Үндсэн хуулинд нэмэлт, өөрчлөлт оруулах гэж буйг эсэргүүцсэн УИХ-ын гишүүн асан Г.Уянга, судлаач Д.Ганхуяг нарын иргэд хэвлэлийн бага хийлээ.

Энэ үеэр УИХ-ын гишүүн асан Г.Уянга: "Үндсэн хууль бол Монголчуудын суурь нийгмийн гэрээ. Үүнийг анх Монгол улсын төлөөлөл болсон 400 гаруй хүн хэлэлцэж баталсан. Харин Үндсэн хуулийн нэмэлт, өөрчлөлтүүд нь дандаа нэг намын ноёрхлын үед батлагдсан. Өөрөөр хэлбэл бүгдээрээ хэлэлцэж баталсан нийгмийн гэрээг нэг л нам өөрчилж буй нь зарчмын хувьд буруу. МАН бол нийгмийн олон субьектийн нэг." гэсэн бол

судлаач Д.Ганхуяг: " Монголын ард түмэн эрх баригчдын тоглоом, тохуу. Байсхийгээд л хүчиндүүлдэг тэнэг ард түмэн болчихож. 1990 оноос хойш сонгууль болгоноор сонгуулийн хуулийг өөрчилж байсан.

Одоо 2,5 жил тутамд Үндсэн хуулиндаа халддаг болох нь. Энэ бол улс төрийн гэмт хэрэг, Монгол улс сөнөхийн цондон.

Сөрөг хүчин байхгүй шахам энэ нөхцөлд эрх баригчид Монголын ард түмнийг яаж л бол яаж дээрэлхэж болно гэдгийг харуулж байна. Би саяхны үйл явдлыг дахин сануулья. 2014 оноос Г.Занданшатар "Зөвлөлдөх ардчиллын онол" гэж хог новш шиг юмыг оруулж ирсэн. Энэ нь үнэндээ онол ч биш. Барууны нэг эрдэмтний зүгээр санал төдий зүйлийг Монголд авчраад, Үндсэн Хууль өөрчлөхөд ашигласан.

Бид 3 жилийн өмнө энэ Үндсэн Хуулийн өөрчлөлт буруу гэдгийг хэлэхээрээ нэг болсон.  2 жил хагасын өмнө л мундаг өөрчлөлт хийлээ гээд сурталчилаад байсан биз дээ? Одоо юу нь болохоо болиод дахиад өөрчлөх зүйл яриад унав? Яагаад гэвэл эрх баригчид төр, засгаа удирдаж чадахаа байсан учраас Үндсэн хуулинд халдаж байгаа юм. Энэ бол улс төрийн гэмт хэрэг: Үндсэн хуулийн нэмэлт, өөрчлөлтийг УИХ-ын 63 гишүүн дэмжиж, баталсан. Тэр гишүүд дахиж үг дуугарах эрхгүй." гэв.

О.Чулуут