Эрдэнэ зая бандид Лувсанданзанпүлжинжигмэд гэгээнтэн 2019.02.04 буюу битүүний сансарын барилдлагатай өдөр нирваан дүрийг барилаа.
Гэгээнтэн багш маань 15-н дүрээрээ монгол түмнийхээ сайн сайхан соён гэгээрүүлэх их үйлсийн төлөө өдөр шөнө алгасаралгүй хичээн ирснийг буурал түүхийн хуудаснаас бэлээхэн харж болох билээ. 
Хувьсгалын жилүүдэд хувилгаадын хойд дүрийг тодруулах ажил хаалттай байсан боловч анх түрүүнд Богд эзэн хааны лүндэн бошигын дагуу Заяын гэгээний хойд дүрийг туулай жилдээ Дээрхийн гэгээнтэн 14-дүгээр Далай багш тодруулан өөрийн ивээл дор авч ном эрдэм сурган монголын бурхан шашны гурван зулын нэг хэмээн батламжилсан байдаг.
Өөрийн төрсөн нутаг Архангай дахь Төгс баясгалант буян дэлгэрүүлэх хийдийг хөгжүүлж өргөтгөн дэлгэрүүлсээр ирсэн. Улаанбаатар хотод Зая гэгээний гүшог дацанг бүтээн байгуулж байна. Монгол улсынхаа дөрвөн өнцөгт дөрвөн махранз бурханы суваргат цогцолбор бүтээн байгуулсан тэргүүтэй  эрдэм үйлсийн далайг үгүйлж барашгүй билээ.

 Тэргүүн их хамба лам, гавж Д.Чойжамцын бичсэн эмгэнэлийн бичгийг сонордуулж байна. 

"МОНГОЛЫН АРД ТҮМЭНД СОНОРДУУЛАХ НЬ

Адистидын дээдийг хайрлагч язгуур үндэсний лам
Агуу шидийн хурыг буулгагч амирлангуй хилэнт ядам,
Ад зэтгэр бүгдийг арилгагч дагинас номын сахиусанд
Ариун гурван үүдний чин бишрэлээр сүсэглэн мөргөмүй.

Умар зүгийн Монгол орны аврал итгэл, Монголын Бурханы шашны оройн чимэг Зая Бандид хутагт Лувсанданзанпүлжинжигмэд гэгээнтэн бээр шавь олныг дээдийн номын рашаанаар цэнгүүлэн зохиож байгаад XVII жарны шороон нохой жилийн өвлийн сүүл сарын бүтүүний өдөр буюу 2019 оны хоёрдугаар сарын 4-ний өдөр ертөнцийн мөнх бусын ёсыг үзүүлж, дүрст лагшингаа номын агаарт хураалаа.

Зая Бандид хутагт Лувсанданзанпүлжинжигмэд бээр урьд дүрүүдийн Зая гэгээдийн адилаар Монгол орны шашин номын үйлсийг тэтгэж, шавь олноо таалал нигүүлсэлдээ болгоон, цөвүүн цагийн аврал итгэл болон оршиж байлаа. Тодорсон даруй Монгол орноо залран саатахуйд нийт сүсэгтэн болоод төрөлх нутгийн шавь, нийтийн сүсгийн хумх дэлгэрэн мишээж, шавь нийтийн итгэл сүсгийн орон болж байсан.

1999 оны туулай жилд Сэра, Брайвун тэргүүтэй хийд орноор саатан морилж байхад Энэтхэг Төвөдийн гэгээн хутагтууд, эгэлгүй номын мэргэдүүд "Монголын Зая бандид хутагт" залран ирлээ хэмээн сүсэглэн залбирч урьд дүрүүдийн ач гавъяаг нэхэн санагалзаж байсан нь Зая бандид хутагт нар Монгол төдийгүй нийт Бурханы шашинт орнуудад "номын далай хутагт" хэмээн алдаршиж байсныг илтгэн харуулж байлаа. Гэлүгвагийн номын ёстон бүхний дамжлагын дээд багш нарын тоонд анхдугаар дүрийн Зая бандид хутагт Лувсанпэрэнлэй гэгээнтэн бээр албан ёсоор ордог.

Учир юун хэмээвээс Богд Зонховын гэгээний үндэслэн гаргасан Гэлүгвагийн шашинд тасрах шахсан Ганжуур эрдэнийн лүнг /аман иш/ бүрэн гүйцэд хүртээд, Монгол Төвөдийн номын мэргэдэд дамжуулан хүртээсэн нь өнөөг хүртэл тасралтгүй оршиж байгаа юм. Зая гэгээнтний алдраар алдаршсан "Заяын сан ег" хэмээх 4 боть ховор бүтээлийг дуулаагүй, үзээгүй номын мэргэд гэж үгүй юм. Хоёрдугаар дүрийн Зая гэгээнтэн бээр VII Далай лам Галсанжамц гэгээнтний хайрласан Нандэн Лхам, Сэра хийдийн нандин шүтээн Дамдин янсан, Дүвчэн Дарчарвын Пүрэв, Логшир тэргүүтнийг хүрээндээ залж ирсэн нь Заяын хүрээний шүтээний эрхэм болон оршиж байсан. V дүрийн гэгээнтэн бээр илт мэдэл хэтийдсэн эрдэмтэй сайхан гэгээн байсан. Энэ дүрийн гэгээнтэн маань номын үйлс шавь олноо гэх онцгой сэтгэл нь дээд төрөлхтөн бодисадвагийн явдал үйлийг биечлэн үзүүлж байсан санагддаг юм. Хөдөө орон нутгуудаар ихэнхдээ морилж зарлиг сургаалиа айлдаж, элдэв гамшиг аюул гарахвий хэмээн онцгой нигүүлсэн болгоож тахилга тайлга, даатган залбирлыг онцгойлон үйлдэж байлаа. Бодисадва нарын амьтнаа туслах арга бүхэн нь онц гайхамшигтай байдаг. 

Монголын Бурханы шашны номын зул болсон гэгээн хутагт минь таалал төгссөнд гүнээ гашуудан гүн эмгэнэл илэрхийлье. Зая гэгээнтний минь гэгээн хойд дүр шавь олныхоо эгээрэл хүслийг тольдон болгоож, шашин амьтны тусад Монгол орноо үтэр түргэн залрах болтугай.

XVII Жарны тийн урвуулагч хэмээх гахай жилийн хаврын тэргүүн сарын шинийн 2 буюу 2019 оны хоёрдугаар сарын 06-ны өдөр

ТЭРГҮҮН ИХ ХАМБА ЛАМ, ГАВЖ Д.ЧОЙЖАМЦ" гэсэн байна.