг ихэвчлэн хиймэл оюун ухаан ашиглан нээсэн байсан гэнэ.

Тэдгээр хуурамч хаягуудыг компанийн системд халдахыг завддаг спамерууд түгээмэл ашигладаг ажээ. Үүнээс гадна 2019 оны эхний улиралд бусдыг доромжилсон, зүй бус пост буюу сэтгэгдлүүдийг устгасан байна. Ийм төрлийн нийт 33 сая сэтгэгдлийн 19 сая нь насанд хүрэгчдэд зориулсан байсан бол зургаан сая нь алан хядах үйл ажиллагааг дэмжсэн, дөрвөн сая нь арьсны болон шашны үзэн ядсан үг хэллэгтэй сэтгэгдэл байжээ.