Ерөнхийлөгч асан, МАХН-ын дарга Н.Энхбаяр өчигдөр эх орондоо ирсэн билээ. Тэрээр өчигдөр УИХ дахь МАХН, МҮАН-ын "Шударга ёс" эвслийн бүлгийн өргөтгөсөн хуралдаанд оролцож, бүлгийнхээ гишүүдтэй санал бодлоо солилцсон байна.
Энэ үеэр УИХ-ын 2012 оны сонгуулиас хойшхи үйл ажиллагааг үнэлж, цэгнэхийг эрмэлзсэн бололтой.
Үүний дараа тэрээр нэр бүхий улс төрчидтэй уулзсан бөгөөд  одоо Ерөнхий сайд, АН-ын дарга Н.Алтанхуягтай уулзаж буй аж. Энэ үеэр хамтарч Засгийн газар байгуулсан нам, эвслийн дарга нар болох тэд Засгийн газрын бүтцийн асуудал болон УИХ-ын 2012 оны сонгуулийн дараа байгуулсан гэрээний хэрэгжилт гэх мэт асуудлыг ярилцаж байгаа юм байна.

Мөн Н.Энхбаяр маргаашнаас МАН-ын удирдлагууд болох  Т.Бадамжунай, С.Баяр нартай уулзана хэмээн эх сурвалжууд өгүүлж буй.
Тэдний юу ярилцах нь одоогоор тодорхойгүй байгаа ч МАН, МАХН хамтарч Засгийн газар байгуулж ч болзошгүй тухай УИХ-ын гишүүн О.Баасанхүү өгүүлсэн юм.
Мөн Ерөнхий сайд, АН-ын дарга Н.Алтанхуягийн зөвлөх Т.Хасбаатар : "МАН-ын дарга М.Энхболдыг унагахаар Америкаас С.Баяр, Солонгосоос Н.Энхбаяр ирсэн. Мөн хоёр намаа нэгтгэх асуудлаа яаравчлуулахаар болжээ." хэмээн өгүүлжээ.

Э.Мягмар