-МАН-ын Бага хурлын гишүүн Б.Лхагважав эх сурвалжийн мэдээлснээр сайдын суудал горилж, эрх баригч намынхан руугаа атаклаад байгаа нь үнэн бол Монголын бизнес эрхлэгчдийн нэрийг барих хэрэггүй л баймаарсан-



Долоон төрлийн татвар нэмэхээр эрх баригчид төсвийн тодотгол оруулж ирсэнтэй холбогдуулан сүүлийн өдрүүдэд бишгүй л асуудал үүсч байна. Төсвийн алдалдлыг нөхөх, зээл авах гээд хэрэгцээ хоолой дээр тулаад байгаа ч төлөвлөсөн арга хэмжээг олон ч хүмүүс, улс төр нийгмийн зүтгэлтнүүд, хэвлэл мэдээллүүд хурцаар шүүмжилж байгаа.
Харин чоно борооноор гэгчээр асуудлын ар хударгаар янз бүрийн санаархлаа биелүүлэхийг хүсэмжлэгчид ч элдэв санаа гаргадаг боллоо. Тухайлбал Монголын Үндэсний Худалдаа, аж үйлдвэрийн танхим (МҮХАҮТ)-ын Ерөнхийлөгч Б.Лхагважав саяхан УИХ-д шаардлага хүргүүлэхдээ нийт татвар төлөгч аж ахуйн нэгжүүдийг татвар төлөхгүй байхыг уриалсан юм.
Тухайлбал, “Энэхүү шаардлагыг хүлээн авч нааштайгаар шийдвэрлэхгүй тохиолдолд 2017 оны дөрөвдүгээр сарын 10-нд төлөх гуравдугаар сарын нэмэгдсэн өртгийн албан татвар, дөрөвдүгээр сарын 15-нд төлөх дөрөвдүгээр улирлын аж ахуйн нэгжийн албан татвар, тавдугаар сард төлөх дөрөвдүгээр сарын нийгмийн даатгалын шимтгэлийг төлөхгүй байхыг нийт аж ахуйн нэгжүүдэд уриалж байна” гэсэн юм.
Татвар төлөхгүй байхыг нийтэд уриалж, бусдыг турхирах нь шулуухандаа бол гэмт хэрэг. Дэлхийн аль ч оронд үүнийг гэмт хэрэг л гэж тооцно. Эрх баригчид ч Б.Лхагважав гэдэг хүний үгээр хүссэн бүхнийг нь биелүүлж, шаардлагыг нь хүлээж авах юу л бол, харин татвар төлөхгүй гэдийсэн аж ахуйн нэгжүүд хуулийн дор хариуцлагаа хүлээж хохирол амсах магадлал өндөр. Зах зээл дээрээ тогтвортой хугацаанд найдвартай ханган нийлүүлэгч байхыг эрмэлзэж ирсэн томоохон аж ахуйн нэгжүүд үүнийг гадарлах бүү хэл, гарцаагүй ойлгож байгаа нь лавтай.
Төсвийн тодотголыг УИХ-д өргөн барьснаасаа хойш Сангийн яамны удирдлагууд томоохон татвар төлөгчид, тэр дундаа тамхи, архи үйлдвэрлэгчид, шатахуун ханган нийлүүлэгчидтэй нэг бус уулзсан мэдээлэл бий. Хэрэгжүүлэх арга хэмжээнийхээ талаар тэдэнд тайлбар өгч, “эдийн засагт учирч буй бэрхшээлийг аль болох жигдхэн хуваах, таарсан ачаагаа хаа хаана үүрэх нь зүйтэй” талаар харилцан ойлголцох хэмжээнд ярилцсан гэх. Тэгэхээр юу юугүй Б.Лхагважавыг дагаж дарцаглах нь хэд бол?!
Б.Лхагважавын тэргүүлдэг МҮХАҮТанхим бизнес эрхлэгчдийн гишүүнчлэлийн татварын мөнгөөр цалинждаг тул тэднийхээ эрх ашгийг хамгаалан УИХ-д шаардлага хүргүүлэх нь байдаг л зүйл. Харин сайн сайн гэхээр сахлаа будав гэгчээр хэт их хөөрцөглөж татвар төлөхгүй байхыг уриалах нь хуулийн хил хязгаараас давж байгаа хэрэг. Бүр сүүлдээ Б.Лхагважав Ерөнхий сайдыг огцруулах хүртэл асуудлыг тавина гэж улс төрийн шантааж хийх болжээ. Тэрбээр шаардлагадаа “Төрийн захиргааны албан хаагчдын тоог 20 %, үйлчилгээний албан хаагчдын тоог 10%-иар тус тус бууруулах”-ыг санал болгосон байна. Үнэндээ дотоодын аж ахуйн нэгжүүдийн борлуулалт, ашиг орлого эдийн засгийн орчныг дагаад таагүй, түрүүчээсээ хаалгаа барих болсон ийм үед найдвартай ажлын байрыг төрийн алба л хадгалж чадна. Хувийн хэвшил нь бэхжээгүй өнөөгийнх шиг нөхцөлд төр өөрөө ажлын байр хадгалах замаар нийгмийн өмнө тодорхой үүрэг хүлээх нь бас буруу ч биш байх. Эцсийн дүндээ иргэд нь аль болох олноороо ажилтай, орлоготой баймааж л аж ахуйн нэгжүүдийн ашиг, орлого, борлуулалтыг нэмэгдүүлнэ.
Б.Лхагважав өнөөдөр ард түмнээс мандат авч сонгогдсон УИХ-ын гишүүн биш. Зүгээр л бизнес эрхлэгчид, компаниудын дэмжлэгээр томоохон төрийн бус байгууллагыг тэргүүлэх болсон ердийн нэг азтай эр. Хэрвээ Засгийн газрыг огцруулах асуудлыг хөндөн тавихыг тэгтлээ их хүсээд байгаа юм бол Танхимынхаа Ерөнхийлөгчөөс татгалзаад МАН-ын Бага хурлын гишүүнийхээ хувьд нам дээрээ очиж улстөржвөл таарна. Долоон төрлийн татвар иргэдийн нуруун дээр л ачаа болохоос биш эдийн засгийн татварын өршөөл саяхан эдэлчихээд байгаа аж ахуйн нэгжүүдэд дааж давшгүй дөнгө бас биш.Тэмцэж болно, гэхдээ хэмжээ, хязгаар гэж нэг юм бий.
МАН-ын Бага хурлын гишүүн Б.Лхагважав эх сурвалжийн мэдээлснээр сайдын суудал горилж, эрх баригч намынхан руугаа атаклаад байгаа нь үнэн бол Монголын бизнес эрхлэгчдийн нэрийг барих хэрэггүй л баймаарсан. Улс төрийн ашиг хонжоо харж, улс төрийн шантааж хийж байгаа бол улс төрийн сонгуульт ажил – Бага хурлын гишүүнээ л сонгож болно шүү дээ.