Ц.БАЯР

Монголбанкны захиалгаар үл хөдлөх хөрөнгийн “Тэнхлэг зууч” компанийн хараат бусаар хийсэн “Орон сууцны үнийн индекс”-ийн судалгааг танилцуулсан. Тус судалгаагаар өнгөрсөн сарын үнийн индекс 9.3 хувьтай гарсан нь өмнөх сарынхаас 2.2 хувь, өнгөрсөн оны мөн үеийнхээс 11.1 хувиар буурсан үзүүлэлт юм байна.

Энэ талаар “Тэнхлэг зууч” компанийн гүйцэтгэх захирал Б.Батзориг “Орон сууцны үнийн индекс нь зах зээлийн эрэлттэй шууд хамааралтай байдаг. Сүүлийн саруудад эрэлт тогтмол буурсаар байна. Үүний ард иргэдийн худалдах авах чадвар муудаж, гар дээрх бэлэн мөнгөний хэмжээ багассан зэрэг олон шалтгаан бий. Гэхдээ үүнийг тодруулахын тулд тусгай судалгаа хийх хэрэгтэй. Түүнчлэн тухайн сард зах зээлд нийлүүлэгдсэн шинэ орон сууцны үнэ огцом буурсан, мөн хуучин орон сууцны үнийн уналт эрчимтэй үргэлжилсэн хэвээр байгаа зэрэг нь орон сууцны дундаж үнэ сүүлийн саруудад огцом буурахад нөлөөлсөн. Мөн зах зээл ¼-ээр хумигдсан үзүүлэлттэй байгаа. Манай байгууллагын хийсэн судалгаагаар яг одоогийн байдлаар зах зээл буцаад сэргэнэ гэсэн хандлага ажиглагдахгүй байна” гэлээ.