Нямсүрэнгийн  Төмөрхуяг хэмээх 14 настай хурдан морь унаач хүү энэ сарын 11-ны өдөр  Ховд аймгийн  Дуут сумын наадмаар даага унажээ.  Харамсалтай нь  гараанаас гараад 200 м орчим явж байхад нь хэсэг залуус дайрч унагсан байна. Ухаан алдсан хүүг  яаралтай сумын эмнэлэгт хүргэсэн ч аймгийн эмнэлэгт хүргэх шаардлагатай болсон байх юм. Улмаар аймгийн эмнэлэгт  хүргэх гэтэл сумын түргэний тэрэг шатахуунгүй,  танай хүүхэд баашилж байна,  энэ байтугай унасан хүүхдүүд зүгээр байдаг хэмээн загнаж, хугацаа алдсаар маргааш нь үдээс хойш аймгийн эмнэлэгт хүргэсэн байна .

Ингээд 7-р сарын 12-ны үдээс хойш аймгийн нэгдсэн эмнэлэгт ирж тархины зүүн талын яс цөмрөлттэй, цус хуралттай гэсэн оноштойгоор яаралтай хагалгаанд орсон байна. Н.Төмөрхуяг хүү хагалгаанаас хойш зургаан өдөр ухаангүй байсан бөгөөд  өчигдөр ухаан орсон ч ярьж чадахгүй, юм мартаж,  өвчнөөсөө болж уцаартай байх болсон байна. Хүүг ухаан орсон болохоор  сэхээний тасгаас эрчимт эмчилгээний тасагт  шилжүүлсэн бөгөөд одоо эмчилгээ хийлгэж байгаа ажээ.  

Харин Ховд аймгийн  Дуут сумын цагдаагийн газраас хүүг дайрч мориноос унагасан  хүмүүсийг саатуулсан бөгөөд хэргийг шалгаж эхлээд байгаа талаар дуулгасан байна.  

Харин  хүүгийн унаж байсан дааганы эзэн өнгөрсөн хугацаанд гэрийнхэнтэй нь хамт хүүг сахиж хамт байгаа гэнэ.

Хүүд хэдийгээр эмчилгээ хийж байгаа ч эм тариа нь дутмаг байгаа бөгөөд хотод ирж эмчлүүлэхээр төлөвлөөд байгаа юм байна.  

Хүүгийн бие тааруу байхад өнөөдрийг хүртэл наадмын зохион байгуулагчид,  засаг дарга нь ямар ч арга хэмжээ авахгүй нүд нь балай чих нь дүлий байгаа юм. Нэг хүүхдийн эрүүл мэндээр наадчихаад байгаа наадмын зохион байгуулах комисс уяачдын наадам зохион байгуулахаар төлөвлөөд байгаа ажээ. Наадмын зохион байгуулах  комисс  хамгаалалтын  хэрэгсэлгүй хүүхдийг уралдуулахгүй гэж анхнаасаа хүүг уралдуулаагүй бол өнөөдөр ингэж асуудал үүсэхгүй байсан. Нөгөө талаас  дааганы уралдаанд  залуус оролцож уралдаж байсан хүүхдийг дайрч мориноос унагасан гэхээр наадам хичнээн зохион байгуулалгүй болсныг  илтгэж байгаа юм.

Н.Төмөрхуяг хүүгийн мэдээллийг манай сайт анхлан мэдээлсэн бөгөөд энэхүү мэдээллийн дагуу  хүүд тусалмаар байна, холбож өгөөч гэсэн хүсэлт олноор ирэхийн зэрэгцээ Фэйсбүүк хэрэглэгч залуус тусламжийн гараа сунгахаар  нэгдэж байгаа талаар дуулгасан. Тиймээс  та бүхэн  Н.Төмөрхуягт туслах бол  хүгийн ээж Ч.Чимгээгийн Хаан банкны 5851-01-8366 тоот данс руу  мөнгө шилжүүлэх боломжтой.

А.Баярмаа