Энэ сарын 16-нд ЦЕГ-аас Т.Лхагвасүмбэрэлийн хэрэгтэй холбогдуулан мэдээлэл хийх үеэр ЦЕГ-ын хэвлэл мэдээлэл, олон нийттэй харилцах хэлтсийн дарга Б.Баатархүү ингэж ярьсан “Талийгаачийн автомашинаас хоёр утас 0,5 гр “Сархад” архи, ундаа гэх мэт эд зүйлс гарсан. Архины шилэн дээрээс хоёр ширхэг гарын мөр олдсон байдаг... Тост Тосонбумбын нуруунд лиценз эзэмшигч компаниудыг бүгдийг нь эл хэрэгт холбогдуулан шалгаж, тайлбар мэдүүлэг авч байгаа” гэсэн юм.

Тэгвэл Тост, Тосонбумбын нуруунд ашиглалтын хоёр зөвшөөрөлтэй 43153.96 га талбайг “Саудгоби коэл транс” буюу УИХ-ын гишүүн Б.Чойжилсүрэнгийн компани эзэмшдэг юм байна. Харин нүүрсний хайгуулын 7 компани нийт 112681.08 га талбай эзэмшиж байгаа аж.

Харин алтны хайгуулын 3 тусгай зөвшөөрөлтэй 6511,71 га талбайг 3 өөр аж ахуйн нэгж авсан байгаа бөгөөд металын хайгуулын тусгай зөвшөөрлийг нэг байгууллага эзэмшиж байгаа аж. Өөрөөр хэлбэл дээрх компаниуд Тост, Тосонбумбын нуруунд лиценз эзэмшдэг бөгөөд нэг компани ашиглах бусад нь хайгуул хийх зөвшөөрөлтэй байгаа.

Ямартай ч талийгаачийн хэргийг шалгаж буй ажлын хэсгийнхэн дээрх компаниудаас тайлбар мэдүүлэг авч байгаа юм билээ. Гэвч Б.Чойжилсүрэн гишүүн “Манай компани талийгаачийн үхэлд буруугүй. Хэвлэлээр буруутан мэт мэдээлэл гаргалаа” хэмээн гомдолтой байгаагаа мэдэгдэж, хэвлэлийн хурал хийж байсан билээ. “Эрс шинэчлэл хөдөлгөөн” хүртэл дараа нь мэдээлэл хийж, “Тосонбумбын нурууны ирвэс амьдардаг хэсэгт зургаан хятад эзэнтэй компани тусгай зөвшөөрөлтэй юм байна. Тэгэхээр талийгаачийн үхэлд Хятад компаниудыг буруутган шалгах хэрэгтэй. Б.Чойжилсүрэн гишүүний компани буруугүй гэж бодож байна. Ирвэс амьдардаг хэсгээс бүүр хол лицензтэй юм билээ” гэсэн. Харин Б.Чойжилсүрэн гишүүн би буруугүй, манайх хамаагүй гэж олон дахин мэдээлэл хийх нь онцгүй тул иргэний нийгмийн байгууллагаар санаагаа хэлүүлсэн байх гэж хардахад хүргэв.

Замын камерийн бичлэг, утасны бичлэг дэх хүний дуу, архины шил дээрх гарын хээ, олон удаагийн халдлага, талийгаачийг сүрдүүлэн утсаар ярьсан гар утасны дугаар, машинд гарсан гуталын улны мөр зэрэг олон баримт ил байхад хэрэг илэрдэггүй нь хамгийн сэжигтэй байгаа юм. Талийгаачийн ар гэрийнхэн болон ажлын хамт олон найз нөхөд ард түмэн Тостын нуруунд лиценз эзэмшдэг компаниудыг сэжиглэж байгаа ч эл хэрэг илэрсэн тохиолдолд хэний компани болоод хэн буруутай нь тогтоогдох учиртай.

Гэтэл Б.Чойжилсүрэн манайх буруугүй, хэвлэлээр бичигдсэнд гомдолтой байна хэмээн Сүхбаатар дүүргийн шүүхэд хандсан байна. Харин Сүхбаатар дүүргийн цагдаагийн нэгдүгээр хэлтэсээс “Үндэслэлгүй нотолгоогүй, тавигдсан мэдээлэлд танай байгууллага ямар арга хэмжээ авсан бэ” гэсэн албан бичиг илгээжээ. Тэгэхээр Б.Чойжилсүрэнгийн компаныг талийгаачийн үхэлд буруугүй гэдгийг тус дүүргийн шүүх тогтоосон байж таарав уу. Хэрэв тийм бол Т.Лхагвасүмбэрэлийн амиа алдсан хэрэг илэрсэн байх ёстой. Илрээгүй нөхцөлд дээрх уул уурхайн компаниудын хэн нь буруутай, бас хэн нь буруугүй болох нь тогтоогдоогүй баймаар юм.

Талийгаач Т.Лхагвасүмбэрэлийг 2015 оны нэгдүгээр сарын 13-ны шөнө тавдугаар сургуулийн ойролцоо баг өмссөн хүмүүс хүчээр машинд суулган авч явсан бөгөөд машинд оруулмагцаа толгойд нь уут углаж эзгүй газар аваачиж дарамталсан байдаг. Тэд хэлэхдээ “Хөдөө байхдаа том том юм ярьдаг бацаан байна лээ. Хотод, хөдөө ч бидний гараас мултрахгүй шүү” хэмээсэн аж. Энэ хэргийг Сүхбаатар дүүргийн цагдаагаас шалгасан ч “Хохирогчгүй” хэмээн үзэж хэргийг хэрэгсэхгүй болгосон байдаг юм билээ...

Н.Ганаа

Үргэлжлэл бий...

Эх сурвалж: Cityinfo.mn