Цагдан хорих 461 дүгээр ангид амь насаа алдсан Газрын тосны хэрэг эрхлэх газрын дарга агсан Д.Амарсайханы нас барсан шалтгааныг тодруулахаар Баянгол дүүргийн цагдаагийн хоёрдугаар хэлтсээс эрүүгийн хэрэг үүсгэн шалгаж эхлээд байгаа билээ. Цагдаагийн хэлтсээс эл хэрэгт Эрүүгийн хуулийн 95 дугаар зүйлийн 95.1-д зааснаар буюу Д.Амарсайханыг амь насаа гэнэтийн байдлаар алдахад нөлөөлсөн байж болзошгүй гэх заалтаар эрүүгийн хэрэг үүсгэсэн байна.

Энэ талаар Д.Амарсайхан агсны өмгөөлөгч Р.Пүрэвлхам "Цагдаагийн байгууллага талийгаачийн үхлийн шалтгааныг тодруулах хэргийг амиа хорлосон байж болзошгүй гэх заалтаар хэрэг үүсгэн шалгаж эхэлсэн гэсэн. Энэ заалтад эд хөрөнгө, албан тушаалын болон өөр байдлаар эрхшээлдээ байгаа болон өөр бусад хүмүүстэй харгис хэрцгий харьцсан буюу нэр төр, алдар хүнийг байнга гутаан доромжилсны улмаас хохирогч амиа хорлосон гэж заасан байдаг. Талийгаач Д.Амарсайхан амь насаа хорлоогүй, эмчилгээ хийлгүй удсанаас эрүүл мэнд нь муудаж, амь насаа алдсан хүн шүү дээ. Ар гэрийнхэн болон өмгөөлөгчийн зүгээс хэрэг үүсгэсэн заалтыг эсэргүүцэж байгаа. Бид маш их гайхаж байна" гэсэн юм.

Талийгаач Д.Амарсайханы өмгөөлөгч Р.Пүрэвлхам нь түүнийг анх цагдан хоригдсон 2013 оны 12 дугаар сарын 18-ны өдрөөс эхлэн  прокурор, шүүх, мөрдөн байцаах газар, авлигатай тэмцэх газрын бүх албан тушаалтнуудад эмчилгээг хийлгэх хүсэлт гаргаж байжээ. Хамгийн сүүлд өнгөрөгч сарын 16-ны өдөр буюу цагдан хоригдсон өдрөөс эхлэн хүсэлтээ гаргасан аж. Дүүргийн эрүүгийн анхан шатны нэгдүгээр шүүхийн ерөнхий шүүгчийн захирамжинд гомдол гаргасантай холбоотой баримт өгчээ. Мөн цагдан хорих 461 дүгээр ангид хоригдсон үеэс эхлэн хоёр удаа хүсэлт гаргасан, нэг удаа хэвтэн эмчлүүлэх хүсэлт гаргаж байсан удаатай аж. Гэвч түүний эл хүсэлтүүдийг хүлээн авааагүй байдаг.

Талийгаач нь элэг цөс болон нойр булчирхайн архаг үрэвсэлтэй байсан. Эмнэлэгт хэвтэн эмчлүүлэх хүсэлт гаргасан ч  ямар ч хариу өгөөгүй. Түүнчлэн нарийн мэргэжлийн эмчид үзүүлэх  хүсэлт гаргасан. Эмчлэгч эмч н.Отгонбаатар энэ сарын 9-ний өдөр "Миний хяналтанд байгаа" гэсэн мэдээллийг ар гэрийнхэнд нь болон өмгөөлөгчид нь өгч байжээ.

Х.Даваа