Канадын Альберта мужийн “Banff” хэмээх үндэсний цэцэрлэгт хүрээлэн.

Эндээс “Vitality Air” компани цэвэр агаар авч, савлан борлуулдаг байнаКанадын “Vitality Air” компани хоёр сарын өмнөөс өөрийн орны ой хөвч, уул ус, ургамал цэцэгсээр хүрээлэгдсэн онгон зэлүүд, мөнх цаст, өндөр уулсынхаа цэвэр агаарыг хоолой аргуулсан хорт утаагаар амьсгалж буй Бээжингийн иргэдэд борлуулж эхэлсэн юм.

Өнгөрсөн жил байгуулагдсан “Vitality Air” компани энэ оны аравдугаар сараас Канадын Альберт мужийн “Banff” хэмээх үндэсний цэцэрлэгт хүрээлэнгийн цэвэр агаарыг Хятад руу экспортлох болжээ. Энэ бизнесийг эхлүүлэх санаа хэрхэн төрсөн талаарх “Тelegraph” сайтын сэтгүүлчийн асуултад тус компанийг үүсгэн байгуулагч Мосес Лаам “Сүүлийн хоёр гурван жилд дэлхий нийтийн агаарын бохирдол эрчимжих хандлагатай болсноос үүдэн хүмүүсийн эрүүл мэнд доройтох болсон талаар багын найз Троё Пакетт хэлжээ. Энэ асуудлыг шийдвэрлэхэд чадах чинээгээрээ хувь нэмрээ оруулахыг хичээсэн учраас Троё Пакеттитай хамтраад хэсэгхэн хугацаанд туршилт хийсэн. Өөрөөр хэлбэл, эрэлт хэр байгааг судалсан гэх үү дээ. Гялгар уутанд савласан цэвэр агаар савлаж зарна гэж бичээд олон улсын худалдааны Ebay сайтад байршуулсны дараахан худалдан авах хүсэлт маш их ирсэн. Чухам эндээс л цэвэр агаар савлаж худалдаалах бизнесийн санаагаа бодит ажил болгох шийдэлд хүрсэн. Байгуулагдсанаасаа хойш жил хүрэхгүй хугацааны дотор өдөрт 500 гаруй ширхэг савласан цэвэр агаар борлуулдаг болсон” хэмээн хариулжээ. Тус бүр нь 7.7 литр хэмжээтэй савласан цэвэр агаар 100 юань буюу 30 мянган төгрөгийн үнэтэй. Энэ нь Бээжин хотноо зарагддаг тус бүр нь нэг литрээр савлагдсан найман шил эрдэсжүүлсэн цэвэр уснаас даруй 50 дахин өндөр үнэтэй юм. “Ихэвчлэн хөрөнгө чинээтэй айлын гэрийн эзэгтэйчүүд өөртөө болон гэр бүлийнхэндээ хэрэглүүлэх гэж цэвэр агаар худалдан авдаг. Ойр дотнынхондоо бэлэглэх нь ч элбэг. Хятадад цэвэр агаар худалдан авах бол яах аргагүй тансаг хэрэглээ. Энэ өвөл ойролцоогоор дөрвөн мянга гаруй ширхэг савласан цэвэр агаар борлуулах гэрээг Хятадын Засгийн газартай хийсэн. Өвлийн улирал ид дундаа орж байхад гурван мянган гаруй нь аль хэдийнэ зарагдчихсан. Мэдээж Хятадын Засгийн газраас нэмж авах хүсэлтээ илэрхийлбэл бид нийлүүлэхэд бэлэн” гэж “Vitality Air” компанийн Хятад дахь худалдааны төлөөлөгч Харрисон Ванг хэлжээ. Тус бүтээгдэхүүний хэрэглэгчид дан ганц Бээжин хотоор зогсохгүй, Хятадын зүүн хойд хэсэг дэх агаарын бохирдолт ихтэй том хотуудын оршин суугчид, Хойд Америк, Энэтхэгт хүртэл байдаг аж.

Дээрх мэдээлэл цахим ертөнцөд гарсны дараахнаас дотооддоо иймэрхүү цэвэр агаар савлаж, зардаг үйлдвэртэй болъё гэсэн саналыг иргэд өөрсдийн твиттер, фейсбүүкээрээ дамжуулан илэрхийлэх болсон. Тухайлбал Улаанбаатар ойрын хэдэн арван жилдээ утаатай хэвээр байх нь тодорхой. Утаагүй зуух тарааж, гэр хорооллыг орон сууцжуулах, утаагүй түлш үйлдвэрлэх төсөл боловсруулж, “Цэвэр агаар сан” гэсэн тусдаа байгууллага байгуулж хүртэл үзлээ. Аль аль нь төдийлөн амжилттай болоогүй. Үр дүн одоогоор харагдахгүй л байна. Зарим нь бүр төсвийн мөнгөнөөс хумслах гэсэн бодлого боловсруулагчдын заль байсан болохыг цаг хугацаа харуулсан. Үүссэн асуудлыг шийдвэрлэж, агаарын бохирдлыг бууруулах хүртэл “Vitality Air” шиг цэвэр агаар савлаж, зардаг компани байгуулбал хамгийн нүдээ олсон хөрөнгө оруулалт болно”, “10 гаруй тэрбум төгрөгөөр утаагүй түлшний үйлдвэр барихаар төсөвлөн, хаана ч туршигдаагүй, бодит ажил хэрэг болоогүй технологийг “нэвтрүүлэхээр” ажилладаг, манайхан мөн чиг хачин улс шүү. Энэ хөрөнгөөр нэг биш нэлээд хэдэн энэ мэт цэвэр агаар савлан, худалдаалдаг үйлдвэр байгуулж болох байсан байх даа. Улаанбаатар хотоос арав гаруйхан км-т гарчихад л цэвэр агаараар цээж тэнийтэл амьсгалж болно. Тэр утгаараа цэвэр агаар үйлдвэрлэлийн “түүхий эд”-ийг нөөцлөхийн тулд хотоос арав гаруйхан км холдоход л хангалттай. 22-ын товчооноос жаахан цаашлахад л хангалттай цэвэр агаар авчихна. Өөрөөр хэлбэл Хятад шиг харь орны цэцэрлэгт хүрээлэнгээс агаар худалдан авах шаардлагагүй гэсэн үг”, “Агаарын бохирдлыг бууруулах ийм ч хөтөлбөр, тийм ч төсөл гэсээр ард түмэн амьсгалын замын өвчнөөр үхээд дууслаа. Утаагаа багасгаж чаддаггүй юм бол ядаж цэвэр агаар савлаж зардаг үйлдвэртэй болчихооч” гэх зэргээр өөрсдийн сэтгэгдлээ илэрхийлсэн байсан юм.

Дашрамд дуулгахад Японы аялал жуулчлалын Фүжисан бүсийн компаниуд тухайн нутгийн агаарыг бэлэг дурсгалын зориулалтаар анхлан савлаж байжээ. Хятадууд өөрснөө агаар савлан худалдах хэд хэдэн оролдлого хийж байжээ. Тухайлбал, 2012 оны есдүгээр сард хувиараа аж ахуй эрхлэгч Чэн Гуанбяо гэгч анх агаарыг лаазлан худалдаалж байгаагаа хэвлэлээр зарласан бөгөөд 100 мянган ширхэг лаазтай агаар үйлдвэрлэж, ширхгийг нь дөрвөөс таван юаниар заржээ. 2014 оны гуравдугаар сард Хэнань мужийн Лаү Жүньшаний аялал жуулчлалын цогцолбор интернэт хуудсаараа дамжуулан лаазалсан агаарыг бэлэг дурсгал болгон үйлдвэрлэнэ гэдгээ илэрхийлээд байгаа юм.

Эх сурвалж: http://dnn.mn/