Дуулиан шуугиан ихтэй Ерөнхийлөгчийн сонгууль, найр наадам, гал түймэр, +40 хэмийн халуун гээд энэ зуны хурц асуудлууд дуусахгүй нь бололтой. Монгол Улсын тав дахь Ерөнхийлөгчөөр сонгогдсон Х.Баттулга Их тэнгэрийн амны харшид төвхнөмөгцөө л ялалтын баяраа тэмдэглэж, чухам хутга тавилгүй мах идэж, хундага тавилгүй архи уун, АН-ын гэх тодотголтой хэнбугай нь ч төрийн хамгаалалтын тансаг бүсэд наргиж цэнгэсэн. Гэхдээ л энэ намын доторх будилаан дээд, доодыг ялгалгүй оршдог бололтой. Жирийн гишүүд нь хүртэл хэн нь Х.Баттулгын төлөө илүү их санаа зовнисноороо марган, талцаж, их түймрийн хажуугаар бөөн хэрүүлийн гал дэгдээгээдэхсэн. За энэ ч яахав, тус намын дотоод асуудал.

Харин одоо АН-аас нэр дэвшиж ялалт байгуулсан эрхэм Ерөнхийлөгч Х.Баттулга яг Монголын төрийн тэргүүн үү, эсвэл “ялсан монголчууд”-ын л Ерөнхийлөгч үү гэдгийг нэн яаралтай тодорхойлох шаардлагатай болчихлоо. Учир юу гэвэл өдгөө МАН, АН-ын харьяаллын ялгаанаас болоод “Манай”, “Танай” Ерөнхийлөгч гэцгээж, тэр ч бүү хэл Олимпийн аваргуудаа хүртэл намын батлахаараа тус тусдаа өмчлөх маягтай.

Үүнээс гадна шинэ Ерөнхийлөгч маань өөрийн багаа бүрдүүлж эхэлсэн ба чухам энэ сэдэв л нийгмийн дунд “Энэ маань хэлснээрээ шударга л байгаасай билээ” гэх хардлага тээсэн хүлээлтийг үүсгэв. Ийн хардахын учир нь, Монголыг ялуулсан Ерөнхийлөгч Х.Баттулга эхнээсээ тулхтай, эрдэмтэй, туршлагатай хүмүүсийг бус асар их ашиг сонирхол тээсэн нөхдөөр өөрийгөө хүрээлүүлж эхэлсэн юм. Тэрбээр нэн түрүүнд, Ерөнхийлөгчийн Тамгын газрын даргыг сонгосон ба тэр эрхэм нь УИХ-ын дарга асан З.Энхболд. Энэ бол тун цочир сонголт байсан ба АН-ын гал цогтой, тэмцэгч эгэл гишүүд ч “Энэ л биш бол өөр хэн ч яах вэ” гэцгээж байсан. Учир нь З.Энхболдын буруу менежментээс болж 2012-2016 онд АН-ын нэр хүнд шалдаа бууж, 2016 оны УИХ-ын сонгуулиар парламентад суудалгүй үлдэх шахсан. Түүнчлэн мань хүний нэр Тавантолгойн элдэв хэрүүл дунд ч сонсогддог бөгөөд С.Баярцогт 2016 оны сонгуулийн дараахан хэвлэлд өгсөн ярилцлагадаа “Би З.Энхболдыг сайн мэднэ. УАБЗ дээр Ц.Элбэгдорж, Н.Алтанхуяг, З.Энхболд гурав суугаад Тавантолгойг ийм байдлаар хөдөлгөе гээд зарчмыг нь баталчихсан шүү дээ. Ер нь бол тэр зарчмаар Тавантолгойн төслийг баталсан” гэж онцолсон.

Энэ томилгооны дараа олон нийт “За даа, шударга гээд байсан Ерөнхийлөгчөөсөө ч илүү зүйл харах хэрэггүй боллоо доо. Дараагийн томилгоонууд энэнээс илүү шог байна биз ээ” гэцгээж байв. Тэгвэл Монгол Улсын Ерөнхийлөгч багаа бүрдүүлж, зөвлөхүүдээ сонгохдоо чухам хэн хэнийг татах гэж буй нь эхнээсээ ил болж эхэлжээ.

Ямартай ч Ерөнхийлөгч Х.Баттулга дэргэдээ Хүний эрх, хуулийн, Иргэний оролцоо, эдийн засгийн, Хүний хөгжил, нийгмийн, Олон нийтийн харилцааны, Амьдрах орчин, ногоон хөгжлийн, Гадаад бодлогын, Аюулгүй байдлын, Батлан хамгаалах бодлогын зөвлөхтэйгөөр ажиллахаар төлөвлөсөн байна. Мөн эдгээр зөвлөхүүдийн орон тооны эзэд ч сонсогдож эхэлсэн ба Ерөнхийлөгчийн Гадаад бодлогын зөвлөхөөр БНХАУ-д Элчин сайдаар ажиллаж байсан Ц.Сүхбаатар, УИХ-ын гишүүн асан Ц.Оюунгэрэл нар ажиллахаар болсон тухай яриа Төрийн ордонд тархжээ. Түүнчлэн Н.Алтанхуягийг Аюулгүй байдлын зөвлөхөөр, Р.Амаржаргалыг Иргэний оролцоо, Эдийн засгийн бодлогын зөвлөхөөрөө ажиллуулна гэж ойрын эх сурвалжаас мэдээллэсэн юм.

Үүнээс гадна Ерөнхийлөгчийн орон тооны бус зөвлөхөөр МУСГЗ Д.Сосорбарам, МУГТ Х.Цагаанбаатар, эдийн засагч Ч.Отгочулуу нар ажиллахаар болсон нь бүр тодорхой болсон байна. Мөн Цэргийн бодлогын асуудал хариуцсан орон тооны бус зөвлөхөөр Ц.Бямбажав, Ерөнхийлөгчийн Дэд бүтцийн асуудал хариуцсан орон тооны бус зөвлөх Б.Бямбасайхан нарыг үргэлжлүүлэн ажиллуулахаар болсон ажээ.

Ингээд шинэ Ерөнхийлөгчийн төрийг удирдалцах баг бүрэлдэхүүн үндсэндээ тодорхой болсон нь энэ юм. Энэ багийн ажлаас шалтгаалж Ерөнхийлөгч Х.Баттулгын үйлс тодорхойлогдож, цаашилбал Монгол Улсын тогтвортой хөгжлийн чиг хандлагад онцгой нөлөө үзүүлэх учиртай билээ. Мөн Монголын улстөрийн томоохон хүчин Ардчилсан намын хүний нөөц, боловсон хүчний чадамжийг эндээс харж болохоор...

А.Баярмаа