Соёл, спорт, аялал жуулчлал, залуучуудын сайд Ч.Ундрамын The MongolZ багийн талаар ярьсан зүйл анхаарал татаж байна. Тэрбээр “Тус багийн үүсгэн байгуулагч холбооны удирдах зөвлөлд төрийн өндөр албан тушаал хашдаг хүний гэр бүлийн хүн бий гэж сонссон” хэмээсэн.

Харин The MongolZ-ийн зүгээс үүнийг үгүйсгэснээс гадна татварын мөнгөөр санхүүждэггүй, цаашид ч санхүүжихгүй гэдгийг мэдэгдлээрээ хэлсэн.

Тэгвэл талаар олон талын эх сурвалжууд ч өөрсдийн байр сууриа илэрхийлсээр байгаа бөгөөд шилэн дансаас ч баримттай мэдээллүүд гарч ирж эхэлжээ. 

Үүний нэг бол Б.Цогтгэрэл буюу Шилэн Цогоо дараах мэдээллийг хавсарган  ийн бичжээ. 

Тэрбээр бичихдээ, Хамгийн сайн зүйл бол санхүүгийн баримт. Үүсээд байгаа нөхцөл байдлын улмаас шилэн данс ухлаа.  "Монголын электрон спортын холбоо" гэх байгууллага 8,437,000₮ Биеийн тамир спортын улсын хорооноос авсан байна.

Уг байгууллага нь Монгол Улсын төрийн байгууллага, энэ мөнгө нь төсвийн мөнгө.

"MongolZ" баг аваагүй гэдгээ албан ёсоор мэдэгдсэн. Энэ ч үнэн байх.

Гол нь энэ мөнгийг дундаас нь хэн авсан бэ? хэмээжээ

Энэ бүхнээс харахад маргааны гол эзэн нь “Монголын электрон спортын холбоо” бололтой. Учир нь МОНГОЛЗ багийн зүгээс шгигшээ багт багтдаг ч тэд мөнгө авдаггүй гэдгээ ил тодоор мэдээлэл өгсөн. 

Тэгвэл “Монголын электрон спортын холбоо” гэх байгууллагын цаана л асуудал өрнөж байгаа бололтой. Энэ байгууллага нь мөн гол ярианы сэдэв болох атал МОНГОЛЗ баг руу чиглүүлж иргэдийг төрүүлж байх магадлал байна. Учир нь тус холбоо нэр дээрээ улсын төсвөөс мөнгийг данс руу авч байгаа нь баримтаар тодорхой болж байна. 

Үүнээс гадна энэ холбооны удирдах зөвлөлүүд нь ч нөгөөх л хэл ам татлаад буй олны танилууд аж. 

 Энэ холбоо 2003 онд бүртгэгдсэн байгууллага бөгөөд 2019 онд удирдах зөвлөлийнх нь бүрэлдэхүүн өөрчлөгдөн Г.Эрдэнэчулуун, Г.Амартүвшин, Г.Бат-Эрдэнэ, Б.Батбаяр, Б.Гантулга, М.Майсайхан, Ж.Энхжаргал нар багтжээ.

Г.Амартүвшин нь УИХ-ын гишүүн асан, “Эрчис монгол” ТӨХК-ийн захирал, Г.Эрдэнэчулуун нь дуучин Укагийн нөхөр, Ж.Энхжаргалан нь НИТХ-ын төлөөлөгч, Төв цэнгэлдэх хүрээлэнг удирдаж байсан. Харин Г.Бат-Эрдэнэ нь Соёл, спорт, аялал жуулчлал, залуучуудын сайд асан Ч.Номингийн нөхөр зэрэг байгаа нь нөгөөх ярианы сэдэв болох улс төрийн нөлөө бүхий хүмүүс болж таарлаа.

Ямартаа ч МОНГОЛЗ баг мөнгө аваагүй гэдгээ ил тодоор мэдэгдээд байгаа, харин улсын төсвөөс гарсан мөнгөн баримтууд ил болж тэр нь “Монголын электрон спортын холбоо” гэх газрын данс руу ороод байгаа энэ үед тус байгууллага тайлбар хийх нь зөв байх. 

Дээрх төсөв мөнгөөс гадна Биеийн тамир, спортын хорооны 2025 оны дөрөвдүгээр сарын тушаалаар энэ “Монголын электрон спортын холбоо” гэх байгууллагад төсвийн дэмжлэг үзүүлэхээр гэрээлж, “Үндэсний шигшээ багийг олимпын электрон спортын наадамд бэлтгэн оролцуулахад улсын төсвөөс санхүүгийн дэмжлэг үзүүлэх” нэршил дор IESF тэмцээнд 40 сая, GEF тэмцээнд 20 сая төгрөгийн дэмжлэг олгохоор баталж олгосон баримт ч ил болжээ