Өнгөрсөн Баасан гарагт буюу 5 сарын 5-нд МАХН хуралдаж, Монгол Улсын Ерөнхийлөгч асан, МАХН-ын дарга Н.Энхбаярыг Монгол Улсын Ерөнхийлөгчийн 2017 оны сонгуульд нэр дэвшүүлсэн билээ. Үүнийхээ дараа МАХН-ынхан  Н.Энхбаярт хуулийн хориг тавихгүй байхыг шаардаж, Сонгуулийн Ерөнхий Хорооны байрны гадаа жагсаал хийсэн юм.
 
Өнөөдөр ч гэсэн уг жагсаал нь үргэлжлэх аж. Сонгуулийн Ерөнхий Хороо улс төрийн намуудаас нэр дэвшигчдийг бүртгэх эсэх асуудлыг 5 сарын 14-ы дотор багтаан шийдвэрлэх ба дахин өөр нэр дэвшигчийг дэвшүүлэх, бүртгүүлэх боломж 5 сарын 17 хүртэл нээлттэй юм. Тэгвэл МАХН-ынхны хувьд 5 сарын 15 хүртэл Н.Энхбаярыг нэр дэвшүүлэхийг шаардсан улс төрийн тэмцлээ идэвхтэй үргэлжлүүлж, олон нийтийн анхааралд оруулах ба МАН, АН-ын алинтай тохиролцохоос хамааран Монгол Улсын Ерөнхийлөгчийн 2017 оны сонгуулийн "жинхэнэ нэр дэвшигч" нь тодорхой болох гэнэ. Эх сурвалжуудын өгүүлж буйгаар С.Ганбаатар Монгол Улсын Ерөнхийлөгчийн 2017 оны сонгуульд МАХН-аас нэр дэвших магадлал өндөр байгаа аж.
 
П.Энхмандах
sonin.mn