УИХ-ын гишүүн бол бүрэн эрхтэй.  Сонгогдсон л бол хуралдаа суухгүй байж болдог. Үүний тод жишээ бол УИХ-ын гишүүн Б.Наранхүү. Тэрбээр УИХ-ын нэгдсэн чуулганд хаа нэг суудаг. Тэгвэл түүний энэ байдалд хариуцлага тооцох, эргүүлэн татах боломжтой болж байна. Тодруулбал УИХ-ын дэгийн тухай хуульд нэмэлт өөрчлөлт оруулан гишүүнийг эргүүлэн татах юм.  Яг ийм хариуцлага тооцох хуулийн төслийг өчигдөр өргөн барьлаа. Хаврын чуулганаар уг асуудлыг хэлэлцэнэ. Хэрвээ хуулийн төслийг олонхоороо батлах  юм бол хамгийн их хурал тасалдаг гишүүдийг эргүүлэн татах юм.

УИХ-ын гишүүн Д.Хаянхярваа Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төслийг өргөн мэдүүллээ. Улсын Их Хурлын чуулганы хуралдааны ирц хангалтгүй, санал хураалтын үйл ажиллагаа дэгийн дагуу явагдахгүй байгаа нь Улсын Их Хурлын нэр хүндэд сөргөөр нөлөөлж байгаа төдийгүй Улсын Их Хурлын Хурлын үйл ажиллагааны үндсэн хэлбэр болох нэгдсэн хуралдаан, Байнгын хороод, нам, эвслийн бүлгийн хуралдаан хэвийн явагдах нөхцөлийг алдагдуулах болсон, өөрөөр хэлбэл Монгол Улсын Их Хурлын чуулганы хуралдааны дэгийн тухай хуулийн 10 дүгээр зүйл нь хуралдааны дэг, ёс зүйн зөрчил гаргасан гишүүнд ногдуулах хариуцлагыг зохицуулж, гишүүн хуралдаан тасалсан болон хоцорсон, бусад гишүүний өмнөөс санал өгсөн үйлдэлд нь ногдуулах хариуцлагыг орхигдуулсан гэж хууль санаачлагчид үзэж байна.

Иймд Улсын Их Хурлын чуулганы хуралдааны ирцийг сайжруулах, хуралдааны дэг сахиулах, гишүүн хүндэтгэн үзэх шалтгаангүйгээр хуралдаанд оролцоогүй, бусад гишүүний өмнөөс санал өгсөн тохиолдолд хариуцлага хүлээлгэхтэй холбоотой зохицуулалтыг боловсронгуй болгох зорилгоор хуулийн төслийг боловсруулсан байна.

Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төсөл болон уг хуулийн төсөлтэй уялдуулан боловсруулсан Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төслүүд батлагдсанаар дараах эерэг үр дагавар гарах юм. Үүнд:

1. Улсын Их Хурал бүрэн эрхээ хэрэгжүүлэх үндсэн хэлбэр буюу чуулганы хуралдааны ирц сайжирч хуралдаан хэвийн явагдах нөхцөл бүрдэнэ.

2. Улсын Их Хурлын гишүүн нь хууль, Улсын Их Хурлын бусад шийдвэрийн төслүүдийг хэлэлцэн батлахдаа гагцхүү санал өгөх эрхээ зөвхөн өөрөө эдлэх бөгөөд энэхүү эрхээ бусдад шилжүүлэх, бусад гишүүний өмнөөс санал өгөхгүй байх нөхцөл бүрдэнэ.

3. Чуулганы хуралдаанд хүндэтгэн үзэх шалтгаангүйгээр хүрэлцэн ирээгүй, удаа дараа хоцорсон гишүүнд тодорхой төрлийн хариуцлага хүлээлгэхээс гадна Улсын Их Хурлын гишүүний хоцорсон, тасалсан цагийн нийлбэр нь тухайн ээлжит чуулганы хуралдааны нийт хугацааны 1/3-д хүрснээр гишүүнийг эгүүлэн татах хариуцлагын тогтолцоо бүрдэх юм байна.

Ямартай ч хуулийн төслийг өргөн барьлаа. Хаврын чуулганаар уг асуудлыг хэлэлцэхээр төлөвлөөд байгаа. Хэрвээ олонхоороо батлах юм бол чуулган хамгийн ихээр тасалдаг гишүүдыг  эргүүлэн татагдана. Татагдах гишүүдийн тэргүүн эгнээнд Б.Наранхүү гишүүн байна. Уг хуулийн төслийг  хаврын чуулганаар хэрхэн хэлэлцэх талаар бид эргэж мэдээлэх болно.