Эдийн засгийг эрчимжүүлэх хөтөлбөр энэ сарын 17-ний өдрөөр дуусгавар болно. Шинэчлэлийн засгийн газраас "ЭЗЭН-100 хоног" хөтөлбөрийг зарлаад ардаа 94 хоногийг үджээ. Энэ хугацаанд эдийн засагт орсон өөрчлөлт үнэндээ амьдралд хэрэгжиж, нүдэнд үзэгдсэнгүй гээд хэлчихэд буруутахгүй биз ээ.

Долоон хоног тутамд ам.долларын ханш өсч байна. Шинэ долоо хоногийн өглөөг ам.доллар 1880 төгрөгтэй тэнцсэн байдалтай угтлаа. Арилжааны банкуудад ам.долларыг авах ханш нь 1871-1876 харин зарах үнэ нь 1891 төгрөг байна. Бид гадны мөнгөн тэмдэгтэд дарлуулсан орон гэдгээ хүлээн зөвшөөрөх цаг ирсэн гэлтэй.

Өдгөө сургууль, цэцэрлэг цуглах цаг хаяанд ирлээ. Үүнтэй холбоотой ам. долларын үнэ өссөөр ч байгаа хэмээн хардах хүмүүс цөөнгүй байна. Энэ нь учиртай, манай улсаас өөр хаана ч байхгүй бичигдээгүй хууль дэндүү сайн гэмээр үйлчилдэг болоод олон жилийн нүүрийг үзэж буй.

Аливаа баяр наадам, хонхны баяр, сургууль, цэцэрлэг цуглах намар цагт бараа бүтээгдэхүүний үнэ эрс нэмэгдэж орхидог. 30 орчим хувиар унасан төгрөгийн ханшийн нөлөөгөөр импортын үнэ өссөөр байна.

Уул уурхайд хөрөнгө оруулдаг хэдэн гадаадын байгууллагуудыг буцаан явуулснаар манай улсын эдийн засагт багагүй нөлөөлж, ажилгүйдэл газар авсан хэмээн эдийн засагчид нэг хэсэг үзсэн. Гэвч хэдийнээ шийдвэрээ гаргасан эл асуудлыг хэн ч сөхөхийг хүсэлгүй үлдээсэн юм. Харин эргүүлэн энэхүү хөрөнгө оруулагчдаа авч ирэхийн тулд ихэд хичээн ажилласан гэдэг.

Түүнчлэн жил жилийн намарт их, дээд сургуулиуд сургалтын төлбөрөө нэмчихдэг зантай. Энэ жилийн хувьд ихэнхи сургуулиуд сургалтын төлбөрөө 10-15 хувиар нэмсэн гэдгээ мэдэгдсэн. Үүнээс харахад, үнэ нэмэгдлээ ард иргэдийн халаас нимгэрч, бүүр хоосорлоо. Тэдний цалин харин бах байдгаараа, авдаг хэд нь хүрэлцэхгүй хорогдсоор байна уу гэхээс нэмэгдэнэ гэж үгүй. Өргөн хэрэглээний бараа бүтээгдэхүүний үнийг өсгөдөг гэх наймаачид бидний лангууны түрээс нэмэгдсэн, бид амьдрах эрхтэй биз дээ, орлого маань амьдралд хүрэлцэхгүй байна. Долларын ханш өссөн гэх шалтгаануудыг үргэлж л хэлж худалдан авагчдын амыг таглачихдаг.

Гэхдээ тэд бас ашгийн байгууллага болохоороо ард иргэдийг боддоггүй гээд хэлчихвэл буруутахгүй биз ээ. Адилхан л ард иргэд, даанч тэдний давуу тал нь аманд орсон үнээрээ бараа, бүтээгдэхүүнээ зарчихдаг юм.

Иргэд яахав хоосон хонож, хоёр идэхгүй л бол гэсээр тэднийг давараасан байж болох талтай. Гэлээ гээд одоо сургууль, цэцэрлэг орох цагаар үнэ хэт өсгөж, долларын ханшийг улам чангаруулж дээшээ өсгөхгүй байвал болохсон. Монголбанкны ерөнхийлөгч саяхан ам.долларын ханшийг 1700 төгрөгт барина гэж амлаад авсан. Харин түүнийг амласанаас хойш ам.долларын ханш буураагүй нэмэгдсээр байгаа билээ.

Х.Даваа