Жирэмсэн байх хугацаандаа эмэгтэйчүүд эрүүл мэнддээ юу юунаас илүүтэйгээр анхаарах хэрэгтэй. Гэхдээ энэ нь бүтэн 9 сарын турш гоо сайхнаа гаргуунд нь хаяна гэсэн үг биш. Жирэмсэн байхдаа ч гоо сайхны бүтээгдэхүүн болон будаг шунхнаас татгалзах хэрэггүй. Хамгийн гол нь бойжиж буй хүүхдэд юу хоргүй, мөн юунаас татгалзвал зүйтэй болохыг мэдэж байх хэрэгтэй.

Арьсаа хэрхэн арчлах вэ?

Жирэмсэн эмэгтэй хүний бие организм эстроген болон прогестерон хэмээх дааврууд нэмэгдсэнээс бүхэлдээ өөрчлөлтөнд ордог. Нүүр, биеийн арьс ч үүнд багтана. Дааврууд нэмэгдэж идэвхижихийн хирээр ирээдүйн ээж нарын арьс харьцангуй тослог багатай болж, хар батга гарах нь багасдаг сайн талтай. Харин энэ үед арьс илүү мэдрэг болдог ба арьсаа гуужуулахыг хүсвэл хүнсний содыг устай зуурч байгаад арьсаа гуужуулвал үр дүнд маш сайн хүрнэ.

Хуурай арьстай эмэгтэйн  арьс энгийн үеийнхээс илүү хуурайшиж, таталддаг. Тиймээс өдөрт хэд хэдэн удаа чийгшүүлэгч тос хэрэглэж байх шаардлагатай. Мөн энэ үед арьс өмнөхөөсөө илүү эмзэг, мэдрэмтгий болж харшилд өртөх магадлал өндөртэй байдаг учраас өмнө нь хэрэглэж байгаагүй гоо сайхны бүтээгдэхүүн өөр дээрээ туршиж үзэхээс татгалз.

Мөн нүүрний тос хэрэглэхээсээ өмнө найралгыг нь сайтар унш. Холимог арьсны болон хөгшрөлтийн эсрэг үйлчилгээтэй тосонд ашигладаг ретинойд хэмээх  А витамины төрөл урагт муугаар нөлөөлж болзошгүй учраас хэрэглэхээс түр татгалзах хэрэгтэй.

Арьсны сэвх нөсөө

Жирэмсэн байх хугацаанд эмэгтэйчүүдийн арьс энгийн үеэс илүүтэйгээр сэвхтэж, нөсөөжих талтай байдаг. Энэхүү толбо нөсөө нь гол төлөв хацар болон шанаа орчмоор гарна. Мөн хөхний толгой, гэдэсний голоор болон биеийн нугалардаг хэсгүүдээр харлаж бараантдаг. Уг өөрчлөлт нь 3-4 сарын дараа өөрөө арилдаг учраас жирэмсэн байх хугацаандаа ангижрах гэж яарах хэрэггүй. Тиймээс сэвх нөсөө арилгах төрөл бүрийн гуужууллагч, тос нэг их хэрэглээд хэрэггүй боловуу, арьсанд харшил өгч болзошгүйг анхаар.

Язралтаас урьдчилан сэргийлэх

Язралт гол төлөв гэдэс, бэлхүүс, цээж буюу арьс хамгийн ихээр сунадаг хэсгүүдэд үүсдэг. Энэ хэсгүүддээ зориулалтын тос, гель түрхэхээс гадна байгалийн цэвэр оливийн тос түрхээрэй. Мөн шүршүүрт орохдоо усаа халуун, хүйтэн дээр солбин тохируулах, мөн уургаар баялаг хоол хүнс хэрэглэж байвал язралтаас сэргийлэх боломжтой.

Хөлний ядаргааг арилгах

Биеийн жин нэмэгдэх тусам хөл хамгийн ихээр ядарч, өвдөж, хавагнадаг. Зарим тохиолдолд сүүлийн 3 сард хөлний судас бүдүүрнэ. Тиймээс энэ үед хөлний алжаал тайлах массаж хийлгэж байхыг зөвлөдөг. Тайвшруулах массаж нь хөлөнд цугларсан шар усыг тарааж, ядаргаа тайлж, сайхан амралт болдог. Оройдоо мөн бүлээн усанд хөлөө дүрж амрааж байгаарай.

Маникюр болон педикюр хийхдээ болгоомжтой байх

Жирэмсэн байхдаа эмэгтэйчүүд хутга мэсний оролцоотой гоёлын маникюр болон педикюрээс аль болох татгалзвал зүгээр. Хумсаа янзалж байхдаа хуруугаа эсгэж гэмтээсэн тохиолдолд зөвхөн өвдөөд зогсохгүй гэмтсэн арьсаар дамжин халдвар авч болзошгүй. Чанар муутай хумсны лакны найрлаганд ордог толуол, формальдегид болон дибутилфталат нь  ургийн бойжилтонд сөрөг нөлөө үзүүлж болзошгүй. Гэхдээ хумсаа аль болох будахгүй байхыг эмч нар зөвлөдөг, учир нь хумсны жинхэнэ өнгө нь жирэмсэн эхийн биеийн байдлыг тодорхойлоход чухал ач холбогдолтой байдаг гэнэ.

Үсээ хайрла

Дааврын өөрчлөлтийн улмаас төрснөөс хэдэн сарын дараа маш ихээр унах тохиолдол байдаг. Гэхдээ дааврын хэмжээ эргээд хэвийн байдалд ороход унасан үсний оронд шинээр үс ургах учир нэг их санаа зовоод хэрэггүй. Гол нь үсний уутнуудаа “унтуулж” болохгүй. Үүний тулд хуйхандаа байнга массаж хийж байх хэрэгтэй.  Харин үс унаж байх үед төрөл бүрийн үс уналтын эсрэг шампунь тос зэрэг нь төдийлөн үр дүн өгөхгүй л болов уу. Үс унах үйл явцыг багасгахын тулд ангижруулагч байнга хэрэглэж, үсээ болгоомжтой самнах хэрэгтэй. Үсээ хатаахдаа үсний угнаас үзүүр рүү гэсэн чиглэлтэйгээр сэнсээ үлээлгээрэй.

Шар үс арилгах лазерын оронд вакс

Вакс ашиглаж илүүдэл шар үснээсээ ангижрах нь жирэмсний үед ямар нэгэн харш нөлөөгүй. Ээж болохоор бэлдэж байгаа бүсгүй таньд анхааруулахад жирэмсний үед лазераар шар үс авах үйлчилгээг хийлгэхгүй байсан нь дээр.