Нэг санаа байна, Ерөн­хий сайд аа. Ерөөсөө Зас­гийн газрын хэвлэл мэдээл­лийн алба, МОНЦАМЭ энэ тэрээсээ татгалзчихъя. Зас­гийн газрын хэвлэл мэдээл­лийн албыг татан буулгаад, МОНЦАМЭ-гийн хаалгыг хаачихъя.

Тэгээд засгийн бүх л чухал мэдээллээ хамгийн түрүүнд өгдөг "Блүүмбэрг"-тэйгээ л үлдчих. Бүх сайд дарга, нар чинь "Блүүмбэрг"-т ярилцлага өгнө гээд төл­бөрөө атгачихаад дугаарлаж байна лээ, тэгэхээр бүр ч амар. Заавал энэ хэдэн дотоо­дын хэвлэлийнхнээсээ мэдээллээ нууж цаашаа шивнээд байхгүй амар болно. Засгийн газрын хэвлэл мэдээл­лийн алба, МОНЦАМЭ хоёроор яах юм, мөнгөний гарз. "Угаасаа энэ чинь манай мэдээллийн алба, бидний хайртай "Блүүмбэрг" гээд л суугаад бай. Блүүм­бэргийг ингэж өмчиллөө гээд ямар засгаас мөнгө гарах биш. Хөрөнгөө оруулчихсан нөхөд нь л хариуцах юм чинь. Зүгээр л "Бид өнөөдрөөс хамаг чухал мэдээллээ өгдөг Блүүмбэргтэйгээ л харьцана" гэчих. Тэгвэл дотоодын хэдэн сэтгүүлчид чинь "Та нар тэнд тэгээд хэлчихсэн байна лээ ш дээ, яагаад биднээс мэдээл­лээ нуугаад байгаа юм бэ" гэж нэхэл хатуу асуугаад байхгүй болно.

Блүүмбэрг гоё л доо. Дэл­хийн зөндөө оронд мэдээллээ цацдаг. Цэнхэр гаригийн санхүү эдийн засгийн толь болсон хэрэгсэл. Хамаг л мундаг гэсэн шинжээчийн дүгнэлт, яриа энэ тэр зөвхөн Блүүмбэргээр шуурхай, товч, тодорхой гардаг. Тийм мун­даг амьтдын ярьдаг дэлгэ­цээр аймаар ухаантай царай­лаад яриад суухаар кайфтай л даа. Манай гишүүд, сайд нар угаасаа ухаантай царай­лах дуртай юм чинь бүр ч гоё санагддаг байх. Үгүй тэгээд тэд ганцаархнаа ухаантай царайлъя гэж боддоггүй юм билээ. Ерөөсөө л ухаантай дүр эсгэнэ гэдэг чинь хүний мөн чанар шиг байгаа юм. Шийдвэр гаргах түвшинд ажил­ладаг бүх л сайд дарга нар нь тэгээд байгаа боло­хоор хүнтэй л холбосон нь онох байх.

Саяхан даа, хэвлэлийн хурал энэ тэр гээд сайд дарга нар оролцсон элдэв арга хэмжээ Монголын үндэсний олон нийтийн телевизгүй бол эхэлдэггүй байсан чинь одоо энэ байдал өөрчлөгдчихсөн. "Энхрий хайрт Блүүмбэрг минь ирэхгүй байна, жаахан хүлээгээдэхье" гэж ил цагаан зарлаад суучихна даа харин ч нэг. Блүүмбэрг ирлээ, дарга нарын царай хачин төв болоод ухаантай үгээ ярьж гарна. Яг л шинжээч шиг чухал царайлж байгаад л... "Эдийн засаг төчнөөн хувь өсөхөөр байна, ер нь бол хөрөнгийн зах зээлийг хара­хаар..." гэж ирээд л эхэлнэ дээ. Манай хэвлэлийнхэн сүүлийн үед "Блүүмбэрг мэдээллээ" гэж их мэдээлдэг болсон. Дотоодын хэвлэ­лийнхний дуулаагүй, дарга нарын үгүй гэж гүрийгээд байсан асуудлыг нь "Блүүм­бэрг" мэдээлчихдэг учраас тэр. "Блүүмбэрг" мэдээлчи­хээр бид хоцроод ч болсон тэр чухал асуудлыг нь мэдээ­лэхгүй бол болохгүй. Тэгээд л "Блүүмбэрг мэдээллээ" гэж байгаад мэдээлнэ дээ, өөр арга байхгүй. "Монгол Улсын Засгийн газар Таван толгойн баруун Цанхи дахь орд газарт олборлолт явуулах компа­нийг энэ онд багтаж тенде­рээр шалгаруулах байсан ч оны дунд хүртэл хойшлуул­сан гэж Блүүмбэрг мэдээл­лээ", "Блүүмбэрг"-ийн мэ­дээлс­нээр, Оюутолгойн орд дахь эзэмшлийн хувиа олон нийтийн компани байгуулан шилжүүлж, иргэдэд хувьцааг нь эзэмшүүлэх талаар судалж байгаа гэнэ" гэж ирээд мэдээлцгээж байна. Хамгийн сонирхолтой нь Засгийн газрын хэвлэл мэдээл­лийн албанаас мэ­дээлж байгаа юм шиг "Блүүмбэрг"-ийн мэдээлсэн бүхэн, дарга нарын үгүй гэж гүрийгээд хэлэхгүй байсан мэдээлэл болгон сүүлд нь бодитой үнэн болж таардаг. Тийм болохоор Засагтаа зардал багатай ажиллаж, хэвлэлийн албаа тараа гэж зөвлөмөөр санагдсан юм. Заримдаа "Блүүмбэрг"-ээр улсын нууцад хамаатай мэдээлэл хүртэл цацагдаж л байдаг.

Таван тивд 200 гаруй оффис, 13000 ажилтантай "Блүүмбэрг"-ийг мэргэжлийн түвшинд мэдээлэл бэлтгэдэг, санхүү, эдийн засгийн мэдээл­лийг чанартай, амттай нь цаг алдалгүй шуурхай хурдан хүргэдгийг хэн ч үгүйс­гэх аргагүй. Хэвлэл мэдээл­лийн хүчирхэг хэрэгсэл гэдэг­тэй нь ярих юм байхгүй. Зүгээр л сайд дарга нарын хандлагыг энэ сэдвийг хөндө­хөөс аргагүй боллоо л доо. Угаасаа тэр Блүүмбэрг чинь аймаар мундаг болохоороо олоод мэдчихсэн байхгүй юу, эдийн засгийн онолоор хөөж мөрдөж байгаад л олчихсон байх гэж тааж мэдэмхийрэх дарга гарч ирж мэдэх юм. Зах зээл, чөлөөт эдийн засгийн хөдөлгөгч хүч нь төр биш хувийн хэвшил гэдгийг ойлгоогүй сайд нар олонтойг ч хэлэх үү, иймэрхүү тайлбар өгвөл гайхах хүн гарахгүй. Хэн нэгэн албан тушаалтан хэлсэн болоод л эрхэм "Блүүм­бэрг" тийм мэдээлэл цацаж байгаа. Эдийн засгийн шинжээчийн түвшинд гаргал­гаа гаргаж, онол барьж хөө­гөөд ч мэдэж чадахгүй, засгийн хэмжээнд яригдсан нууц шийдвэрүүд "Блүүм­бэрг"-ээр л урсаж байдаг. Тааж мэддэг тарган лам, тамшаалж иддэг тарлан бух биш билээ, "Блүүмбэрг". Баримт­тай, нотолгоотой, боди­той эх сурвалжтай мэдээ­лэл "Блүүмбэрг" гэсэн улбар шар логоны дор цацагддаг. Тэр баримт эх сурвалж нь дотоодын хэвлэ­лийн­хэндээ дургүй манай дарга нар.

Блүүмбэргийг гаргаж ирсэн, өдий хүртэл хөгжүүл­сэн улсын хувьд хөрөнгийн зах зээл нь хөгжөөд өндрөө авчихсан, зах зээлийн эдийн засаг жинхэнэ утгаараа хөгжиж байгаа орон. Эдийн засаг нь хөгжих хэрээр хэвлэл мэдээллийн хэрэгслүүд нь хөгжөөд, нөлөөллөө тогтоо­гоод ирдгийн тод жишээг эндээс харчихаж болно. Манай улсын хувьд ерээд оноос л чөлөөт зах зээл хөгж­сөн. Хөрөнгийн зах зээлээ хөгжүүлье гэж одооноос л ярьж байгаа. Эдийн засаг хоёр оронтой тоогоор яригд­даг болсон үеэс энэ чигийн сэтгүүл, сонин төрөлжиж гарч эхэлсэн. Өдөр тутмын сони­нуу­дын ч анхаарлыг төвд байдаг байнгын сэдэв эдийн засаг болсон. Учир нь бидний гаргаж буй сонин, сэтгүүлийг уншиж байгаа эгэл иргэдэд гадаадын хөрөнгө оруулалт нэмэгдэх эсэх, валютын ханш чангарах, сулрах мэдээлэл хэрэгцээтэй байдаг юм. Сарын турш хөлсөө гаргаж олсон хэдэн төгрөг нь үнэ цэнээ алдах, алдахгүйг мэдэхийн тулд тэд эдийн засгийн нүүрийг гарчигладаг юм. Оюу толгой төсөл цааш­даа үргэлжлэх эсэхийг ч манай уншигчид сонирхдог. Учир нь тэдний гэрээс хэн нэг нь Оюу толгойн далд уурхайн бүтээн байгуулалт дээр ажиллаж байгаад ажлаасаа халагдаж орлогогүй болчих­сон байгаа. Ийм л учраас бид эдийн засгийн сонирхол татсан асуудлаар сайд дарга нарт хандаад байдаг юм.

Саяхан нэг даргын өрөөнд орлоо. Олны анхаарал тат­сан нэг асуудлаар тодруулга авах гэж байсан юм. Тэгсэн нөгөө эрхэм "Би Блүүмбэргт яриа өгөх гэж байгаа. Тэрнээс үзчих. Надад ямар ч зав алга" гээд халгаасангүй. Энэ эрхэм "Блүүмбэрг"-ийг сонгогчдынх нь олонх үздэггүй, тодорхой хүрээний цөөхөн үзэгч нь чухал царай, өнгөц дүгнэл­тийг нь сонсоод мушийдаг гэдгийг мэддэг болов уу.

Ц.ТҮВШИН