2013 оны 5-р сарын 14-ны өдөр ОХУ-ын Тагнуулын алба АНУ-ын Элчин сайдын яамны ажилтан Райан Фоглыг тагнуул хийсэн хэргээр газар дээр нь баривчилсан тухай мэдээ дэлхий нийтийг доргиож уг тагнуулчид 24 цагийн дотор ОХУ-ын нутаг дэвсгэрийг орхин гарах шаардлага өгсөн төдийгүй тус улсад суугаа АНУ-ын бүрэн эрхт элчин сайдыг уг хэргээр гадаад яам дуудсан болно.
 
 
Америк тагнуулчийн хэрхэн Оросын нөлөө бүхий иргэдийг тагнуулын үйл ажиллагаанд элсэн оролцуулдаг байсан тухай баримт бичгүүд олдсоны дотор өөрийн талд авч буй хүндээ 100 мянган доллар өгч цаашид ажиллавал жил бүр нэг сая долларын гэрээ хийж, мөн үйл ажиллагаа, мэдээлэл бүрт нь хөлс төлж байхаар тохирдог нь анхаарал татаж байна.
 
 
Ер нь Америкийн Тагнуулын байгууллагууд дэлхийн ихэнх улс оронд Олон улсын байгууллагын халхавчин дор ажилладаг болохыг энэ хэрэг дахин нотолж өгч байна. Монголд дэгдсэн С.Баярцогтын асуудал бол зүгээр нэг ёс зүй, зүгээр нэг ёс суртахууны асуудал биш юм.
 
 
Тийм учраас Ардчилсан намын нарийн бичгийн дарга асан Д.Эрдэнэбат С.Баярцогтын хэрэг явдалтай холбогдуулан мэдэгдэхдээ "Энэ бол зүгээр нэг чулуу биш. Холын холоос шидэж буй холын зорилготой чулуу" гэж хэлсэн.
 
 
Энэ чулууг ямар учраас хэн шидсэн юм бол? Ямартай ч нэг зүйл тодорхой байгаа нь, С.Баярцогтын энэхүү хэргээр холбогдуулан ганц С.Баярцогтод биш олон олон "баярцогт"-д сануулга өгч байгаа бололтой.
 
 
УИХ-ын гишүүн Г.Уянга: "Энэ бол Оюутолгой мэтийн онцгой асуудалтай холбоотой хуйвалдагчид урваачдыг илчилнэ шүү" гэж айлгасан анхааруулга гэж УИХ-ын чуулган дээр хэлсэн. Ёс суртахуун, ёс зүй бол шал өөр асуудал. Энэ бол эх орноосоо урвасан харийн гар хөл бологчдын асуудал юм.
 
 
Ингээд түүний өөрийнх нь гаргасан ажил амьдралын тайлангаас сонирхъё! Энэ хүн өнгөрсөн 23 жилд харийнханд зүтгэж, онц гавъяа байгуулсан "Улсын баатар" хүн бололтой.
 
 
С.Баярцогт: "Би халааснаасаа мөнгө гаргаж үзээгүй, харин халаасанд бөөн бөөнөөр нь оруулдаг "
 
2008 оны УИХ-ын Сонгуулийн үеэр С.Баярцогтын ажил амьдралын тайлан нэртэй олон хуудастай зузаан өнгөт сэтгүүлийг хэвлэн гаргажээ. Уг сэтгүүлдээ С.Баярцогт "Гол мөрөн олон чиг Сэлэнгийг минь гүйцэхгүй" дууны зохиогчийн эрхийг асар өндөр үнээр худалдан авч, өөрийн дуу болгосноо тайлбарлахдаа: "Энэ дууны эрхийг хорин жилийн хугацаатай асар өндөр үнээр авч байгаагийн учир нь миний улс төр дэх хорин жилийн идэвхтэй амьдралтай холбоотой юм" гэж тайлбарлажээ.
 
 
2008 онд 41 настай байсан тэрбээр 2028 он буюу 61 нас хүртлээ Монголын улс төрд нэн идэвхтэй, нэр төртэй нэгэн байхаа илэрхийлжээ. Тэрээр Үндсэн хуулийг батлах үедээ өөрт ашигтай хоёр заалтыг оруулснаа бахархан ярьсан байна.
 
 
Энэ нь улс эх орны эрх ашигтай холбоотой биш, зөвхөн С.Баярцогт өөртөө зориулж хоёр нэн чухал заалт оруулжээ. Нэгдүгээрт, байнгын парламентын гишүүнийг цэргийн албанд татахгүй. Хоёрдугаарт, 25 нас хүрсэн хүнийг УИХ-ын гишүүнээр сонгож байх тухай заалт юм.
 
 
Учир нь С.Баярцогт Сэлэнгэ аймгаас АИХ-д сонгогдсон 1990 онд 23 настай байжээ. Тэрээр нэг биш удаа гадаадад суралцахдаа халааснаасаа нэг ч мөнгө гаргаж байгаагүй, харин ч халаасандаа бөөн бөөнөөр мөнгө оруулж байснаа бахархан дурьджээ.
 
 
Тухайлбал, 2000 онд АНУ-д Дэлхийн банк болон Японы Засгийн газрын 75 мянган долларын дэмжлэгээр суралцаж, халааснаасаа нэг ч мөнгө гаргаагүй. Мөн 1994-1996 онд Германд суралцаж байхдаа мөн өөрөөсөө нэг ч мөнгө гаргаагүй, харин 20 мянган евротой буцаж ирж байснаа өгүүлжээ.
 
 
Түүний намтрын баялаг хуудсанд нэг чухал үйл явдлууд болж байсан нь ихэнхи нь Олон улсын нэртэй гадаадын байгууллагуудад Монголоо төлөөлж биш, харин гадаадыг төлөөлж Монголд ажиллаж байснаа дурдсан байна.
 
 
Тухайлбал 1998-2002 онд ОУВС-ийн шинжээчээр ажиллаж байснаас гадна Дэлхийн банкны Монгол талын захирал, ОУВС-ын Монголыг хариуцсан захирагч, Азийн хөгжлийн банкны Монгол талын захирагч, Европын сэргээн босголт хөгжлийн банкны Монгол талын захирагч, Цөмийн агентлагийн гишүүн гэх мэт ажлууд хийж байснаа дурджээ.
 
 
Мөн Монголын Хувьсгалт Залуучуудын Эвлэлийг тараан бутаргаснаа, маршал Чойбалсангийн бунханг буулгаж, Сүхбаатар нарын шарилыг Алтан өлгийд оршуулах ажлыг зохион байгуулсан болон Олон улсаас их хэмжээний зээл авч Монголыг өрөнд оруулснаас гадна, эрх мэдлээ ашиглан Сэлэнгэ аймагт зуу гаруй тэрбум төгрөгийн хөрөнгө оруулалт хийснээ дурджээ.
 
 
Гэтэл сүүлийн 20 жилд Дорнод юм уу, Ховд аймагт 20 тэрбумын ч хөрөнгө оруулалт хийгдээгүй. Гэтэл эрх мэдлээ ашиглан ийм их мөнгийг Сэлэнгэ аймагт татсан байх жишээтэй.  
 
 
Эх сурвалж: “Хөх толбо” сонин