Ерөнхийлөгч өнөөдөр 10:00 цагт сэтгүүлчидтэй уулзана гэсэн зар өчигдөр тараав. Зарын дагуу өнөөдөр болзсон газраа, товлосон цагтаа сэтгүүлчид Ерөнхийлөгчтэй уулзахаар ирлээ. Уг мэдээллийг нь хэд хэдэн тв шууд дамжуулав. Гэвч Ерөнхийлөгч утааны эсрэг ийм ийм арга хэмжээ авна, цөмөөрөө утааны эсрэг ингэж тэмцье, иргэн бүрийн оролцоо чухал гээд ард түмнээ уриалсан агуулга бүхий зүйл хэлсэнгүй. Харин өөрийнхөө PR-ийг хийж,сэтгүүлчдээ загнав.

Монгол улсын Ерөнхийлөгч Ц.Элбэгдоржийн хэлж байгаагаар сэтгүүлчид зүрх сэтгэлгүй болоод утааны эсрэг огт бичээгүй гэнэ. Үүний улмаас төрийн албан хаагчдад цочроо өгөөгүй болохоор Улаанбаатар хот ирээдүйгүй хот болсон гэв. ҮГҮЙ ЭЭ ЕРӨНХИЙЛӨГЧ ӨӨ. ТА НҮДЭЭ НЭЭ. Та мэдээллийн аль нэг сайт руу ороод үзээрэй. Агаарын бохирдлын тухай дийлэнх нь онцолсон байгаа. Тухайн сайтынхаа архивыг ухаад үзээрэй. Таньтай ижил мэргэжилтэй сэтгүүлчид хөөрхий олон жилийн өмнөөс бичиж, ярьж, үзүүлсээр байсан, байгаа, байх болно. Харин та түүнийг нь анзаараагүй байна.  Төрийн албан хаагчид чинь дүлий дүмбэ оргисоор байна. Утаагаар төрийн зарим албан хаагч мөнгө хийж, ял авсныг нь харин та санаарай. Таны удирдаж байх ёстой төрийн албан хаагчид ажлаа хийж чадахгүй болохоор иргэд өнөөдөр  утааг бууруулахын төлөө гэр орон сууцаа дулаалж байна, цахилгаанаар хямд төсөр аргаар шийдэж байна, дэлхий нийтийн жишгийг сэтгүүлчид хэлж ярьж байна. Тиймээс сэтгүүлчдийн бүтээлийг хараагүй болохоор та битгий СОЛИОР. Харин муухай үг сонгосон бол УУЧЛААРАЙ.

Тэгвэл өнөөдрийн таны хэлсэн гурван санааг ингэж баяжуулж болохоор байна.  Та анзаараарай.  

Эхлээд, хөрсөө эрүүлжүүлэн ногоон эко бүс байгуулмаар байна.

Үндэсний цэцэрлэгт хүрээлэн шиг ногоон бүсийг Баянхошуу орчимд байгуулмаар байна. Хөрсөө эрүүлжүүлж эко бүс байгуулна гэсэн.  Дэмжиж байна. Үүний тулд Солонгосын Чежүгийн нэгэн жишгийг давтмаар байна. Чежүд айл, байгууллага бүр хашаандаа мод тарьдаг. Газар авч л байгаа бол мод тарь гэдэг. Мод тарихгүй бол уучлаарай гэж төр нь хэлдэг. Яг ийм жишгийг өнөөдөр хэрэгжүүлбэл таны хэлээд байгаа ногоон орчин чинь бүрдэнэ.

Нүүлгэн шилжүүлэлт

Төв, Архагай, Дархан, Хөвсгөл, Сэлэнгэ аймаг руу нүүлгэн шилжүүлэх боломжтой гэсэн агуулга бүхий зүйл хэллээ. Дэмжиж байнаа.  Гэхдээ үүнийгээ Монгол улсын хэмжээнд сэтгэж 21 аймаг руу нүүлгэн шилжүүлмээр байна. Үүний тулд гүйцэтгэх засаглалдаа үүрэг өгч, орон нутагт ажиллаж амьдрах гэж байгаа айл өрхүүдийн нийгмийн асуудлыг нь шийдэж өгөх хэрэгтэй. Ингэснээр хотыг чиглэсэн нүүдэл багасна. Орон нутгийн хөгжилд анхаарах хэрэгтэй. Ядаж л төрийн мөнгөөр гадаадад сурсан залуусыг хөдөө орон нутагт ажиллуулаад орон нутгаа хөгжүүлэхээ бодоорой.

Бүгдээрээ ажиллая

Бүгдээрээ төлөвлөгөө гаргаж ажиллая гэж байна.  Хоёр гар, хөлөө өргөөд дэмжиж байна.  Дэмжихгүй байхын аргагүй сайхан санал. Гол нь энэ саналыг хэрэгжүүлэхэд төрийн албан хаагчид хариуцлага алдсан бол хүлээлгэх хариуцлагыг нь нэмэгдүүлээд өгөөрэй. Бусдыг нь иргэд ухаантай болохоор хийчихэж чадна. Сэтгүүлчид уриалга гаргаад явж чадна.

Эцэст нь  утаа ярьсан ч  бичээгүй, сурвалжлаагүй гэвэл тэр сэтгүүлч нь Ц.Элбэгдорж та өөрөө шүү.

А.Баярмаа