Өнөөдөр Монгол Улсын дээд шүүхэд бүртгэлтэй 21 намын Дарга, Удирдлагууд нийлж Улсын их хурлын даргад шаардлага хүргүүллээ. Тэд өмнө энэ сарын 9-ний өдөр Сонгуулийн хуулийг нэн даруй Улсын их хурлаар хэлэлцүүлэхийг шаардсан бичиг хүргүүлсэн ч албан ёсны хариулт өгөөгүй юм. Тэд энэ удаад таван үндэслэлээр Улсын их хурлын даргад арванхоёрдугаар сарын 18-ны дотор буюу хоёр хоногийн хугацаатай хариу өгөхийг шаардан энэхүү бичгээ хүргүүлж байгаа аж.

Шаардлагад:

Нэгдүгээрт: Сонгуулийн автоматжуулсан системийн тухай хуулийн 5 дугаар зүйлийн 5.1.1-д заасан сонгуулийн автоматжуулсан системийг ашиглах шийдвэрийг гаргахад Улс төрийн намуудын зөвшилцөлийг хангах гэснийг хэрэгжүүлэх, Улс төрийн намуудын зөвшилцсөн автоматжуулсан системийг хэрэглэхгүй байх. Зайлшгүй хэрэглэх тохиолдолд давхар гар тооллого хийж камерийн бичлэгээр баталгаажуулахаар тогтсон тул уг шийдвэрийг хүлээн авч хэрэгжүүлэх

Хоёрдугаарт: АНУ-ын "Доминион Войтинг системс" компани "Microsoft" компаниуд эрхийг нь өмчилж эзэмшдэг, хар машины програмыг өөрчлөх ямар ч боломжгүй гэсэн сонгуулийн ерөнхий хорооны байр суурь нь "Монголын сонгуулийн үр дүн АНУ-ын нэг компанийн мэдэлд байж, ард түмний сонголтыг яаж ч засч, өөрчилж болох юм" гэсэн эргэлзээг төрүүлж байгаа учир тус компаниудаас програмыг хянах сорс кодыг авч улс төрийн намуудад өгч, ардчилсан сонголтыг Америкийн компанид биш, ард түмний мэдэлд өгөх,

Гуравдугаарт: Сонгуулийн автоматжуулсан систем /хар машин/-ны зардалд 16 тэрбум төгрөгийн үрэлгэн зардал гаргаж байгааг таслан зогсоож, харин энэ их мөнгөөр 16 цэцэрлэг барих буюу хотын төвийн 6 дүүрэгт тус бүр 2 цэцэрлэг, хотоос алслагдсан дүүрэг тус бүрт нэг цэцэрлэг, Дархан Эрдэнэт зэрэг хотуудад тус бүр нэг цэцэрлэг барих зэргээр нийгэмд үр ашигтай зарцуулах,

Дөрөвдүгээрт: АН-ын зүгээс УИХ-ын ээлжит сонгуулийг 2016 оны 9 дүгээр сард зохион байгуулж болох тухай хэвлэл мэдээллээр иргэдэд хүргэж эхэлсэн байна. УИХ-ын ээлжит сонгуулийн ээлжит хугацааг хойшлуулах нь Үндсэн хуулийг зөрчих тул хэрхэвч ийм үйлдэл гаргаж болохгүй бөгөөд энэхүү бусармаг санаачилгаа таслан зогсоож, олон нийтэд ээлжит сонгуулийг хугацаанд нь явуулах байр сууриа нэг мөр илэрхийлэх,

Тавдугаарт: Монгол Улсын Их Хурлын Сонгуулийн тухай хуульд нэмэлт, өөрчлөлт оруулах тухай улс төрийн намуудын ажлын хэсгийн боловсруулсан хуулийн төсөл нь нийгмийн бухимдал болсон сонгуулийн луйвар, эргэлзээг арилгаж байгааг олон нийт дэмжиж "Нааштай найман өөрчлөлт" хэмээн дүгнэж байгаа учир энэхүү хуулийн төслийг нэн яаралтай УИХ-аар хэлэлцүүлж батлахыг туус тус шаардаж байна.

Эдгээр шаардлагуудыг биелүүлж, энэ тухай хариу бичгийг 2015 оны арванхоёрдугаар сарын 18-ны өдрийн 10:00 цагаас өмнө бидэнд өгөхгүй бол Улс төрийн намууд Монгол улс 21 аймаг, сум, дүүргүүдэд Үндэсний хэмжээний тэмцлийг өрнүүлж Сонгуулийн хуулийг хэлэлцэхийг шаардсан үндэсний хэмжээний том фронт байгуулна гэдгийг албан ёсоор мэдэгдэж байна гэсэн юм.

ИРГЭН БААБАР “ХАР МАШИН”-Ы БУЛХАЙГ ИЛЧИЛСЭН НЬ...

Монгол Улсын иргэн Б.Батбаяр /Баабар/ Монгол Улсын Засгийн газрын гишүүнд гүтгүүлээд бөөн сүр дуулиан болов. Засгийн газрын гишүүн эрхэм нь “Баабар насаа нэмж тэтгэвэр тогтоолгосон” гэж гүтгэсэн. Бүр “Төрийн үйлчилгээг түгжрэлгүй болгосон ТҮЦ машин”-ы программыг эвдэж иргэн хүний нэр төрд бүдүүлгээр халдсан юм байх. Мань гүтгүүлсэн Баабар барин тавин баримттай тун ч ноцтой зүйлийг мэдсэн үү, мэдээгүй юу ямар ч байсан ам алдчихлаа. Тэр нь өнөө алдартай, ард түмнээсээ “гавьяа” нэхэж гайхуулаад байсан “ТҮЦ” машины программыг нь хэн нэгэн эвдэж хүний мэдээллийг засаад тавьчихсан тухай юм. Үүнтэй яг адилхан. Эрх баригчдын “хайр зарласан” сонгуулийн “хар машин”-ы программыг өөрчлөөд, ард түмний саналыг луйвардах нь энүүхэнд болж таарах нь. Ард түмэн шударга сонгууль хүсч байна. Харин тэр шударга сонгуулийг хаа холын Америкад үйлдвэрлэсэн “хар машин” явуулж чадах уу гэдэг нь асуудалтай. Программыг яаж ч өөрчилж болно гэдгийг өнөөдөр хүн болгон ойлгодог болсон цаг юм даа.