БНСУ-ын “Wonjin beauty medical group”–ээс зохион байгуулсан фото моделийн тэмцээнд шалгарсан Ганбууш буюу Н.Ган-Од өдгөө тус улсын Ганнам дүүрэгт амьдарч буй.

Нийт  300 орчим хүмүүс оролцсон энэхүү шалгаруулалтад тэнцэж, шилдэг зургаан оролцогчийн нэгээр тодорсон тэрбээр гоо сайхны таван төрлийн хагалгааг үнэ төлбөргүй хийлгэх эрхтэй болсон юм.

Ингэснээр шинэхэн фото модель маань “Wonjin beauty medical group”-ийн нүүр царай болж байгаа гэнэ. Өнгөрсөн жил Тайланд улсад хүйс солиулах мэс засал хийлгээд ирсэн Н.Ган-Од хөхөө томруулан, имплант шүд хийлгэсэн ч гадаад төрхөндөө тийм ч сэтгэл хангалуун бус явсан гэдэг. Арга ч үгүй биз. 60 насны босго давж яваа түүнд нүүрнийхээ арьсыг татуулж, нүдний сул унжсан зовхи зэргийг засуулах шаардлага зайлшгүй тулгарчээ.

Тэгвэл гоо сайхны мэс заслаараа алдартай Солонгосын чадварлаг эмч нарын гарт өөрийгөө даатгасан тэрбээр нүүрний арьс татах, хамрын хэлбэр засах хагалгаанд аль хэдийнэ орсон гэнэ. Улмаар мэс заслын сорви эдгэрч, царай төрх нь засарсан тул дараагийн хагалгаанд зэхээд тун ч завгүй байгаа ажээ. Н.Ган-Од урьд нь “Перфект” эмнэлэгт хамраа өндөрлүүлэн имплант тавиулсан ч, энэ төрлийн хагалгааг дахин хийлгэхийг хүссэн юм байх. Мөн тэрбээр Тайланд улсад хийлгэсэн хөхөө голж орхиод хэмжээг нь дахин томруулахаар болжээ. Энэ бүхний дараа уруулынхаа хэлбэрийг өөрчлөн, нүдний зовхио татуулах төлөвлөгөөтэй яваа гэнэ шүү.

Б.Содон