Эмэгтэй хүн бүр их бага хэмжээгээр нүүрээ буддаг ч өөрт тохиорсон төгс нүүр будалт хийхийг хүсдэг. Харамсалтай нь өдөржин толины өмнө суугаад ч өөрийн хүссэн нүүр будалтаа хийж чадахгүй байх нь бий. Иймээс нүүр будалтын тухай наад захын дүрмүүдийг баримталж, богино хугацаанд цэвэрхэн, аятайхан будаж сурцгаая. Дараах зөвлөмжүүдийг уншаад нэг үзээрэй бүсгүйчүүдээ.

1.    Гоо сайхны бүтээгдэхүүнээ зөв сонгох нь чухал. Нүүр будалтанд хамгийн чухал үүрэгтэй өө дарагч, крем, пудрээ чанартай, өөрийн арьсанд тохирохыг сонгоорой. 

2.    Өдөр тутмын будалтыг маш хөнгөхөн хийх хэрэгтэй. Олон зүйлийг давхарлах нь арьсанд муугаар нөлөөлж, давхарлаж будахгүй л бол бүрсгэр, бохир харагддаг болчихдог гэдгийг анхааруулая.Тиймээс аль болох хөнгөн, нимгэн хийх нь таны арьсыг илүү залуу, цэвэрхэн харагдуулах болно.

3.    Нүүр будалтаа пролонон багс бус үстэй төрөл бүрийн зориулалтын багс ашиглаж будах нь зохимжтой. Энэ нь будгийг жигд тарааж, цэвэрхэн харагдуулахаас гадна таны арьс үрчлээтэхээс сэргийлж өгдөг.

4.    Крем /foundation/ нь таны царайны өөг дарж, жигд, гөлгөр харагдуулах зориулалттай. Крем хэрэглэхгүйгээр бусад будалтыг хийх нь нүүрний элдэв гажиг, толбыг илүү тодруулж харагдуулахаас гадна, хэрэглэсэн косметик нүүрэн дээр удаан тогтохгүй. Иймээс суурь будалт хамгийн чухал шүү бүсгүйчүүдээ.

5.    Гэрэл сүүдрийг өдөр тутмын нүүр будалтаа ашиглаж хэвшээрэй. Энэ нь таны нүүрний хэлбэр, өө сэвийг засч өгнө. Та өргөн шанаатай, намхан хамартай, том духтай гэж санаа зовох зүйлгүй. Бүгдийг нь зохих хэмжээгээр өөрчилдөг зүйл бол гэрэл сүүдэр. Харин маш сайн уусгалт чухал, үгүй бол та яг л нүүр нь “халтартсан хүүхэд” шиг харагдах болно шүү.

6.    Хөмсөгийн тод будах хэрэггүй. Илүүдэл үсийг зулгааж, хэлбэрийг тодотгон, аль болох өөрийн мэт харагдуулах нь чухал. Хэрвээ та зайлшгүй хөмсгөө будах шаардлагатай байдаг бол саарал юмуу бор өнгийн хөмсөгний тенийг зориулалтын үстэй багс ашиглан бүдэгхэн будаарай.

7.    Нүдний тенийг аль болох бүдэг уусгалттай будах нь зохимжтой. Өдөр тутамдаа үдэшлэгийн, гоёлын будалт хийх нь тийм ч сайхан харагдахгүй л болов уу. Тениний өнгийг саагүй, илүү натурал, бор шаргал, цайвар бор эсвэл цайвар саарал өнгөөр сонгоорой. Сүүлийн үед натурал будалт буюу будсан ч будаагүй мэт харагдах будалт трэнд болоод байгаа билээ.

8.    Хацраа бага зэрэг өнгөлөх нь илүү өнгө нэмж, амьд харагдуулах болно. Хэрвээ та цайвар арьстай бол ягаан, цайвар ягаан буюу тоорын өнгө сонгоорой. Харин боорвтор арьстай бол бор туяатай, бор шаргал хацар өнгөлөгч зохих юм. 

9.    Уруулын будгийн хувьд өдөр тутмын будалтандаа тод өнгөнөөс зайлсхийгээрэй. Харин уруул өнгөлөгч юмуу таны уруулны өнгөнөөс нэгих ялгарахааргүй маттетай будаг, эсвэл зүгээр л вазелин түрхсэн ч болно. Маттетай уруулын будаг нь тийм ч их гялалзуулдаггүй тул өдөр тутамд зохимжтой. Харин урууландаа юуг ч түрхэхгүй байж болохгүй шүү бүсгүйчүүдээ.