Өнгөрсөн долоо хоногт олон нийтийн анхаарлыг татсан гол үйл явдлын нэг нь үндэсний үйлдвэрлэгч “Exclusive” компанийн захирал Г.Майцэцэг бүтээгдэхүүнээ ард иргэдэд үнэгүй тараана гэж сенсаацалсан мэдээлэл байлаа.

Тэрбээр төр, засгаас үндэсний үйлдвэрлэгчдээ дэмжихийн оронд татвараар дарамталж, санхүүгийн хүнд байдалд оруулж байгаа учраас дампуурлаа зарлана гэж мэдэгдсэн. Гэвч компаниа албан ёсоор татан буулгаагүй мөртлөө ийнхүү бүтээгдэхүүнээ үнэгүй тараана гэхчилэн сүрийг үзүүлсэн нь нэг талаас татварын байгууллагыг бойкотолсон, нөгөө өнцгөөс нь харвал өөрийн компанийг олон нийтэд сурталчлах шоу байсан бололтой. “Үнэгүй юманд нугасгүй” гэх хэллэгт дүйхүйц явдал болж манайхан ч шөнө хугаслан “Хүннү молл”, хорооллын “Номин” их дэлгүүрийн гадаа цугларч, багахан хэмжээний үймээн болсон байна. Үүнийг бидний амьдрал, амьжиргаа ямар төвшинд байгааг харуулсан бодит байдал ч гэж харж болох юм.

Түүнээс гадна “Exclusive” компанийнхан хорооллын “Номин”-д эмх замбараагүй байдал үүсэхтэй зэрэгцэн “үнэгүй өглөг”-өө зогсоож, Саппорогийн задгай талбайд юм уу хороо, дүүргээр нь бараа бүтээгдэхүүнээ тараана гэсэн зар тарааж, иргэдийн сэтгэл зүй, хөрөнгө мөнгөний гачигдалтай байгаагаар нь дамшиглажээ. Эцэст нь хэлэхэд, тус компанийн захирал Г.Майцэцэг “Ном үнэгүй тараасан бол манайхан ингэж цуглахгүй дээ” гэж твиттер хуудастаа жиргэсэн байх юм. Энэ бол ард олныг гутаасан доромжлол. Өнгөрсөн бямба гаригт Сүхбаатарын талбайд болсон “Номын баяр”-т маш олон хүн цугларч, номын цагаан мөрд залбирч худалдан авалт хийж байсныг тэр авхай үзэж харах, мэдрэх сөхөөгүй явсан биз ээ.

Түүнд номын буян хурах цаг биш харин хэдэн бараагаараа олон түмнийг даллаж, олны сэтгэл зүйгээр тоглож, бусдыг бухимдуулж өөрөө таашаал авч, компаниа сурталчлах нь л чухал байжээ. Ийм л хачирхалтай, бусдыг бухимдуулсан шоу болсон юм даа.

Д.Мөнхжаргал