Ковидоор өвдсөн иргэн гэртээ нас барсан харамсалтай тохиолдол гарлаа. Тодруулбал, энэ сарын 3-ны өдөр Баянзүрх дүүргийн 23-р хороонд оршин суух 30 настай эрэгтэй гэртээ амиа алдсан бөгөөд тэрбээр нас барахаасаа хоёр хоногийн өмнө эмийн сангаас түргэвчилсэн шинжилгээний төхөөрөмж худалдан авч үзэхэд, хариу нь эерэг гарсан байжээ.

Нас баралтын шалтгааныг урьдчилсан байдлаар бөөр нь өвддөг байсан учир хууч өвчнөөс шалтгаалсан хэмээн үзэж байгаа аж. Уг хэргийг өдгөө Баянзүрх дүүргийн Цагдаагийн хэлтэст шалгаж байна.

Эрүүл мэндийн сайд С.Энхболдын тушаалаар халдварын батлагдсан тохиолдлын ойрын хавьтлуудаас шинжилгээ авахаа больж, ХӨСҮТ дээр ажиллаж байсан шинжилгээний цэгийг буулгасан. Тийм учраас иргэд сайн дураар өөрт ямар нэг зовиур илрэхэд шинжилгээ өгөх боломж хумигдаад байгаа юм.  Хувийн эмнэлэг лабораториудад PCR шинжилгээний төлбөр 100-150 мянган төгрөг байгаа учир хүн бүр шинжилгээ өгч чадахгүй байгаа нь халдвар авсан ч түүнийгээ мэдэхгүй явсаар хүндрүүлэх, цаашлаад амь насаа алдах шалтгаан болж байна.